Read obolo I Sam 18 Bible Online

I Sam 18 - obolo bible

I Sam 18

¹Me mgbọ Debit melek Sọọlu etumube ikọ isan̄a, inu kè Debit okpọkpọ inineme Jonatan gwun̄ kè Sọọlu enenen. Jonatan onenima Debit kubọk akpalek kan̄ gaalek.

²Bene me usen ya, Sọọlu omọmọnọ Debit itap me uwu kan̄, inyi inigọọk ọmọ iluk ibia. Ìkayaka ìtele ibe Debit ifo uwu ogwu ute.

³Jonatan onyanyan̄a ibot melek kè Debit mije îmabe Debit kubọk akpalek kan̄,

⁴mè iwọọk ofọnti awudu òkup me lek kan̄ isa ikana inyi Debit, mè inyi si Debit àwurukù irak kan̄ igbaalek oge akọn̄ kan̄ mè ogbaan̄ kan̄ melek fanti kan̄.

⁵Sọọlu isikiria Debit ikwaan̄, ikwaan̄ cha geelek ìkijeje ijaan̄ me ubọk kè Debit. Sọọlu osasa Debit irọ ogwu ibot ebi akọn̄. Inu ya onwọnwọn me chieen̄ otutuuk ebi ene, mè itat si me chieen̄ ebi ibot ikwaan̄ kan̄.

⁶Me mgbọ ebi akọn̄ ebi Ijeren ekinan̄a me isi akọn̄ ikika, mgbọ ya si Debit îkpan̄ ogwu isi akọn̄ ebi Filisia ya isan̄a, mè ika, ebibaan̄ egbọgbọọk inan̄a me otutuuk ama ebi Ijeren geelek isibi inu, mè ikikọt okwa, mè ikijop, ibenitọn̄ ogwu ubọọn̄ Sọọlu. Ema ekekikwak ekpete melek uneen̄ olik ita, mè ikinwọọn̄ unwọọn̄ enenen.

⁷Ebibaan̄ cha ekekikwak nkwukwak, mè ikichieek okwa ikibe, “Sọọlu îkpan̄ eyi kan̄ me obop me obop; Ire, Debit okpan̄ eyi kan̄ me akọp akọp obop!”

⁸Sọọlu onanaan̄ ejit enenen me lek okwa ya ebibaan̄ cha ekikọt, mè ibe, “Ema enyi Debit akọp akọp obop, sà emi ke ema eninyi obop obop! Ìre keke si oyaka inisik inyi Debit ikakaan̄, ilọ me lek irek ubọọn̄?”

⁹Bene me usen ya nyi isi, Sọọlu obebene ikikpọ Debit me ijo chieen̄.

¹⁰Me ofit iwele kan̄, ijo erumun̄ ònan̄a me ubọk Okumugwem oninin̄ Sọọlu me emen mgbọ îsikibe ikweek me emen uwu kan̄. Ibebene ikisisik, mè ikitaan̄ ukpo itumu ikọ kubọk ogwu nriran. Debit omọmọnọ uneen̄ ikaan̄ me ubọk ikifit kubọk îwuukbe lek ikifit otutuuk mgbọ kechilọ inu ya okirọ. Me ike mgbọ ya, Sọọlu îtet otunwa ge ikaan̄ me ubọk.

¹¹Sọọlu onenisa otunwa ya itọbọ Debit ibokpan̄. Ekiket kan̄ ìre itọtọbọ Debit ichim inwaan̄ me agba lek uwu. Ire, Debit ofafiala. Sọọlu îtọbọ otunwa ya mgbọ iba, Debit ofafiala si mgbọ iba cha.

¹²Sọọlu otetet ukpook me lek kè Debit, mije, Okumugwem onan̄abe itele ọmọ, mè iyaka inikup melek kè Debit.

¹³Mije keya, Sọọlu osasan̄a Debit isan̄a me uwu kan̄, mè inisa Debit irọ ogwu ibot obop ebi akọn̄. Debit okekisa ebi akọn̄ cha ikisibi isi akọn̄.

¹⁴Inu geelek Debit orọbe okpọkpọ ikije ijaan̄, mije Okumugwem okekebe inyi ọmọ.

¹⁵Mgbọ Sọọlu omun̄be ubọk inu okije ijaan̄ me lek kè Debit, ukpook lek kè Debit otetet Sọọlu.

¹⁶Ire, otutuuk ebi Ijeren mè ebi Juda emama Debit enenen, mije îkisa ema isibi isi akọn̄ ya, mè ikitim ikpan̄, mè ikisa si ema iyaka ika.

