Read obolo I Sam 5 Bible Online

I Sam 5 - obolo bible

I Sam 5

¹Ebi Filisia eneniben okop inyan̄a-ibot Awaji ya isa inan̄a me Ebenija ifo Asidọdu,

²mè iben itap me emen uwu awaji kiban̄ ekigwen Dagọn, mè iyik me agba lek mkpọmfaka Dagọn.

³Me ofit iwele kan̄, mgbọ ebi Asidọdu enan̄abe ikeke me ata otu ewelegwe, ema enimun̄ Dagọn orọn̄be inyana me ijọn̄ ikana isi ikwuun̄ me isi okop inyan̄a-ibot Okumugwem. Ema ebebene Dagọn igwuun̄ me irek kan̄.

⁴Me ata otu ewelegwe usen ògọgọọk, ema emumun̄ si Dagọn okpọkbe inan̄a irọn̄ me ijọn̄ inyana me isi okop inyan̄a-ibot Okumugwem. Ire, mgbọ keyi, ibot kan̄ mè ubọk iba kan̄ îfaan̄ inan̄a, mè isi ikup me inyọn̄ isotu uwu ya. Ekirikit kan̄ gaalek onikup.

⁵Mije keya, ebi ìkigwa ngwugwa inyi Dagọn mè ebi geelek ìkinu uwu kè Dagọn kpekijak ukot me inyọn̄ isotu uwu kè Dagọn me Asidọdu mege inire cherekeyi.

⁶Okumugwem osusulu ebi Asidọdu ikpele osusut, mè ijijaka ema, mè isa ijo orukan̄ nkwukwuun̄ itap ijot ema lek, mè itap si ire lek ebi ìluluk ikana ama ya.

⁷Mgbọ ebi Asidọdu emun̄be inu ya okirọ, ema etutumu ifieek ibe ke okop inyan̄a-ibot Awaji ebi Ijeren ìkpoyaka ikup melek kiban̄, mije, ke Awaji ebi Ijeren îsulu ema osusut ikpele ikpele, mè isulu si Dagọn awaji kiban̄ igbaalek.

⁸Ema eraria osat igwen ebi ubọọn̄ ebi Filisia ititiin̄, mè inido ema ibe, “Ìre keke ke eji eberọ me lek okop inyan̄a-ibot ebi Ijeren yi?” Ife cha efọfọọk ibe, “Ìsan̄a okop inyan̄a-ibot Awaji ebi Ijeren ya ìkana ìfo Gat ìsi ìsun̄.” Ikeya ke eniben okop inyan̄a-ibot ebi Ijeren isa isi iyik me Gat.

⁹Ire, okop inyan̄a-ibot Awaji irere Gat, Okumugwem osusulu si ebi ama keya nga osusut ile. Ikpele wọlọwọlọ oninin̄ ama. Okumugwem îsulu ebi ama ya osusut ibene me lek ebi ijija ire lek ebi ilile, mè ikpọk ijo nkwukwuun̄ igwook me lek otutuuk ebi ama ya.

¹⁰Enenisan̄a okop inyan̄a-ibot Awaji ya isibi me ama ya, mè isa iniyik me Ekurọn. Mgbọ ebi Ekurọn emun̄be esabe okop inyan̄a-ibot ya inin̄ ama kiban̄, ema ebebene ikitaan̄ ukpo itumu ibe, “Ìkpọ, mîsa okop inyan̄a-ibot Awaji ebi Ijeren inu, inyi inikpan̄ eji mè ebi kiji isan̄a.”

¹¹Eya orọ, enenigwen ebi ubọọn̄ Filisia ititiin̄. Ife cha ebebe eria okop inyan̄a-ibot Awaji ebi Ijeren egwu ekom ejet ebikaan̄ me ere înan̄abe, inyi ikakpan̄ ema mè ebi kiban̄ ìsan̄a. Me ike mgbọ ya, wọlọwọlọ mkpa îwuuk lek ininin̄ otutuuk emen ama ya, Awaji îwuuk lek ibene ikisulu ebi ama ya ikpele osusut.

¹²Ebi ìkwakwaan̄ mêkikwaan̄. Ebi kpekwaan̄ mîkaan̄ ijo nkwukwuun̄ ijot lek. Ida ukpo ufialek ebi ama ya otataan̄ ire emen inyọn̄.