Read obolo I Sam 21 Bible Online

I Sam 21 - obolo bible

I Sam 21

¹Debit onenije isi ire Nọbu, mè iraka isi lek kè Ayimelek ogwu ngwugwa. Ayimelek ibebene chieen̄ imun̄ Debit, lek kan̄ okekiran, ijeje isi ikweek Debit, mè ikido ibe, “Òjeje ikeyi, owu gaalek? Kpunu ene geege melek kwun̄?”

²Debit ofọfọọk Ayimelek ogwu ngwugwa ibe, “Îkaan̄ ikwaan̄ ogwu ubọọn̄ okanabe itap emi me ubọk, mè ibe emi nkachieek ibe ene geege iriọọn̄ inu geege ofolek ikwaan̄ yi ọmọ oriabe emi. Ire me lek ebi melek n̄a, nra irọ inyi ema eriọọn̄ ere ema melek n̄a mêgbaan̄be ichichini.

³Mgbọ keyi, ìre keke ke okaan̄ me uwu? Soso, nyi emi owut fituru go, mè ìyaka ire inorie geelek okaan̄be.”

⁴Ogwu ngwugwa onenifọọk Debit ibe, “Ǹkakaan̄ fituru ikike geege me uwu, ilọ me lek fituru mbuban gaalek. Enyi mêkọt irie echa si, ire ke ebi akọn̄ melek kwun̄ mîtet lek kiban̄ ikaan̄ me lek ebibaan̄.”

⁵Debit ofọfọọk ibe, “Kpekichieek ibe ebibaan̄ egbet eji ere me lek me mgbọ geelek nkisa ebi n̄a isibi isi akọn̄. Ebi melek n̄a ekisusun̄ lek kiban̄ me mbuban mgbọ eji ekisi akọn̄, ikerere mgbọ ekisi ikwaan̄ geelek echi ìkakup me mbuban. Òyaka ònore mgbọ keyi eji esibibe inu ikwaan̄ òkup esese. Ebi melek n̄a kpechaka mbuban!”

⁶Ogwu ngwugwa ya oneninyi Debit fituru mbuban. Mije, kpunu fituru ikike geege, ilọ me lek fituru isi Okumugwem echi esan̄abe mgbọ esabe ayaya fituru òyoyok ukan̄ me lek ininwene me usen ya.

⁷Me ike mgbọ ya, ogwu enerieen̄ ge ogwu Edọm, ogwu ekigwen Dowegi, ene ge me etete ebi ikwaan̄ kè Sọọlu, òrere ogwu ibot ebi ìkikpukpo anam inyi Sọọlu, ọmọ òwa me ere ya okupbe ikifaka mfaka me isi Okumugwem.

⁸Debit ododo Ayimelek ogwu ngwugwa ibe, “Ìre okaan̄ otunwa mè ìre oge akọn̄ me ere yi? Ubọk ikwaan̄ ogwu ubọọn̄ oriabe emi okupbe ugwat ugwat, ǹkamọnọ oge akọn̄ n̄a mè nroon̄ akọn̄ n̄a geege ìkaan̄ me ubọk.”

⁹Ogwu ngwugwa ya ofọfọọk ibe, “Gaalek oge akọn̄ kè Golayat ogwu Filisia, ogwu owu okpan̄be me isi akọn̄ me iteke Ela okup me ere yi. Esasa ekwut ikat, mè iben isun̄ me udun̄ mgbidim ofọnti ikwaan̄ ebi ngwugwa. Ire obomọnọ, mọnọ, ke kpunu ofifi oge akọn̄ geege me ere yi, ilọ me lek kan̄.” Debit obebe, “Kpunu ojelek kan̄! Mọnọ nyi emi!”

¹⁰Debit onanan̄a me ere ya ilibi isi lek kè Akis, ogwu ubọọn̄ Gat.

¹¹Ebi ikwaan̄ kè Akis enenitumu inyi Akis ibe, “Ìre ìkare Debit ya ogwu ubọọn̄ otutuuk inyọn̄ ijọn̄ yi ire ogwu? Ìre ìkare ọmọ ke otutuuk ebibaan̄ ekikọt me okwa òjijop kiban̄ ikibe, ‘Sọọlu îkpan̄ eyi kan̄ me obop me obop; Debit okpan̄ eyi kan̄ me akọp akọp obop’?”

¹²Ikọ ya otetet Debit lek, ukpook otetet ọmọ enenen me lek kè Akis ogwu ubọọn̄ Gat.

¹³Debit onwenwene eru kan̄ me isi ife cha, mè ibene ikirọ inu kubọk ogwu iraak mgbọ îkupbe me ubọk kiban̄, mè ibene ikige inu me lek afọn̄ otunchit, mè ikigbuk nkọọk me otu igwook me lek ifet otu kan̄.

¹⁴Akis otutumu inyi ebi ikwaan̄ kan̄ ibe, “Ìkpọ, ogwu enerieen̄ yi òkirama iraak! Enyi ejeje isa ogwu òkup ikeyi inu me lek n̄a?

¹⁵Ìre emi ǹnanan ebi iraak ni, eyi enyi esabe ogwu iraak inu me isi n̄a, inyi inikirama iraak kan̄ me isi n̄a? Ìre ojelek ogwu òkup ikeyi obonigọọk iluk me uwu n̄a ni?”