Read obolo I Sam 25 Bible Online

I Sam 25 - obolo bible

I Sam 25

¹Ike mgbọ okije, Samien onenikwu. Otutuuk ebi Ijeren etoto ito mkpa kan̄, mè iniben ọmọ ifuun̄ me uwu kan̄ me Rama. Debit oneninan̄a ije ikwala isibi isi emen èwê Paran isi ikup.

²Îkaan̄ ogwu enerieen̄ ge ogwu ama Mayon ogwu òbọbọọn̄ ubọọn̄ enenen, mè ikaan̄ ijọn̄ mè ogbogbo anam me ama Kamen. Ogwu enerieen̄ yi îkaan̄ obop arọọn̄ ita, mè obop ebot ge. Me ike mgbọ ya, ogwu enerieen̄ ya ìkup me ere ekisọp inwọọn̄ me lek arọọn̄ kan̄ cha me Kamen.

³Erieen̄ ogwu enerieen̄ ya ìre Naban, sà erieen̄ ogwu nwa ore Abigen. Abigen ìre enenwaan̄ òkaan̄ ifuk-ibot, mè ijaan̄ uja. Sà Naban ofieek enenen me inu geelek îkirọ, mè ire si uyọt uyọt ene. Naban ìre ogwu owot iman kè Kelep.

⁴Debit onenikup me emen èwê Paran ya inọ ibe ke Naban òkisọp inwọọn̄ me lek arọọn̄ kan̄,

⁵mè inigobo akọp ebirieen̄ me etete ebi kan̄ iria isi lek kè Naban me Kamen, mè itumu inyi ema ibe etọp Naban amọn enyi ọmọ,

⁶mè etumu si enyi Naban ibe, “Kè Awaji inyi owu ujọn̄ọ ugwem! Esuuk ikup inyi owu! Esuuk ikup si inyi ebi ototun̄ ukan̄ kwun̄, mè ikup me lek otutuuk inu geelek okaan̄be!

⁷“Emi nnọ ibe ke mêkisọp inwọọn̄ me lek arọọn̄ kwun̄. Ebi òkpukpo arọọn̄ kwun̄ melek kiji ekikup. Eji kpetap ema ufialek geege me lek, anam kiban̄ geege ìkanan̄a me lek ìchep otutuuk mgbọ ema ekupbe melek kiji me Kamen.

⁸Owu môkọt ido iriọọn̄ si me otu ebi kwun̄, inyi ema esa otu kiban̄ gaalek ekpa enyi owu. Mgbọ keyi, soso kaan̄ ejit nsan me lek ebi n̄a chi nriabe inu me lek kwun̄, mije, îre usen ijọk ke eji enu me lek kwun̄. Soso, ire ikaan̄ inu geelek owu môkọtbe iche inyi eji, nye lek che nyi ebi usun̄ kwun̄ mè gwun̄ kwun̄ Debit.”

⁹Ebirieen̄ cha ebi Debit oriabe enunu inimun̄ Naban, mè inilook ọmọ etip ya Debit obe elook, mè ikup ikigban̄ ufọọk-otu kan̄.

¹⁰Naban ofọfọọk ebi ikwaan̄ kè Debit cha ibe, “Ìre Debit gwu ìre ekene mọnọ? Ìre gwun̄ kè Jesi gwu ìkeek ibe ọmọ ìre ekene ni? Me ukot mgbọ keyi, eyi owuwa ebi usun̄ ekpọkpọ ikilibi inan̄a me lek ebi nte uwu kiban̄ isi ikiweek ere òbonwọn,

¹¹ìre emi ǹnemkpulu fituru n̄a mè mudim n̄a melek anam mkpan̄be inyi ebi ìkisọp inwọọn̄ me lek anam inyi emi ǹsa ǹnyi ife nkariọọn̄ge ere ema enan̄abe inu ni?”

¹²Ebi ikwaan̄ kè Debit cha egwugwu ikom ifon, mè iben otutuuk inu cha Naban otumube isi ikpa inyi Debit.

¹³Debit onyinyi ida ibe ogwu ikup, imọnọ oge akọn̄ kan̄ ikwaan̄. Otutuuk ene ekwakwaan̄ oge akọn̄ kiban̄. Debit si omọmọnọ eyi kan̄ ikwaan̄. Inu òbet lek efit ene ini egọgọọk Debit ije inene. Efit ene iba ebabia ikikpọ chieen̄ me lek nroon̄ uwu kiban̄ òkup me ere ya.

¹⁴Ene ge me lek ebi ikwaan̄ kè Naban osisi itumu inyi Abigen, nwa kè Naban ibe, “Kpọ, Debit ìkup me emen èwê iria ene ibe enetọp nte uwu kiji amọn, nte uwu kiji ogagana ere inyi ema.

¹⁵Ire, ebi osat cha ìre ebi ata ife me lek kiji enenen. Otutuuk mgbọ eji ekijijen̄e ikana me etete kiban̄ me emen oron, ema kpetap eji ufialek geege me lek, anam kiji geege ìkanan̄a me lek ìchep.

