Read obolo I Sam 23 Bible Online

I Sam 23 - obolo bible

I Sam 23

¹Usen ge, etip onenire utọn̄ kè Debit ibe ke ebi Filisia mîjibi akọn̄ inin̄ Keyila, mè ikifum aya akpa efaan̄be ititiin̄ me uko ebi ene.

²Debit onenisi ido ida Okumugwem, ibe mè ìre ọmọ isi itim akọn̄ me lek ebi Filisia, mè ìre ọmọ ikasi. Okumugwem ofọfọọk ibe, “Si, tim akọn̄ me lek ebi Filisia, mè nyan̄a ama Keyila sibi.”

³Ebi akọn̄ kè Debit etutumu inyi Debit ibe, “Kpọ, me ere keyi eji ekupbe me Juda, owot ìkifefieek eji, sà mgbọ eji mênisi Keyila ibesi itim akọn̄ me lek ogbogbo urum akọn̄ ebi Filisia ye?”

⁴Debit okpọkpọk isi ido ida Okumugwem. Okumugwem ofọfọọk Debit ibe, “Nan̄a keke, mè si Keyila, ke emi me lek n̄a nra ikana ebi Filisia itap owu me ubọk.”

⁵Debit melek ebi kan̄ enenijibi akọn̄ isi Keyila, mè isi itim akọn̄ me lek ebi Filisia, mè ikpan̄ ema enenen, mè ikpulu eriembuuk kiban̄. Sa me ikeya ke Debit onyan̄a ebi Keyila isibi me ubọk ebi Filisia.

⁶Abiata gwun̄ kè Ayimelek îgọọk Debit isi Keyila, mè imọnọ mgbidim ofọnti ikwaan̄ ebi ngwugwa ikaan̄ me ubọk. Ìsasa ofọnti ikwaan̄ ya igbaalek inu me mgbọ ya îlibibe inu inigọọk Debit ikup.

⁷Etip onenire lek kè Sọọlu ibe ke Debit òwa me Keyila. Sọọlu obebe, “Eyi Debit oraraka inin̄ emen ama Keyila òkakaan̄ isotu melek okwukwut me lek me otunchit, mè isa me ikeya igon lek kan̄ ikam, ìsibi ibe ke Awaji îra ikana Debit itap emi me ubọk.”

⁸Sọọlu onenigwen otutuuk ebi akọn̄ kan̄ ititiin̄, inyi enesi Keyila esi ekpa mbin akọn̄ ekana Debit mè ebi melek kan̄.

⁹Ire, Debit onọnọ ibe ke Sọọlu òkitọt ijo otitọt ofolek kan̄, mè inibe Abiata ogwu ngwugwa isa mgbidim ofọnti ikwaan̄ ebi ngwugwa inu.

¹⁰Debit oneniriaak uriaak ibe, “Jei Okumugwem, Awaji ebi Ijeren, me atikọ, emi ogwu usun̄ kwun̄ nra inọ ibe ke Sọọlu òkitọt inunu inijijaka ama Keyila igwook mije n̄a.

¹¹Ìre ebi ama Keyila mêtet emi ikana itap me ubọk kè Sọọlu? Ìre Sọọlu mônu ama yi kubọk ogwu usun̄ kwun̄ onọbe? Jei, Okumugwem, Awaji ebi Ijeren, soso, tumu-nu nyi ogwu usun̄ kwun̄!” Okumugwem ofọfọọk Debit otu ibe ke Sọọlu mônu.

¹²Debit okpọkpọk ido Okumugwem ibe mè ìre ebi Keyila mêtet ọmọ mè ebi melek kan̄ ikana itap me ubọk kè Sọọlu ye. Okumugwem ofọfọọk ibe, iin̄ ke mêrọ.

¹³Debit melek ebi kan̄, ìsoso efit ebirieen̄ gweregwen, enanan̄a isibi me Keyila, mè ikijijen̄e ikana me ere me ere. Etip onenire lek kè Sọọlu ibe ke Debit îlibi isibi me Keyila. Mije keya, Sọọlu otetele, ìkayaka ìnu ama Keyila.

¹⁴Debit okekiluk ikana me ere òkaan̄ okwukwek akọn̄ me emen èwê, mè inyọn̄ ogoon̄ òkup me emen èwê Jifu. Me otutuuk mgbọ cha, Sọọlu okekiweek Debit me agan̄ geelek. Ire, Awaji ìkada Debit ìtap me ubọk kè Sọọlu.

