Read obolo I Sam 22 Bible Online

I Sam 22 - obolo bible

I Sam 22

¹Debit oneninan̄a me Gat me ilibi isi ilet me emen ǹkororok ge òkup me agba lek Adulam. Mgbọ ebi ngwan̄ kè Debit mè otutuuk ebi uwu ogwu ute enọbe inu òsisibi inyi Debit, ema esisibi igọọk Debit me ere ya.

²Otutuuk ebi uyọrọlek otetbe, mè otutuuk ebi urieek okemebe, mè ebi ìkup me ikpele ujaralek egbugbuku isibi igọọk Debit. Debit onenikup kubọk ogwu ibot inyi ema. Ema otutuuk mîso efit ebirieen̄ ini.

³Debit oneninan̄a me ere keya isi Mijipa eyi òkup me ido Mowabu, mè isi lek ogwu ubọọn̄ Mowabu, mè itumu inyi ibe, “Soso, tele mè ebi kè nte n̄a mè nga n̄a enegọọk enyi ekup mege ire mgbọ mâriọọn̄be inu Awaji oborọ melek n̄a.”

⁴Debit otetele ogwu ute melek ogwu uga me ubọk ogwu ubọọn̄ Mowabu. Ema eluluk me ere ya otutuuk mgbọ cha Debit okilet lek me ere okwukwek akọn̄.

⁵Gadi ogwu nriran onenitumu inyi Debit ibe, “Kayaka ìkup me ere okwukwek akọn̄ yi! Je fo agan̄ ijọn̄ ebi otoko kè Juda si kup.” Debit onanan̄a isi emen oron Eret isi ikup.

⁶Sọọlu oneninọ ibe ke mîmun̄ Debit melek ebi melek kan̄. Sọọlu ìsiki ikweek irek me irak uti tamaris me inyọn̄ orioon̄ ge me Gibiya, mè otunwa kan̄ me ubọk. Ebi ikwaan̄ kan̄ ekekeke ikana ọmọ.

⁷Sọọlu onenikido ebi ikwaan̄ kan̄ cha ìkekeke ikana ọmọ ibe, “Enyi ebi otoko kè Benjamin, soso, ìgban̄ utọn̄! Ìre gwun̄ kè Jesi ìbonyi enyi ijọn̄ uko? Sà ìre ìbonyi enyi uko gerep? Ìre ìbosa enyi irọ ebi ibot akọn̄ ìkikpulu obop obop ebi akọn̄? Sà ìre ìbosa enyi irọ ebi ibot ìkikpulu efit efit ebi akọn̄?

⁸Ìre bak me lek keya ke enyi otutuuk ene egọọk ọmọ ikeke ikeme emi? Mije, ene geege me etete kinyi ìkarọ inyi emi ǹriọọn̄ ibe ke gwun̄ n̄a înyan̄a ibot melek gwun̄ kè Jesi. Kpunu si ene geege me etete kinyi òfefieek ejit me ibot n̄a, mè inifiik emi abọm ibe ke gwun̄ n̄a îrọ ogwu ikwaan̄ n̄a inye ibe ije ikeme emi, mè ikpa mbin ikana emi kubọk îkupbe me cherekeyi!”

⁹Dowegi ogwu Edọm òwa si me ere ya okekebe me etete ebi ikwaan̄ kè Sọọlu cha. Dowegi onenifọọk Sọọlu ibe, “Emi mmun̄ gwun̄ kè Jesi onube me lek kè Ayimelek, gwun̄ kè Ayitubu me ama Nọbu,

¹⁰Ayimelek ododo ida Okumugwem inyi, mè inyi inorie, mè imọnọ si oge akọn̄ kè Golayat ogwu Filisia ya isa inyi igbaalek.”

¹¹Ogwu ubọọn̄ oraria ebi ikwaan̄ kan̄ ibe esi egwen Ayimelek ogwu ngwugwa, gwun̄ kè Ayitubu òkup me Nọbu, ọmọ melek otutuuk ebi uwu ogwu ute, ìrere ebi ngwugwa, ibe enu enemun̄ ọmọ. Ayimelek mè otutuuk ebi uwu ogwu ute enunu inimun̄ ogwu ubọọn̄.

¹²Sọọlu onenitumu inyi Ayimelek ibe, “Gwun̄ kè Ayitubu, gban̄ utọn̄ nu.” Ayimelek ofọfọọk ọmọ ibe, “Ogwukaan̄ n̄a, emi gwa ǹkigban̄.”

