Read obolo I Sam 16 Bible Online

I Sam 16 - obolo bible

I Sam 16

¹Okumugwem onenitumu inyi Samien ibe, “Ìre owu òbofieek ejit me ibot kè Sọọlu isi ire mgbọ owa? Emi me lek n̄a nra ijit ọmọ ibe ikayaka ìre ubọọn̄ ebi Ijeren. Mgbọ keyi, tap aran̄ jot ifu anam kwun̄, mè na je, inyi ǹria owu ǹsi lek kè Jesi ogwu Beteleyem. Mije, nra iweek ene ge imun̄ inyi lek n̄a me etete bọn ebirieen̄ kan̄ ogwu mbasa irọ ubọọn̄.”

²Samien onenitumu inyi Okumugwem ibe, “Mọmọ ubọk emi mbaje? Ubọk geelek mâjebe, Sọọlu ìbonọnọ, mè itet emi ikpan̄.” Okumugwem onenifọọk ọmọ ibe, “Mọnọ gwun̄ eriembuuk ge kaan̄ me ubọk. Ogwu ido owu, tumu be ke òbonigwa ngwugwa.

³Gwen Jesi gbaalek kwun̄ sa si gwa ngwugwa ya. Enyi isire ere ya, emi me lek n̄a mâjeen̄ owu inu owu oborọ. Gwun̄ kan̄ geelek mâjeen̄be owu, ogwugwa ke obotọkọ aran̄ me ibot isa irọ ubọọn̄ inyi emi.”

⁴Samien onenirọ ike Okumugwem onyibe ọmọ ida, mè ininan̄a isi Beteleyem. Mgbọ ebi ugane ama ya emun̄be ọmọ, ejeje inikweek ọmọ, mè ikiran, mè inibe ọmọ, “Eyi onube ikeyi, ke înwọn wa?”

⁵Samien ofọfọọk ema ibe, “Kpunu ufialek. Ǹnu ibanigwa ngwugwa inyi Okumugwem. Eya orọ, ìsi ìgwọk lek, mè ìna ìnigọọk emi ìsi ìgwa ngwugwa ya.” Samien onenisa ubọk kan̄ igwọk Jesi lek, mè igwọk si lek ebi bọn ebirieen̄, mè inigwen ema ibe egọọk esibi enu me ere mbuban ya.

⁶Mgbọ ema erebe ere ya, Samien oraraan̄ chieen̄ imun̄ Eliabu, ene ge me lek bọn kè Jesi, mè itumu me ejit kan̄ ibe, “Me atikọ, ogwu Okumugwem otọkọbe aran̄ me ibot ore ogwu òkekeke me isi Okumugwem.”

⁷Ire, Okumugwem otutumu inyi Samien ibe, “Ìkare isi kan̄ mè ikeke ujọn̄ọ kan̄ ke ebesa irọ, mije, emi nra iwuuk lek ijit ọmọ. Ìkare ike ebilene ekimun̄ ene ke Okumugwem okimun̄ ene. Mije, ebilene ekikpọ ene me chieen̄ chieen̄, ire, Okumugwem ìkikpọ ene me ejit.”

⁸Jesi onenigwen Abinadap ibe inije iraka me isi kè Samien. Samien obebe ke Okumugwem ìkagobo si ogwugwu.

⁹Jesi onenigwen si Sama ibe inije iraka me isi kè Samien. Samien obebe si ke ìkare ogwugwu ke Okumugwem ogobo.

¹⁰Ikeyi ke Jesi ogwen bọn ebirieen̄ kan̄ jaaba ibe eneje eraka me isi kè Samien. Ire, Samien otutumu ibe ke Okumugwem ìkagobo ene geege me etete kè ebiba.

¹¹Samien onenido Jesi ibe, “Ìre otutuuk bọn ebirieen̄ kwun̄ ire echi?” Jesi ofọfọọk ibe ke ìyaka isik Debit, òrere ogwu sọn̄ gwun̄ òkup me ere îkikpukpo anam. Samien otutumu inyi Jesi ibe, “Ria etip gwen gwun̄ ya na, mije, eji kpebeje inyi isi me lek ngwugwa ya mege ire mgbọ gwun̄ kwun̄ ya mônube inire.”

