Read obolo I Sam 3 Bible Online

I Sam 3 - obolo bible

I Sam 3

¹Sọn̄ gwun̄ enerieen̄ ya, Samien, okekisi ikwaan̄ inyi Okumugwem me irak ubọk kè Ilai. Me ukot mgbọ ya, etip ònan̄a me otu Okumugwem înan enenen. Ilaak ọkpọchieen̄ si ìkayaka ìwa.

²Usen ge, Ilai îsiki ilaak me ere îkilaak. Mgbọ ya, ọmọ îkan enenen, chieen̄ kan̄ si îdun, ìkayaka ìkimọọn̄ inu ìjaan̄.

³Me ike mgbọ ya, mkpukan̄ Awaji ìkaniin̄-nu. Samien si îsiki ilaak me emen Atanga Okumugwem ere okop inyan̄a-ibot Awaji okupbe.

⁴Okumugwem onenigwen Samien. Samien ochechieek ibe, “Kpọ emi gwu,”

⁵mè inan̄a ikeke jîp, mè ilibi isi lek kè Ilai, mè ibe ọmọ, “Ke owu ogwen emi, kpọ emi gwu.” Ilai ofọfọọk ọmọ ibe, “Ǹkagwen owu. Gwu kom si laak.” Samien ogwugwu ikom ije isi isiki ilaak.

⁶Okumugwem okpọkpọk igwen si, “Samien!” Samien onanan̄a ikeke, mè ilibi isi lek kè Ilai, me ibe, “Ke owu ogwen emi, kpọ emi gwu.” Ilai obebe ọmọ “Gwun̄ n̄a, ǹkagwen owu. Gwu kom si laak.”

⁷Me ike mgbọ ya, Samien ìkariọọn̄-nu Okumugwem, ìkawuwuuk lek si ìbọkọ-nu ikọ geege me otu Okumugwem.

⁸Okumugwem okpọkpọk igwen si Samien òso mgbọ ita. Samien onanan̄a ikeke si, mè ije isi lek kè Ilai, mè ibe ọmọ, “Ke owu ogwen emi, kpọ emi ire ogwu.” Mgbọ ya ke Ilai onitet ibot ibe ke îre Okumugwem okigwen gwun̄ ya.

⁹Inenitumu inyi Samien ibe, “Je si siki laak. Ire ida ya iyaka ikpọk igwen owu, tumu be, ‘Okumugwem tumu, ke ogwu usun̄ kwun̄ òkinọ.’ ” Samien onenigwu ikom ije isi isiki ilaak me ere kan̄.

¹⁰Okumugwem onunu inikeke, mè igwen si ike îkiwuuk lek igwen ibe, “Samien! Samien!” Samien ofọfọọk ibe, “Tumu, ke ogwu usun̄ kwun̄ òkinọ.”

¹¹Okumugwem onenitumu inyi Samien ibe, “Kpọ, emi mânirọ inu ge me Ijeren eyi môrọbe inyi utọn̄ ison ebi geelek mênọbe.

¹²Me usen ya, mârọ Ilai otutuuk inu cha geelek ntumube ikeme uwu kan̄, bene me ibebene re itata.

¹³Mwuuk lek itumu inyi Ilai ibe ke mâsibi oyerebet me ibot uwu kan̄ ire mgbọ geelek, mije ijo inu echi ọmọ oriọọn̄be. Ebi bọn mîsa ufieek-otu ijet lek kiban̄, Ilai omumun̄, ire, ìkakọt ìgana ere ìnyi ema.

¹⁴Eya orọ, emi nra inyan̄a ibot ibak uwu kè Ilai ibe ke ngwugwa geege, mè ìre echi ekiwọwọp mè ìre echi kpekiwọwọp, ìkpokọt irọ esuuk me ibot ijo inu ebi uwu kè Ilai, mege ire mgbọ geelek.”

¹⁵Samien olalaak mege iwele egwe, mè inichili isotu Uwu Mbuban Okumugwem. Ire, ìkakpa inu ya Okumugwem otumube inyi ọmọ ìnyi Ilai, mije ufieek-owot.

¹⁶Ire, Ilai onenigwen Samien, “Samien gwun̄ n̄a.” Samien ochechieek ọmọ ibe, “Kpọ emi ire ogwu.”

¹⁷Ilai ododo ọmọ ibe, “Ìre keke ke Okumugwem otumu inyi owu? Soso kalet inu ya me lek n̄a. Kè Awaji isulu owu osusut, mè isulu owu inaan̄ me lek, ire olet inu ge ikeyi me lek otutuuk inu cha geelek Okumugwem otumube inyi owu.”

¹⁸Ikeya ke Samien oniben otutuuk inu Okumugwem otumube inyi ọmọ ikpa inyi Ilai isan̄a kpai. Ìkalet inu geege. Ilai obebe, “Okumugwem ke ọmọ ore! Inu geelek ònwọnwọn me chieen̄ kan̄, irọ!”

¹⁹Samien okekimin, Okumugwem okukup melek kan̄. Ìkatele ibe ikọ geege Samien otumube ilọ irọrọ iso.

²⁰Otutuuk ebi Ijeren geelek, bene me Dan si re Bieseba, erọriọọn̄ ibe ke Samien ìre ogwu nriran Okumugwem ògbegbe utoon̄-ejit.

²¹Okumugwem okpọkpọ ikijeen̄ lek kan̄ me Silo, ere îchilibe lek kan̄ ijeen̄ Samien, sa me lek ikọ kan̄ îkitumu inyi Samien.