Read obolo I Sam 28 Bible Online

I Sam 28 - obolo bible

I Sam 28

¹Me emen mgbọ cha, ebi Filisia enenititiin̄ ebi akọn̄ kiban̄, mè ikibem lek isisi itim akọn̄ me lek ebi Ijeren. Akis onenitumu inyi Debit ibe, “Tet ibot, mè riọọn̄ ibe ke owu melek ebi kwun̄ mêgọọk emi isibi isi oyet akọn̄.”

²Debit onenifọọk Akis ibe, “Ire ikeya, owu mômun̄ inu emi ogwu usun̄ kwun̄ mbakọt irọ.” Akis otutumu inyi Debit ibe, “Ire ikeya, mâsa owu irọ ogwu òbokibem emi ire mgbọ geelek.”

³Me ike mgbọ ya, Samien îra ikwu, ebi Ijeren etoto ọmọ, mè iben ọmọ ifuun̄ me Rama, ama kan̄. Me ike mgbọ ya si, Sọọlu îra irieen̄ ebi nriran ekwukwu jom-jòm mè ebi yọk-ofia isan̄a me otutuuk ido ebi Ijeren.

⁴Ebi Filisia enenibem lek akọn̄, mè inirieen̄ akọn̄ me ama Sunem. Sọọlu si onenibem lek akọn̄, mè ititiin̄ otutuuk ebi akọn̄ Ijeren, mè inirieen̄ akọn̄ me Gilibowa.

⁵Mgbọ Sọọlu omun̄be ogbogbo urum akọn̄ ebi Filisia, ukpook otetet ọmọ enenen, owot ofefieek.

⁶Sọọlu oweweek nteme me ubọk Okumugwem. Ire, Okumugwem ìkafọọk ọmọ otu, mè ìre me mun̄umun̄ ilaak, mè ìre me lek ǹcha Urim, mè ìre me otu ebi nriran.

⁷Sọọlu otutumu inyi ebi ikwaan̄ kan̄ ibe, “Ìweek enenwaan̄ nriran ekwukwu jom-jòm ge ìnyi emi, inyi ǹsi lek kan̄ ǹsi ǹdo ido-inu me ubọk kan̄.” Ebi ikwaan̄ kan̄ etutumu inyi ọmọ ibe ke îkaan̄ enenwaan̄ ikwaan̄ ekwukwu jom-jòm ge òkup me ama Endọ.

⁸Sọọlu oneninwene lek, mè itap esese chieen̄ ofọnti, mè inisa ebi ikwaan̄ kan̄ ene iba igbaalek kan̄ ije me eririeen̄ isi lek ogwu enenwaan̄ ya, mè initumu inyi ibe, “Soso, sa ekwukwu jom-jòm kwun̄ do ido-inu nyi emi, mè gwen ekwukwu ene ge òkwukwu sibi nyi emi. Mâbak erieen̄ ene ya inyi owu.”

⁹Ogwu enenwaan̄ ya onenifọọk ibe, “Owu oriọọn̄ ijaan̄ lek ibe ke Sọọlu îrieen̄ otutuuk ebi nriran ekwukwu jom-jòm mè ebi yọk-ofia isan̄a me ido Ijeren. Ìre owu ònu ibonileke emi inyi ekpan̄?”

¹⁰Sọọlu onyanyan̄a ibot inyi ogwu enenwaan̄ ya me erieen̄ Okumugwem ibe, “Kè lek ugwem Okumugwem! Owu òkpobọkọ osusut geege mije inu keyi!”

¹¹Ogwu enenwaan̄ ya onenido ibe, “Ìre ekene ke oweek ibe emi ǹgwen ǹsibi ǹnyi owu?” Sọọlu ofọfọọk ọmọ ibe, “Gwen Samien sibi nyi emi.”

¹²Mgbọ ogwu enenwaan̄ ya omun̄be Samien, itataan̄ ukpo unye unye, mè itumu inyi Sọọlu ibe, “Ìre keke orọ mè owu òfiaan̄ emi ikeyi? Berebet owu ìre Sọọlu!”

¹³Ogwu ubọọn̄ Sọọlu otutumu inyi ogwu enenwaan̄ ya ibe, “Katet ukpook! Ìre keke ke omun̄?” Ogwu enenwaan̄ ya ofọfọọk ibe, “M̀mun̄ awaji[16] ge okinan̄a me emen ijọn̄ isibi inu.”