¹⁵Debit îmun̄ ibe ke Sọọlu ìkiweek ọmọ ikpakpan̄. Mgbọ ya, Debit ìkup me ama Ores me emen èwê Jifu.

¹⁶Jonatan gwun̄ kè Sọọlu oneninan̄a ije isi ichichini melek kè Debit me Ores, mè irọ ọmọ inye ibe itoon̄ ejit me lek Awaji, mè ikat ejit.

¹⁷Jonatan onenitumu inyi Debit ibe, “Kafieek owot, ke ubọk kè Sọọlu nte n̄a ìkpochak owu me lek. Owu môre ubọọn̄ me Ijeren, emi nrere òso ene iba inyi owu. Sọọlu nte n̄a me lek kan̄ îriọọn̄ ibe ke îre ikeyi ke ìbokup.”

¹⁸Ema ene iba enenigbaan̄ inyan̄a ibot me isi Okumugwem isasa igbaan̄ lek kiban̄ ibọp. Jonatan onanan̄a ije ifo. Debit obabia si me Ores.

¹⁹Ebi ama Jifu enenisi lek kè Sọọlu me Gibiya, mè isi ikpa inyi ibe, “Kpọ, Debit ìkilileek me etete kiji me ama Ores, me ere òkaan̄ okwukwek akọn̄ me inyọn̄ orioon̄ òkup me Akila me agan̄ osiki Jesimọn.

²⁰Eya orọ, ogwu ubọọn̄, mgbọ geelek òneneme owu, sibi na me ama kiji, ke eji mêtet ọmọ ikana itap owu me ubọk.”

²¹Sọọlu onenibe ema, “Okumugwem igbana enyi, mije, enyi mîkaan̄ ejit nsan me lek n̄a!

²²Ire, ìfon, mè ìkpọk ìsi ìbem lek. Ìweek ìriọọn̄ ere îkimalek isi. Ìweek si ìriọọn̄ mè ìre ekene omun̄ ọmọ me ere ya. Mije, ekitumu inyi emi ibe ke ene ya ìre atalek ogwu òka.

²³Ìweek si ìriọọn̄ otutuuk ere Debit okilet. Enyi isiweek iriọọn̄, ìgwu ìkom ìna ìnikpa ìnyi emi, ke mâgọọk enyi ije. Ire ke ọmọ òwa me inyọn̄ ijọn̄ yi me atikọ, mâwọlọ otutuuk emen ntutun̄ ere geelek me Juda, mè iweek ọmọ mege mâweekbe ọmọ imun̄.”

²⁴Ebi Jifu cha eneninan̄a ikeke, mè idasi ije ifo Jifu ama kiban̄ me isi kè Sọọlu. Me ike mgbọ ya, Debit mè ebi melek kan̄ ekup me emen èwê Mayon me iteke ijọn̄ Araba, me agan̄ osiki Jesimon.

²⁵Sọọlu mè ebi kan̄ enanan̄a ije isi ikiweek Debit. Etip orere utọn̄ kè Debit ibe ke Sọọlu òkinu. Debit onanan̄a ije ifo lek ewuuk ile ge òkup me emen èwê Mayon ya isi ikup. Sọọlu inọnọ ibe ke Debit òwa me agan̄ Mayon, ibebene ikigọọk Debit unye unye me emen èwê Mayon ya.

²⁶Sọọlu mè ebi kan̄ enenire lek ewuuk ere Debit oletbe. Sọọlu mè ebi kan̄ ekup me isi ewuuk ya agan̄ ge, sà Debit mè ebi kan̄ ekup me isi agan̄ keyilọ ikiweek ike ema mêsabe igwat lek ilibi inwọnọ Sọọlu mè ebi kan̄. Sọọlu mè ebi kan̄ ekakana Debit mè ebi kan̄ okokop, mè ibenitet ema.

²⁷Ìkpọkpọ inire me ike mgbọ ya ke osat onilook Sọọlu ibe igwagwat lek inu, ke ebi Filisia mîjibi akọn̄ inu me inyọn̄ ijọn̄ ebi Ijeren uyeke uyeke.

²⁸Sọọlu otetele igọgọọk Debit, mè igwu ikom ije ibosi ichichini ebi Filisia. Mije keyi ke ekigwen ere ya Ewuuk Iche-lek.

²⁹Debit onanan̄a me ere ya ije inene isi ikup me ere òkaan̄ okwukwek akọn̄ me Engedi.