¹³Sọọlu onenido ọmọ ibe, “Ìre keke orọ owu ogọọkbe gwun̄ kè Jesi ikeke ikeme emi? Ke owu onyi gwun̄ kè Jesi inorie mè oge akọn̄, mè ido ida Awaji inyi ọmọ, inyi ọmọ ikitim akọn̄ ikeme emi, mè ikpa mbin ikana emi kubọk îkupbe me cherekeyi?”

¹⁴Ayimelek ofọfọọk ogwu ubọọn̄ ibe, “Ìre ekene ene me etete otutuuk ebi ikwaan̄ kwun̄ ogbe utoon̄-ejit kubọk Debit, òyet gwun̄ ogwu ubọọn̄? Me atikọ, kpunu ene geege me etete kiban̄ òkirọ ida kwun̄, mè ikaan̄ umin me emen ototun̄ ukan̄ kwun̄ kubọk Debit!

¹⁵Ìre cherekeyi ke mbene ikido ida Awaji inyi Debit ni? Mwuwuuk lek ikirọ! Ogwu ubọọn̄, kaben ufialek keyi ìnitoon̄ emi ogwu usun̄ kwun̄ mè ebi uwu nte n̄a me ibot. Mije, emi ogwu usun̄ kwun̄ ǹkariọọn̄ inu geege ofolek inu chi, mè ìre sọntiik, mè ìre ilile.”

¹⁶Ire, ogwu ubọọn̄ otutumu inyi Ayimelek ibe, “Ayimelek, mkpa ke obokwu, owu melek otutuuk ebi uwu kè nte kwun̄!”

¹⁷Ogwu ubọọn̄ oneninyi ebi mbem kan̄ ìkeke me agba lek kan̄ ida ibe, “Ìsaba ìsi ìkpan̄ ebi ngwugwa Okumugwem chi, mije, ema si mîgọọk Debit ikeke, mè iriọọn̄ ibe ke Debit îlibi inan̄a, mè iriaan̄ otu, kperọ inyi emi ǹriọọn̄.” Ire, ebi ikwaan̄ ogwu ubọọn̄ cha kpeweek ichachak ubọk kiban̄ me lek ebi ngwugwa Okumugwem.

¹⁸Ogwu ubọọn̄ otutumu inyi Dowegi ibe, “Dowegi, ngwa, owu kpan̄ ebi ngwugwa chi!” Dowegi ogwu Edọm ya osasaba isi, mè isa ubọk kan̄ ikpan̄ ebi ngwugwa Okumugwem cha. Me usen ya, Dowegi îkpan̄ akọp ebi ngwugwa jeeta mè go, ebi ìtatap mgbidim ofọnti lilin̄ ebi ngwugwa.

¹⁹Dowegi ikpakpan̄ ebi ngwugwa cha isan̄a, ijijibi akọn̄ isi Nọbu, ama ebi ngwugwa ya, mè isa oge akọn̄ ikpan̄ otutuuk ebirieen̄ mè ebibaan̄, mè nsabọn mè asa nsabọn ìkup me otu ebe, mè ikpan̄ si ebi kè eriembuuk mè inyinya akpan mè arọọn̄.

²⁰Ire, gwun̄ enerieen̄ ge kè Ayimelek gwun̄ kè Ayitubu, olilibi inwọnọ. Erieen̄ gwun̄ enerieen̄ ya ìre Abiata. Abiata olilibi isi igọọk Debit ikup.

²¹Abiata otutumu inyi Debit ibe ke Sọọlu îkpan̄ ebi ngwugwa Okumugwem.

²²Debit otutumu inyi Abiata ibe, “Iin̄, me usen ya, nriọọn̄ ijaan̄ lek ibe, eyi Dowegi ogwu Edọm okupbe me ere ya, ke ìkpolọlọ ibeben otutuuk inu òrọrọ me ere ya isi ikpa inyi Sọọlu. Îre me ibot n̄a ke otutuuk ebi uwu kè nte kwun̄ ekwaan̄ isan̄a.

²³Kayaka ìfieek owot, gọọk emi kup, ke ogwu òkiweek ebek ugwem kwun̄ òkiweek si ebek ugwem n̄a. Owu ìre ogwu emi mbabebem.”