Read obolo I Sam 4 Bible Online

I Sam 4 - obolo bible

I Sam 4

¹Ikọ geelek Samien okitumu okekikana ire lek otutuuk ebi Ijeren. Otutuuk ebi Ijeren enenijibi akọn̄ isi ichichini melek ebi Filisia. Ebi Ijeren enenirieen̄ akọn̄ kiban̄ me Ebenija, sà ebi Filisia erieen̄ eyi kiban̄ me Afek.

²Ebi Filisia eneniche lek kiban̄ ikana, mè ijibi akọn̄ inin̄ lek ebi Ijeren. Akọn̄ obubumu. Ubọk kiban̄ oneninye igak eyi ebi Ijeren. Ebi Filisia ekpakpan̄ iso obop ene ini me etete ebi Ijeren me isi akọn̄ ya.

³Mgbọ ebi akọn̄ ebi Ijeren ekabe inire orieen̄ akọn̄ kiban̄, ebi ugane ebi Ijeren ekekidido ibe, “Iyak, Okumugwem ìjeje ida ebi Ijeren itap me ubọk ebi Filisia, inyi akọn̄ ifieek eji ikeyi?” Ngwa, eji enesi Silo esi eben okop inyan̄a-ibot Okumugwem esa enu, inyi inikup me etete kiji, mè inyan̄a eji isibi me ubọk ebi ochicha kiji.

⁴Ema eraria ene isi Silo, mè isa okop inyan̄a-ibot Okumugwem Ogwukaan̄ Inyọn̄ mè Ijọn̄, ogwu òkweek irek me etete ebi mbem emen inyọn̄ iba, inu. Ofini mè Fineyas, bọn ebirieen̄ iba kè Ilai egọgọọk si okop inyan̄a-ibot ya inu.

⁵Mgbọ esabe okop inyan̄a-ibot Okumugwem ya inu inire orieen̄ akọn̄ ebi Ijeren, ebi Ijeren edidimi ukpo unwọọn̄, mè itiki igwook. Ijọn̄ ere ya osisisik enenen.

⁶Ebi Filisia enọnọ ida ukpo kiban̄ ya, mè ikidido ibe, “Ìre kpasi uga ukpo ire eyi òkitaan̄ ikeyi me orieen̄ akọn̄ ebi Iburu?” Ema eneniweek iriọọn̄ ibe ke îre okop inyan̄a-ibot Okumugwem ke esa inu me orieen̄ akọn̄ ebi Ijeren.

⁷Owot ofefieek ebi Filisia enenen, ema ekekitumu ibe, “Ebi kè awaji mîra inu me emen orieen̄ akọn̄ ebi Ijeren,” mè ikibe, “Jei, eyi kiji îta! Mije, ojelek inu òkup ikeyi ìkawuwuuk lek ìrọ.

⁸Jei, eji mîchep! Ìre ekene oboninyan̄a eji isibi me ubọk ebi kè awaji kechi ìnyenye lek ikeyi? Îre ebi kè awaji chi esa chieen̄ ijo orukan̄ geelek itim akọn̄ ijijaka ebi Ijipiti isan̄a kpai me emen èwê!

⁹Ebi Filisia, ìtet lek inye! Ìta ukpook me lek ìtim akọn̄ kubọk ebirieen̄, inyi enyi ekakana usun̄ ìnyi ebi Iburu kubọk ema ewuukbe lek ire usun̄ inyi enyi! Ìtet lek ìnye kubọk ebirieen̄! Ìkat ejit ìtim akọn̄!”

¹⁰Eya orọ, ebi Filisia etetet lek inye, mè itim akọn̄ ya, mè itim ikpan̄ ebi Ijeren. Ebi Ijeren elilim, ogwu ikup, olibi ofo uwu ọfọ kan̄. Ebi Filisia ekpakpan̄ ebi Ijeren ogbogbo. Akọp obop ene ita me lek ebi akọn̄ ebi Ijeren ebi ìkije ukot ukot ekwaan̄ me emen akọn̄ ya.

¹¹Ìkayaka me ikeya gaalek, ebi Filisia ebọbọkọ si okop inyan̄a-ibot Okumugwem ya. Akọn̄ ya si orerie Ofini mè Fineyas, ibot bọn ebirieen̄ iba kè Ilai, igbaalek.