¹⁶Ife cha ekup inyi eji kubọk mgban akọn̄ me ikarek mè eririeen̄ otutuuk mgbọ eji ekije ikana me etete kiban̄ ikikpukpo arọọn̄.

¹⁷Eya orọ, week riọọn̄ inu obokọt irọ, mije, ùrioon̄ ire eya òkinu inyi nte uwu kiji melek otutuuk ebi ototun̄ ukan̄ kan̄! Nte uwu kiji ìre uyọt uyọt ene! Kpunu ogwu òkikọt itumu ikọ inyi, mè igban̄.”

¹⁸Abigen ogwagwat lek ititiin̄ efit owut fituru iba, mè ogbokot ikpa anam iba etapbe miin̄ ijot, mè arọọn̄ go ekpan̄be mè ibala, mè otitọ akpa ekakala go, mè efit nchicha gerep, mè efit nchicha figi iba, mè iniben ititoon̄ me inyọn̄ ebi kè inyinya akpan,

¹⁹mè inibe ebi ikwaan̄ kan̄ edasi ekeje, ke ọmọ gwa òkinu me udun̄. Ire, Abigen ìkatumu inu geege ìnyi Naban ogwu olom.

²⁰Abigen onenene inyọn̄ inyinya akpan kan̄, mè ikilibi me agan̄ udun̄ ogoon̄. Me ekakpọge chieen̄, Debit mè ebi kan̄ ekekikwala isibi me oniin̄ ya, mè inichichini melek kan̄.

²¹Debit okekitumu ibe, “Me atikọ, ǹkikpọ chieen̄ me lek otutuuk inu geelek ene yi okaan̄be me ikike me emen èwê! Inu kan̄, kubọk ge ikeyi ìkachep! Ene yi onenisa ijo inu ikpe emi me lek ata inu nrọbe inyi!

²²Kè lek Awaji! Ifieek inyi emi[15] ire ntele ibe enerieen̄ ge ikeyi, me lek otutuuk ebi kan̄ isik me ugwem ire ewelegwe iyakwut!”

²³Abigen omumun̄ Debit, mè igwat lek inan̄a me inyọn̄ inyinya akpan kan̄ isibi ijọn̄, mè igele igwook me ijọn̄, mè ikana isi ikwuun̄ me isi kè Debit,

²⁴mè irọn̄ me ijọn̄ me ukot kè Debit, mè itumu inyi ibe, “Soso, fuk otutuuk ijo inu cha geelek toon̄ emi me ibot. Soso, tele mè emi ogwu usun̄ kwun̄ ǹtumu ikọ melek kwun̄! Nye lek gban̄ utọn̄ me lek inu emi ogwu usun̄ kwun̄ mbatumu!

²⁵Soso, ogwukaan̄ n̄a, san̄a ejit kwun̄ me lek kè Naban, ogwu ikpak ikpak ya. Mije, îre erieen̄ kan̄ osọp. Ekigwen ọmọ Naban, eyi òsisibi ogwu mbubut. Ọmọ si okpọkpọ ikirọ inu mbubut mbubut. Emi ogwu usun̄ kwun̄ enenwaan̄ ǹkarieen̄ chieen̄ me lek ebi osat kwun̄ cha ebi owu ogwukaan̄ n̄a oriabe inu.

²⁶“Me mgbọ keyi, ogwukaan̄ n̄a, kè lek ugwem Okumugwem, mè kè lek kwun̄, eyi Okumugwem orọbe inyi owu okafiat eje ene, mè owu okasa ubọk kwun̄ ìkpe ene useen̄ ijo inu ene orọbe owu, kè otutuuk ebi ochicha kwun̄ ebi ìkiweek ebek ugwem kwun̄ ekup kubọk Naban.

²⁷Mgbọ keyi, kpọ inyinyi kechi ke emi ogwu usun̄ kwun̄ enenwaan̄ nsa ijet owu, ibe esa eche enyi ebirieen̄ ebi ìkisi ikwaan̄ inyi owu.

²⁸Soso, tele nrọ-nlọ geelek emi ogwu usun̄ kwun̄ nrọbe nyi emi. Mije, me atikọ, Okumugwem mônyi owu, ogwukaan̄ n̄a, uwu òbokekeke inye, bak me lek ke îre akọn̄ Okumugwem ke owu okitim. Eya orọ, me otutuuk usen ugwem kwun̄, ìkagbe ibe ijo inu geege ikup me ugwem kwun̄.

²⁹“Ire ene inan̄a ikeke ikililaba owu, mè ikiweek isasan̄a ugwem kwun̄, owu ogwukaan̄ n̄a, Okumugwem Awaji kwun̄ ìbochichit ebek ugwem kwun̄ isun̄ me etete ebi ìkup me ugwem. Ire, me lek ebi ochicha kwun̄, Okumugwem ìbochechep ebek ugwem kiban̄ kubọk ewuuk etapbe me emen olik mgbọlọ, mè itọp ifiin̄, inyi ichep dìp dìp.