¹⁴Sọọlu ododo ibe, “Ìre awaji ya ìkukup?” Ogwu enenwaan̄ ya ofọfọọk ibe, “Îre oka enerieen̄! Ìtap uga ofọnti awudu ikana ichit lek, mè ikinan̄a isibi inu.” Sọọlu orọriọọn̄ ibe ke îre Samien, mè inigele igwook me ijọn̄, mè ikana isi kan̄ ichit, mè itọbọ ibot inyi ọmọ.

¹⁵Samien onenido Sọọlu ibe, “Ìre keke orọ osisaakbe emi ikeyi, mè igwen emi isibi inu?” Sọọlu ofọfọọk ọmọ ibe, “Emi ǹkup me emen ikpele uyọrọlek. Ebi Filisia mîjibi akọn̄ inu inenitim me lek n̄a. Awaji si ìkpọkpọ ijọn̄ọ emi ere me lek. Ìkafọọk emi otu geege, mè ìre me ida ebi nriran, mè ìre me mun̄umun̄ ilaak. Îre mije keya ke nnu inigwen owu, inyi owu òtumu ònyi emi inu mârọbe.”

¹⁶Samien onenifọọk Sọọlu ibe, “Ìre owu òbak me lek keke inu me lek n̄a, me ere Okumugwem ojitbe owu itele, mè iyaka inikana ogwu ochicha kwun̄?

¹⁷Okumugwem îra irọ inu ya eyi îtumube inyi owu inan̄a me otu n̄a iso. Okumugwem îra ibọkọ irek ubọọn̄ isan̄a owu me ubọk, mè isa ikana itap me ubọk ogwu melek kwun̄, òrere Debit.

¹⁸Îre mije owu okagban̄ge utọn̄ me ida Okumugwem, mè ìrọ inu îtumube ibe owu òrọ ebi Amalek me mgbọ Okumugwem onaan̄be ejit ikeme ema, eya orọ Okumugwem orọbe owu inu yi me lek cherekeyi.

¹⁹Okumugwem môkana owu melek ebi Ijeren itap me ubọk ebi Filisia, inyi akọn̄ irie enyi. Me iyakwut, owu melek bọn kwun̄ ebirieen̄ mêtele linyọn̄, mè inigọọk emi ikup me ere keyi. Okumugwem ìkpolọlọ ikakana ebi akọn̄ Ijeren itap me ubọk ebi Filisia, inyi ekpan̄ ema esan̄a.”

²⁰Sọọlu inọnọ ikọ cha Samien otumube, ukpook otetet ọmọ enenen, irọrọn̄ inyana me ijọn̄. Efuuk geege ìkayaka ìkup ọmọ me emen, mije, ìkarie inorie geege ototuuk egwe usen ya mè ototuuk eririeen̄ ya.

²¹Ogwu enenwaan̄ ya onunu me lek kè Sọọlu, mè inimun̄ ibe ke inu ya îsisik Sọọlu lek enenen. Inenitumu inyi Sọọlu ibe, “Kpọ, emi ogwu usun̄ kwun̄ mgban̄ utọn̄ me ida kwun̄, mè isa ugwem n̄a igwen inu ikike, mè irọ inu owu otumube ibe emi ǹrọ.

²²Eya orọ, mgbọ keyi, owu si nye lek gban̄ utọn̄ nyi emi ogwu usun̄ kwun̄, mè tele inyi ǹrọ sọntitiik inorie ǹnyi owu òrie òsa òtet owot, mè òkaan̄ efuuk òsa òje me oniin̄ òfo.”

²³Sọọlu ojijit, mè itumu ibe ke ọmọ ìkporie. Ire, ebi ikwaan̄ kan̄ egọgọọk ogwu enenwaan̄ ya iriaak Sọọlu ibe inye lek ibọkọ inorie irie. Sọọlu onenigban̄ ida kiban̄, mè inan̄a ikeke me ijọn̄, mè isiki ikweek irek me lek ikasi.

²⁴Ogwu enenwaan̄ ya îkaan̄ gwun̄ eriembuuk ge me uwu eyi îkigwook, inyi imin ufuk. Igwagwat lek ikpan̄ eriembuuk ya, mè initọ akpa ekọkọk igwa, mè isa irọ fituru kpunube olat me lek,

²⁵mè iben iniyik inyi Sọọlu mè ebi melek kan̄. Ema ererie, mè inan̄a ifon me eririeen̄ yaage.