¹²Me usen yaage, ogwu akọn̄ ge ogwu owot iman kè Benjamin onanan̄a me isi akọn̄ ilibi ekot ekot inu me Silo. Îtaba ofọnti òkup ọmọ me lek igwak, mè ikpulu achiaan̄ ijọn̄ igwook me ibot.

¹³Me mgbọ ogwu enerieen̄ ya orebe ama, Ilai ìsiki ikweek me inyọn̄ ikasi me agba oniin̄, mè ikifieek ejit mije okop inyan̄a-ibot Okumugwem ya. Mgbọ ogwu enerieen̄ ya obenbe ukpatu akọn̄ ya ikikpa me emen ama, ama ofafan̄a, ida ukpo ito okekitaan̄ me otutuuk emen ama.

¹⁴Ilai onọnọ ubọk ama ofan̄abe, mè ikido ibe mè ìre keke orọ ida ogbogbo ene okitaan̄ ikeyi ye? Ogwu enerieen̄ ya òsasa etip ya inu ogwagwat lek inu inikpa inu ya òrọrọ inyi Ilai.

¹⁵Me ike mgbọ yi, Ilai ìre akọp acha onaan̄ge me jeeta, chieen̄ kan̄ ìkikpọ ere kpoo, ire, ìkayaka ìkimọọn̄ inu.

¹⁶Ogwu enerieen̄ ya onenitumu inyi Ilai ibe, “Emi nre ene ya ogwu ònan̄a me isi akọn̄ inu. Emi ǹlilibi inan̄a me isi akọn̄ me cherekeyi.” Ilai ododo ọmọ ibe, “Gwun̄ n̄a, kpa nyi emi nu, ìre keke orọ?”

¹⁷Ogwu enerieen̄ ya onenikikpa inyi Ilai ibe, “Ebi Ijeren kpekọkọt ikeke ida ebi Filisia. Ema elilim inan̄a me isi akọn̄. Ebi Filisia mîkpan̄ ebi Ijeren itutọmọ me ijọn̄. Ofifi kan̄, akọn̄ îrie si bọn ebirieen̄ iba kwun̄, Ofini mè Fineyas. Ògak ge, ebi Filisia mîbọkọ okop inyan̄a-ibot Awaji.”

¹⁸Mgbọ yaage ogwu enerieen̄ ya otumube ikọ ibak okop inyan̄a-ibot Awaji, Ilai obebeke inan̄a me inyọn̄ ikasi ya irọn̄ udun̄ udun̄ me agba otunchit ya. Ebek kan̄ ofafan̄a, ikwukwu, mije, ọmọ îkan, mè imin ufuk enenen. Ilai îkpulu ebi Ijeren kubọk ogwu oyerebet akọp acha ini sabum înikwu.

¹⁹Me ike mgbọ ya, owot îmin me lek nwa kè Fineyas ogwu gwun̄, mè igbet mgbọ ìboman gwun̄. Mgbọ ogwu enenwaan̄ ya onọbe ibe ke ebi Filisia mîtet okop inyan̄a-ibot Awaji ibọkọ, mè inọ si ibe ke nte nlom kan̄ melek nlom kan̄ mîkwaan̄, uman obebene itet ọmọ unye unye me ugeen̄ mgbọ. Imaman gwun̄.

²⁰Mgbọ mkpa orebe ogwu enenwaan̄ ya chieen̄, ebi uman ìkikpọ ọmọ chieen̄ me lek enenibe ọmọ, “Kafieek owot, ke îre gwun̄ enerieen̄ ke owu oman!” Ire, ogwu enenwaan̄ ya ìkakọt ìnyi utọn̄ me lek ikọ kiban̄, ìkabọbọkọ si ema otu.

²¹Ogwu enenwaan̄ ya onenisa me chieen̄ mkpa inyi gwun̄ ya erieen̄, “Ikabodu”[3] mije, ìbe ke ujamgbugbo Awaji îsibi itele Ijeren. Ogwu enenwaan̄ ya ìtumu ikeya mije ebọkọbe okop inyan̄a-ibot Awaji me isi akọn̄, igbaalek mkpa nte nlom kan̄ melek nlom kan̄ ekwaan̄be.

²²Ogwu enenwaan̄ ya otutumu ibe, “Ujamgbugbo eyi Awaji îsibi itele Ijeren, mije, mîbọkọ okop inyan̄a-ibot Awaji.” Òta me otu, ikwukwu.