³⁰Me mgbọ Okumugwem isirọ otutuuk ata inu cha îchieekbe use òfo me lek kwun̄, owu ogwukaan̄ n̄a, mè inisa owu irọ ogwu mkpulu me Ijeren,

³¹kachieek ibe ifafiat eje ene me ikakaan̄ge ibot yi, mè ikpekpe ene useen̄ ijo inu yi inikana ukput mè inu ubọnọlek me ejit kwun̄ me mgbọ ya. Ogwukaan̄ n̄a, mgbọ Okumugwem isinirọ ata inu yi inyi owu, soso, kawuuk emi ogwu usun̄ kwun̄ enenwaan̄.”

³²Debit ofọfọọk Abigen ibe, “Itọn̄ ikup inyi Okumugwem, Awaji ebi Ijeren ogwu òraria owu inu, inyi owu ònochichini emi cherekeyi!

³³Kè Awaji igbana ata ifuk-ibot kwun̄, mè igbana owu si mije owu ogbanbe emi cherekeyi, inyi nkafiin̄ eje ene, mè nkasa ubọk n̄a ìkpe ene useen̄ ijo inu eyi ene orọbe emi.

³⁴Me atikọ, kè lek Okumugwem, Awaji ebi Ijeren, ogwu òkpukput emi, inyi nkasak owu unan me lek, mebe owu òkagwat lek ìnu ìnichichini emi, kpukpunu kubọk enerieen̄ ge ikeyi ogwu mosik iwele egwe me otutuuk uwu kè Naban!”

³⁵Debit onenibọkọ inyinyi cha ogwu enenwaan̄ ya osabe ijet ọmọ, mè initumu inyi ogwu enenwaan̄ ya ibe, “Gwu kom fo uwu kwun̄ me esuuk. Kpọ, nra igban̄ utọn̄ me ida kwun̄, mè irọ si ubọk owu obeekbe.”

³⁶Abigen onenigwu ikom ifo igọọk Naban, mè isi imun̄ ubọk Naban otobe ikpele ijọk me uwu kan̄ kubọk ijọk ebi ubọọn̄, mè ibele ejit, mè inwọ miin̄ isa enenen, mè idide. Mije keya, Abigen ìkatumu ikọ geege melek kan̄ ofolek ije ya mege ire mgbọ egwe owelebe.

³⁷Me ewelegwe, mgbọ miin̄ otabe Naban me chieen̄, Abigen ogwu nwa oneniben otutuuk inu cha òrọrọ ikpa inyi. Mgbọ Naban onọbe otutuuk inu cha, ejit kan̄ okekeke mgbọ yaage, ìkayaka ìfuk, ọmọ ochachiaak inye kubọk ewuuk.

³⁸Inu òbet lek akọp usen iraraka, Okumugwem osusulu Naban, ikwukwu.

³⁹Mgbọ Debit onọbe ibe ke Naban îkwu, itọtọn̄ Awaji ibe, “Itọn̄ ikup inyi Okumugwem, ogwu òtitim akọn̄ me ibot n̄a me lek unyechieen̄ mbọkọbe me ubọk kè Naban, mè isa me ikeya ikput emi ogwu usun̄ kan̄, inyi nkarọ ijo inu. Okumugwem îyaka ijo inu kè Naban itoon̄ Naban me ibot.” Debit oraria etip isi lek kè Abigen iweek imọmọnọ ọmọ ido me lek nwa.

⁴⁰Ebi osat kè Debit esasa etip ya isi ilook Abigen me Kamen, mè itumu inyi ibe, “Debit oria eji inu me lek kwun̄ ibe eji enesa owu ejet ọmọ, inyi owu ònore nwa kan̄.”

⁴¹Abigen ogegele igwook, mè ikana isi ichit me ijọn̄, mè itumu ibe, “Kpọ, emi gwun̄ usun̄ kwun̄ enenwaan̄ ire ogwu. Mbem lek isisi ikwaan̄ kubọk gwun̄ uwu, mè ibem si lek igwọgwọk ukot ebi ikwaan̄ ogwukaan̄ n̄a.”

⁴²Abigen ogwagwat lek inan̄a ikeke mgbọ yaage, mè inene inyọn̄ inyinya akpan kan̄, ọmọ melek ebibaan̄ go ìkisi ikwaan̄ inyi ọmọ, mè igọọk ebi osat kè Debit cha ije ifo, mè isi ikana nwa kè Debit.

⁴³Sabum mgbọ ya, Debit îwuuk lek ikaan̄ si Ayinowam ogwu Jesereli me lek nwa. Ema ebibaan̄ iba cha erere ebi nwa kè Debit.

⁴⁴Me ike mgbọ ya, Sọọlu îra isa Mikali ogwu gwun̄, òrere nwa kè Debit, inyi Paliti gwun̄ kè Layis ogwu ama Galim me lek nwa.