¹⁷Sọọlu onenitumu inyi Debit ibe, “Kpọ Merabu gwun̄ n̄a enenwaan̄ ogwu ugane ire ogwu. Mâsa inyi owu me lek nwa, ire ochieek isisi ikwaan̄ inyi emi kubọk ogwu usọ akọn̄, mè ikitim otutuuk akọn̄ Okumugwem.” Sọọlu ìtọt otitọt ya inyi Debit, inyi Debit ikaje me ubọk kan̄ ìkwu, kpan̄asi ikeya, ije me ubọk ebi Filisia ikwu.

¹⁸Debit ofọfọọk Sọọlu ibe, “Iyak! Ìre emi ìre ekene? Sà ìre ugwem n̄a ìkup me lek keke, sà uwu nte n̄a ìkup me lek keke me etete ebi Ijeren, eyi emi mbanire nlom gwun̄ ogwu ubọọn̄?”

¹⁹Ire, mgbọ mgbọ okembe ebesa Merabu inyi Debit me lek nwa, eyaka inisa inyi Adiriyen ogwu Meyola me lek nwa. Kpeyaka isa inyi Debit.

²⁰Me ike mgbọ cha, gwun̄ enenwaan̄ kè Sọọlu ogwu ekigwen Mikali onenima Debit enenen. Mgbọ Sọọlu onọbe ukpatu ya, inu ya okpọkpọ initat me chieen̄ kan̄, ibebele ejit.

²¹Sọọlu onenitumu ifieek me ejit kan̄ ibe ke ọmọ môsa Mikali iche olom inyi Debit, inyi ikana ufe eyi òboleke Debit itap me ubọk ebi Filisia, inyi ekpan̄. Sọọlu onenitumu inyi Debit ibe, “Mgbọ keyi, owu oyaka ikaan̄ òso irek iba irere nlom gwun̄ n̄a.”

²²Sọọlu onyinyi ebi ikwaan̄ kan̄ ida ibe egwen Debit me nlelet, mè etumu enyi ibe, “Kpọ, ogwu ubọọn̄ îkaan̄ ulọk me lek kwun̄ enenen, ikeya si ke otutuuk ebi ikwaan̄ kan̄ ema owu. Eya orọ, bọkọ gwun̄ ogwu ubọọn̄ do me lek nwa.”

²³Ebi ikwaan̄ kè Sọọlu esasa ikọ ya isi ikitumu inyi Debit. Debit ofọfọọk ema ibe, “Enyi ìkpọ-nu, ìre irere nlom gwun̄ ogwu ubọọn̄, ìre sọntitiik inu? Ògak ge, me lek n̄a ogwu ugbọọn̄ ikakupge me lek inu geege!”

²⁴Ebi ikwaan̄ cha ebeben inu ya Debit otumube isi ikpa inyi Sọọlu.

²⁵Sọọlu otutumu inyi ema ibe esi etumu enyi Debit ibe ke ọmọ ìkaweek ikpoko ibot nwa geege. Gaalek ke ọmọ ìkiweek efit lek ebirieen̄ ebi Filisia,[14] inyi ọmọ isa me ikeya ikpe ebi ochicha kan̄ useen̄ inu erọbe ọmọ. Sọọlu ìweek isasa me ikeya ida Debit itap me ubọk ebi Filisia, inyi ekpan̄.

²⁶Mgbọ ebi ikwaan̄ cha esabe etip ya inikpa inyi Debit, Debit omumun̄ ibe ke eya ìre mfufet inu me lek kan̄, mè ibele ejit enenen ikakana nlom gwun̄ ogwu ubọọn̄. Eya orọ, sabum usen ido-nwa ya onire,

²⁷Debit melek ebi akọn̄ kan̄ enenisi akọn̄ me lek ebi Filisia, mè ikpan̄ efit ebirieen̄ Filisia iba. Debit osasa lek ebirieen̄ kiban̄ ika ijet ogwu ubọọn̄, kubọk òjot òjot mkpukpe ibot nwa Sọọlu oweekbe, inyi ọmọ ikana nlom gwun̄ ogwu ubọọn̄. Sọọlu osasa Mikali gwun̄ kan̄ inyi Debit me lek nwa.

²⁸Sọọlu omumun̄ ibe ke Okumugwem òwa melek kè Debit, mè imun̄ si ibe ke gwun̄ kan̄ Mikali îma Debit.

²⁹Mije keya, ukpook kè Debit orọriọọn̄ itet Sọọlu enenen igak adasi mgbọ. Sọọlu ochacha Debit me otutuuk usen ugwem kan̄.

³⁰Ebi ibot akọn̄ ebi Filisia ekpọkpọ ikinu akọn̄ me lek ebi Ijeren. Mgbọ geelek ema enube, Debit îra ikitim akọn̄ ijaan̄ igak otutuuk ebi ibot akọn̄ kè Sọọlu kechilọ. Sa me ikeya, erieen̄ kè Debit okekitaan̄ etip enenen.