Read obolo I Sam 31 Bible Online

I Sam 31 - obolo bible

I Sam 31

¹Me ike mgbọ ya, ebi Filisia enenitim akọn̄ me lek ebi Ijeren. Ebi akọn̄ Ijeren elilim inan̄a me isi urum akọn̄ ebi Filisia. Owuwa ebi Ijeren ekwakwaan̄ irurọn̄ọ me inyọn̄ ogoon̄ Gilibowa.

²Ebi akọn̄ Filisia ekpọkpọ itet lek inye ikigọọk Sọọlu mè ebi bọn, mè ikpan̄ ebi bọn, Jonatan mè Abinadap mè Malikisuwa.

³Akọn̄ ya oneninye enenen me lek kè Sọọlu. Ebi ìkisook oraan̄ elilibi isoon̄ ọmọ, mè isook ọmọ itap uga unan me lek igbet mkpa.

⁴Sọọlu otutumu inyi ogwu òkiben nroon̄ akọn̄ kan̄ ibe, “Wọọk oge akọn̄ kwun̄ sa chim emi kpan̄, inyi ebi Filisia chi, ife ekafieekge afi, ekanirọ emi inu ochak.” Ire, ogwu òkiben nroon̄ akọn̄ kan̄ ya ìkachieek, mije ukpook îtet ọmọ enenen. Eya orọ, Sọọlu omọmọnọ oge akọn̄ òkup ọmọ me ubọk iyaka igwuun̄ me lek kan̄, mè inan̄a irọn̄ ikeme, mè isa me ikeya ikpan̄ lek kan̄.

⁵Mgbọ ogwu òkiben nroon̄ akọn̄ ya omun̄be ibe ke Sọọlu îkwu, ọmọ si owọwọọk oge akọn̄ kan̄ iyaka igwuun̄ me lek kan̄, mè inan̄a irọn̄ ikeme, mè igọọk ogwu nte uwu kan̄ igbaan̄ ikwu.

⁶Sa me ikeya ke Sọọlu melek ibot bọn ebirieen̄ ita kan̄, mè ogwu òben nroon̄ akọn̄ kan̄, mè otutuuk ebi akọn̄ kan̄ ekwaan̄ ita me usen yaage.

⁷Mgbọ ebi Ijeren ebi ìluk me usaba agan̄ iteke ijọn̄ Jesereli mè ebi ìluk me usaba okwaan̄ Jodan emun̄be ibe ke ebi akọn̄ Ijeren mîliliin̄ isan̄a me isi akọn̄, mè imun̄ si ibe ke Sọọlu mè ebi bọn mîkwaan̄, ema enanan̄a itele ama kiban̄, mè ililiin̄ iweek ere itap ibot. Ebi Filisia enunu, mè ininin̄ emen ama cha iluk.

⁸Me ofit iwele, mgbọ ebi Filisia enube ibenigbala inu òkup me lek nkwukwu ebi ìkwakwaan̄ me isi akọn̄ cha, ema emumun̄ nkwukwu kè Sọọlu mè echi bọn ebirieen̄ ita kan̄ elilambe me inyọn̄ ogoon̄ Gilibowa.

⁹Ebi akọn̄ Filisia efefieek ibot kè Sọọlu, mè ikpulu si otutuuk nroon̄ akọn̄ kan̄, mè iniria ebi osat ibe esi elook etip mkpa kè Sọọlu mè ntim-mkpan̄ ema etimbe ikpan̄ ebi Ijeren ekana me otutuuk ido Filisia me isi yọk me isi yọk, mè elook si ekana me etete otutuuk ebi kiban̄.

¹⁰Ema ebeben nroon̄ akọn̄ kè Sọọlu cha isa isi isun̄ me isi awaji kiban̄ ekigwen Asitoret, mè iniben ekirikit lek kan̄ isa isi igon ikam me lek mgban ama Bet San.

¹¹Mgbọ ebi ama Jabes òkup me agan̄ Giliadi enọbe etip inu ebi Filisia erọbe Sọọlu,

¹²otutuuk ebirieen̄ ebi ìriọọn̄ ukot akọn̄ me ama Jabes enanan̄a me eririeen̄ ya, mè ije otutuuk eririeen̄ ya isi ama Bet San, mè isi ijene nkwukwu kè Sọọlu mè nkwukwu ebi bọn me lek mgban ama ya, mè isa ika inu me Jabes, mè initap ukan̄ iwọp.

¹³Enenikpulu ukwuuk kiban̄ isa isi ifuun̄ me irak uti tamaris ge òkup me ama Jabes ya, mè inin̄ ijin-otu ufieejit inyi ema otuuk kè usen jaaba.