Read obolo I Sam 27 Bible Online

I Sam 27 - obolo bible

I Sam 27

¹Debit onenitumu me ejit kan̄ ibe, “Ire ǹkagbala chieen̄, mârọ ikeyi usen ge, mè irọn̄ inin̄ ubọk kè Sọọlu. Otutuuk ubọk mâkọtbe isa inwọnọ ìre ililibi isi itap ibot me ido ebi Filisia, inyi Sọọlu ikakọt ìweek emi ìmun̄. Mgbọ keya, Sọọlu môweek emi igak me otutuuk ido ebi Ijeren, ìkpomun̄ emi, efuuk môtata ọmọ me emen, môtetele emi ubọk me lek. Îre ikeya ke mbasa inwọnọ ọmọ.”

²Ikeyi ke Debit melek efit ene gweregwen ebi melek kan̄ eninan̄a me ido ebi Ijeren ilibi isaba isi ido ebi Filisia, mè isi itap ibot me ubọk kè Akis, gwun̄ kè Mayok, òrere ogwu ubọọn̄ ama Gat.

³Ikeya ke Debit oluk me ubọk kè Akis me Gat, ọmọ mè otutuuk ebi melek kan̄, ogwu ikup mè ototun̄ ukan̄ kan̄. Debit oluluk si melek ebi nwa iba kan̄, Ayinowam ogwu Jesereli, mè Abigen, nwakpa kè Naban ogwu ama Kamen.

⁴Mgbọ Sọọlu onọbe ibe ke Debit îlibi ifo Gat me ido ebi Filisia, Sọọlu otetele Debit, ìkayaka ìweek ọmọ ìgak ikeya.

⁵Debit onenitumu inyi Akis ibe, “Soso, ire okaan̄ ejit nsan me lek n̄a, nye lek week ere nyi emi me gwun̄ ama ge òdada ibọkọ me lek uga ama, inyi ǹsi ǹluk me ere ya, mije, ke ìkanwọn ibe emi ogwu usun̄ kwun̄ melek kwun̄ egbaan̄ eluk me ama ibot me mkpulu kwun̄.”

⁶Akis onenisa ama Sikilagi inyi Debit me usen yaage. Sa me ikeya ke Sikilagi osa ikana ama òkup inyi ebi ubọọn̄ ebi Juda mege inire cherekeyi.

⁷Debit îluk me ido ebi Filisia acha ge mè onyan̄ ini.

⁸Me ike mgbọ cha, Debit melek ebi kan̄ mîjibi akọn̄ isi itim me lek ebi Gesuru mè ebi Giriji mè ebi Amalek, ebi ìluk me inyọn̄ ijọn̄ ya karake ukot ikaan̄, ibene me Suru isi igwook me inyọn̄ ijọn̄ ebi Ijipiti.

⁹Ama geelek Debit mè ebi kan̄ ejibibe akọn̄ inin̄, ekikpakpan̄ otutuuk ebirieen̄ mè ebibaan̄ isan̄a kpai, kpekitele ene geege me ògat ugwem. Ema mîra inifum otutuuk arọọn̄ kiban̄ mè eriembuuk mè inyinya akpan mè aligọ, mè ikpulu si ekwut mè ofọnti igbaalek isa ifon. Ema isifum isan̄a, Debit îra inika igọọk Akis.

¹⁰Akis îra ido Debit ibe, “Ama owa ke ojibi akọn̄ inin̄ cherekeyi?” Usini mgbọ, Debit îra ifọọk ibe ke ọmọ ìsi èwê agan̄ osiki ido Juda. Ofifi mgbọ, îra ifọọk ibe ọmọ ìsi èwê agan̄ osiki ido ebi Jerameli. Ofifi mgbọ si, îra ifọọk ibe ke ọmọ ìsi èwê agan̄ osiki ido ebi Keyin.

¹¹Ama geelek Debit ojibibe akọn̄ inin̄, ìkakitele ene geege me ògat ugwem, inyi ene geege ikanan̄a ìnu me Gat ìnikpa inu ema erọbe. Ikeyi ke Debit mè ebi kan̄ ekirọ otutuuk mgbọ cha ema elukbe me etete ebi Filisia.

¹²Akis îtoon̄ Debit ejit me lek enenen, mè ikitumu me ejit kan̄ ibe, “Me atikọ, ebi Ijeren, òrere ebi kè Debit, mîra icha Debit enenen. Mgbọ keyi, ọmọ môkana ogwu usun̄ inyi emi ire mgbọ geelek.”