Read obolo I Sam 19 Bible Online

I Sam 19 - obolo bible

I Sam 19

¹Sọọlu onenitumu inyi ogwu gwun̄ Jonatan mè otutuuk ebi ikwaan̄ kan̄ ibe ekpan̄ Debit. Ire, Jonatan gwun̄ kè Sọọlu îma Debit enenen.

²Eya orọ, inenisi ikpa inyi Debit ibe, “Kpọ, Sọọlu nte n̄a ìkiweek ikpakpan̄ owu. Me ewelegwe iyakwut, riọọn̄ lek kwun̄! Week ere ge si let, mè kup me ere ya!

³Emi melek nte n̄a mêsibi inu me agba otu oron ere owu oletbe, mânenikeke igba nte n̄a, mè initumu ikọ melek kan̄ òfo me lek kwun̄, mè igban̄-nu inu ìbofọọk. Inu geelek îtumube, mânu inikpa inyi owu.”

⁴Me ofit iwele kan̄, mgbọ Jonatan melek ogwu ute ekikpa ukpatu, Jonatan onenikitumu ata inu ibak Debit inyi ogwu ute, mè ikibeek ibe, “Ìkanwọn ibe owu ogwu ubọọn̄ òrọ ijo inu me lek ogwu usun̄ kwun̄ Debit, mije, Debit ìkarọ owu ijo inu geege. Me atikọ, inu geelek Debit okirọ ìkire ntap-ubọk òmimin enenen isa inyi owu.

⁵Debit îtap ugwem kan̄ me ichep mije ebi Ijeren me mgbọ îkpan̄be ogwu isi akọn̄ ebi Filisia ya. Sa me ikeya, Okumugwem onyanyan̄a ebi Ijeren isibi me oniin̄ òmimin mè ikaan̄ ukpook. Owu me lek kwun̄ omun̄ si inu ya, mè ibele ejit. Ìre owu òbojeje iyaka inikpan̄ Debit ogwu ubọk otanabe, me kpunube inu geege îrọbe ilọ?”

⁶Sọọlu onọnọ ikọ ya Jonatan otumube, mè ininyan̄a ibot ibe, “Kè lek ugwem Okumugwem, kpebekpan̄ Debit.”

⁷Jonatan onenisi igwen Debit, mè iben otutuuk inu cha geelek ikpa inyi, mè inisa Debit isi me isi kè Sọọlu ogwu ute. Debit okukup melek kè Sọọlu kubọk îkupbe me adasi mgbọ.

⁸Ikafiin̄ mgbọ, akọn̄ obebene me etete ebi Filisia mè ebi Ijeren. Debit osasa ebi akọn̄ Ijeren isibi isi itim akọn̄ ya melek ebi Filisia, mè ikpan̄ owuwa ebi Filisia me akọn̄ ya. Ebi Filisia elilim, kpekọt ikeke ida Debit.

⁹Usen ge, ijo erumun̄ ònan̄a me ubọk Okumugwem oninin̄ emen kè Sọọlu. Sọọlu ìsisiki ikweek me emen uwu kan̄ mgbọ ya, mè ikaan̄ otunwa me ubọk. Debit okekikwak uneen̄ inyi ọmọ.

¹⁰Sọọlu onenisa otunwa ya itọbọ Debit, ikiweek ichichim Debit ikam me agba uwu, ire Debit ofafiala. Otunwa ya oraraka isi itoon̄ me agba uwu, mè igwọt inin̄. Debit onanan̄a me emen uwu ya isibi me eririeen̄ ya, mè ilibi inwọnọ.

¹¹Me eririeen̄ ya, Sọọlu oraria ebi ene ibe egwuun̄ chieen̄ me uwu kè Debit, mè ekpan̄ Debit me ewelegwe. Ire, Mikali nwa kè Debit onenitumu inyi Debit ibe, “Ire òkasa me eririeen̄ yi ìweek ere ìtap ibot, me ewelegwe, mêkpan̄ owu.”