¹²Jesi oraria ikwaan̄ igwen gwun̄ ya inu. Gwun̄ ya înwọn lek, mè ijot ichak, mè ijaan̄ uja enenen me chieen̄ ene. Okumugwem otutumu inyi Samien ibe, “Kpọ ogwu enerieen̄ ya ire ogwu. Nan̄a keke, mè tọkọ ọmọ aran̄ me ibot.”

¹³Samien obeben ifu aran̄ ya, mè ikana aran̄ òkup me emen itọkọ igwook Debit me ibot me isi otutuuk ebi ngwan̄. Mgbọ yaage, Ekwukwu Okumugwem oninin̄ ijot emen kè Debit bene me usen ya fo isi. Samien oneninan̄a igwu ikom ifo Rama.

¹⁴Me ike mgbọ ya, Ekwukwu Okumugwem oneninan̄a isibi itele Sọọlu. Mgbọ yaage, ijo erumun̄ ònan̄a me ubọk Okumugwem obebene ikisisaak Sọọlu.

¹⁵Ebi ikwaan̄ kè Sọọlu ebebene ikitumu inyi Sọọlu ibe, “Îre ijo erumun̄ ònan̄a me ubọk Awaji okisisaak owu.

¹⁶Eya orọ, ogwu nte, kpọ eji ire ebi me isi kwun̄. Ria eji, inyi eji esi eweek ogwu enerieen̄ ge òrọriọọn̄ ikifit uneen̄ esa enu. Mgbọ geelek ijo erumun̄ ya ònan̄a me ubọk Okumugwem isibene ikisisaak owu, ene ya mônenikifit uneen̄ inyi owu, lek kwun̄ môneniyaka inisuuk.”

¹⁷Sọọlu obebe ema esi eweek ene ge òrọriọọn̄ ifit uneen̄ ijaan̄ esa ejet ọmọ.

¹⁸Ene ge me lek ebi ikwaan̄ kè Sọọlu onenitumu inyi Sọọlu ibe, “Nriọọn̄ gwun̄ enerieen̄ ge, gwun̄ kè Jesi ogwu Beteleyem, ogwu òrọriọọn̄ ifit uneen̄ ijaan̄ enenen. Gwun̄ enerieen̄ ya ìre ogwu ìkakitet ukpook, mè ire si ogwu ònyenye lek enenen, mè ogwu usọ akọn̄. Îkiriọọn̄ itumu ikọ enenen, mè ire si ogwu òjajaan̄ uja enenen. Ògak otutuuk, Okumugwem òwa melek kan̄.”

¹⁹Sọọlu oraria osat isi Beteleyem, ibe esi lek kè Jesi, mè etumu enyi ibe iria Debit ogwu gwun̄, ogwu òkikpukpo arọọn̄ ya, ijet ọmọ.

²⁰Jesi oneniria ogwu gwun̄ Debit ijet Sọọlu, mè itap si fituru ijot inyọn̄ inyinya akpan, mè itap miin̄ ijot emen ogbokot ikpa anam, mè itet gwun̄ ebot ge isa igbaalek iria ijet.

²¹Debit oneninu me lek kè Sọọlu. Sọọlu omama Debit enenen, mè isa ọmọ irọ ogwu òkibeme nroon̄ akọn̄ kan̄.

²²Sọọlu oneniria etip ijet Jesi ibe, “Nye lek tele mè Debit ibia melek n̄a, mè ikisi ikwaan̄ inyi emi, mije, ugwem kan̄ îneme emi enenen.”

²³Mgbọ geelek ijo erumun̄ ònan̄a me ubọk Okumugwem isikisisaak Sọọlu, Debit îra imọnọ uneen̄, mè isa ubọk itoon̄ me lek ikifit. Sọọlu îra ikaan̄ utelelek, lek kan̄ îra isuuk, ijo erumun̄ ya îra isibi itele ọmọ.