¹²Mikali otatap ubọk ibene Debit itap itibi otu nruruk ito me agan̄ udun̄ oyet, Debit olilibi inan̄a, mè isa me ikeya inwọnọ mkpa.

¹³Mikali oneniben mkpọ mfaka ge ekọbe kubọk ene imaan̄ me inyọn̄ mkpilaak, mè isa ekwut ikana ichit lek, mè inisa inwọọn̄ ebot ichit me ibot.

¹⁴Sọọlu oneniria ebi ene ibe esi etet Debit esa enu. Mikali otutumu inyi ebi ife cha ibe ke lek kè Debit ìkanye.

¹⁵Sọọlu okpọkpọk iria ebi osat cha ibe esi esa chieen̄ emun̄ Debit, mè eben me inyọn̄ mkpilaak esa enu, inyi ekpan̄.

¹⁶Ire, mgbọ ebi osat cha egwube ikom inu, mè inin̄ emen uwu kè Debit, eyaka isi imun̄ mkpọmfaka me inyọn̄ mkpilaak, melek inwọọn̄ ebot me ibot.

¹⁷Sọọlu onenido Mikali ibe, “Ìre keke orọ mè owu òfiaan̄ emi ikeyi, mè òtele inyi ogwu ochicha n̄a inwọnọ?” Mikali ofọfọọk Sọọlu ibe, “Ogwu enerieen̄ ya ìtumu ibe emi ǹtap ubọk ǹnyi ọmọ inwọnọ, ire emi ǹkatap ubọk ìnyi ọmọ ilibi inwọnọ mkpa, ke ọmọ môkpan̄ emi.”

¹⁸Debit olilibi isi lek kè Samien me Rama, mè iniben otutuuk inu Sọọlu orọbe ọmọ ikpa inyi. Samien onenisa Debit igbaalek kan̄ inan̄a me Rama ifo Nayọt, mè isi ikup me ere keya.

¹⁹Etip onenire utọn̄ kè Sọọlu ibe ke Debit ọmọ òwa me Nayọt me Rama okupbe.

²⁰Sọọlu oneniria ebi ikwaan̄ kan̄ ibe esi Nayọt esi etet Debit ejet ọmọ. Mgbọ ebi ikwaan̄ kè Sọọlu erebe ama ya, ema emumun̄ ogbo ebi nriran ekiben nriran, mè imun̄ si Samien okekebe me ere ya kubọk ogwu ibot ebi nriran cha. Me ere ya, Ekwukwu Awaji oninin̄ emen ebi ikwaan̄ kè Sọọlu cha, ema si ekekiben nriran.

²¹Etip inu ya òrọrọ onenire utọn̄ kè Sọọlu, iraria ofifi ukpa ebi ikwaan̄ ibe esi. Me ere ya, ebibi si egọgọọk ikiben nriran. Sọọlu oraria òso ukpa ebi ikwaan̄ ita isi Nayọt. Ebiba si egọgọọk ikiben nriran.

²²Sọọlu me lek kan̄ onenije isi Rama, mè inije ire lek ikpele udọn̄ mun̄ ge òkup me Seku, mè ikidido ebi ene ibe ìre Samien mè Debit ekup me owa. Etutumu inyi ibe ke Samien mè Debit ekup me Nayọt me Rama.

²³Sọọlu onenikije isi Nayọt me Rama. Mgbọ yaage, Ekwukwu Awaji oninin̄ si emen kan̄, ikekije, mè ikiben nriran me oniin̄ ya abayaage inire Nayọt òkup me Rama.

²⁴Sọọlu owọwọọk ofọnti isan̄a me lek kan̄, mè inan̄a irọn̄ me ijọn̄ me isi kè Samien, mè ilaak njak ikeya me ijọn̄ otutuuk usen ya mè otutuuk eririeen̄ ya ikiben nriran. Mije keya ke ekitumu ibe, “Ìre Sọọlu ọmọ òwa si me otu ifuk ebi nriran?”