Read obolo I Sam 7 Bible Online

I Sam 7 - obolo bible

I Sam 7

¹Ebi ama Kiriat Jiarim enunu iniben okop inyan̄a-ibot Okumugwem ya isa ika inu ama kiban̄, mè isa inisun̄ me uwu kè Abinadap me inyọn̄ orioon̄, mè inigwọk lek ogwu gwun̄ enerieen̄ ge ekigwen Elieja, inyi ikikpọ chieen̄ me lek okop inyan̄a-ibot Okumugwem ya.

²Okop inyan̄a-ibot Okumugwem ya îkup me Kiriat Jiarim ifiin̄ iso akọp acha iba. Me otutuuk mgbọ ya, ebi Ijeren ekekifieek ejit, mè ikito ito iweek Okumugwem.

³Samien onenitumu inyi otutuuk ebi Ijeren ibe, “Ire enyi iweek igwugwu ikom inu me lek Okumugwem me otutuuk ejit kinyi, ìsan̄a awaji ebi ofifi ido cha mè ebi kè Asitoret[5] cha ìsan̄a me etete kinyi, mè ìnen̄e ejit kinyi ìsun̄ ìnyi Okumugwem, mè ìsi ikwaan̄ ìnyi ọmọ gaalek, ke ọmọ mônyan̄a enyi isibi me ubọk ebi Filisia.”

⁴Ebi Ijeren ekpukpulu ebi kè Baali mè Asitoret cha itọọn̄ ifiin̄, mè ikitọbọ ebum inyi Okumugwem gaalek.

⁵Samien oneninyi ida ibe otutuuk ebi Ijeren esi etitiin̄ me Mijipa, inyi ọmọ inibeek Okumugwem mbeek me ibot kiban̄.

⁶Otutuuk ebi Ijeren enenisi ititiin̄ me Mijipa, mè inichibi mudim igwook me ijọn̄ me isi Okumugwem kubọk ngwugwa, mè ijin otu ototuuk egwe usen ya, mè itumu ibe ke ema mîrọ Okumugwem ijo inu. Samien onenikisibi oyerebet inyi ebi Ijeren me Mijipa.

⁷Mgbọ ebi Filisia enọbe ibe ke ebi Ijeren mîtitiin̄ me Mijipa, ebi ubọọn̄ kiban̄ ebeben akọn̄ inu me lek ebi Ijeren. Mgbọ ebi Ijeren enọbe ibe ke ebi Filisia mîjibi akọn̄ inu me lek kiban̄, ukpook otetet ema enenen mije ebi Filisia.

⁸Ema etutumu inyi Samien ibe, “Soso, kariaan̄ ere, kpọkpọ kitaan̄ ukpo kibeek Okumugwem Awaji kiji mbeek me ibot kiji, inyi ininyan̄a eji isibi me ubọk ebi Filisia.”

⁹Samien onenitet gwun̄ arọọn̄ ge òkup me otu ebe ikpan̄, mè iwọp ototuuk itaka iriọk isa igwa ngwugwa ewọwọp iriọk inyi Okumugwem, mè initaan̄ ukpo igwen Okumugwem me ibot ebi Ijeren. Okumugwem ofọfọọk otu uriaak kan̄.

¹⁰Samien òkigwa ngwugwa ya me ubọk, ebi Filisia ekakana isibi ibenitim akọn̄ me lek ebi Ijeren. Ire, Okumugwem oraria isinyọn̄, isosook me ikpele unye ida, mè itap ebi Filisia belebele, ema eliliin̄ ibubeek me isi ebi Ijeren.

¹¹Ebi Ijeren ejijibi inan̄a me Mijipa isibi inu, mè irieen̄ ebi Filisia, mè ikpan̄ ema mege isi igwook me iteke ijọn̄ agba lek ama Bet Ka.

¹²Samien obebene ewuuk ge igwuun̄ me etete Mijipa mè Sen, mè inyi erieen̄ Ebenija,[6] mè itumu ibe, “Mege inire mgbọ keyi, Okumugwem îtap ubọk inyi eji!”

¹³Sa me ikeyi ke ebi Ijeren etim akọn̄ ikpan̄ ebi Filisia. Ema kpeyaka inu akọn̄ me otubọk ijọn̄ ebi Ijeren igak ikeya. Okumugwem osasa unye ubọk kan̄ ikeme ebi Filisia isiki otutuuk mgbọ Samien okupbe me ugwem.

¹⁴Ebi Filisia eneniyaka otutuuk ama ema ebọkọbe me ubọk ebi Ijeren ikana inyi ebi Ijeren, bene me Ekurọn si re Gat. Ebi Ijeren ebọbọkọ otutuuk ijọn̄ kiban̄ isan̄a me ubọk ebi Filisia. Esuuk okukup si me etete ebi Ijeren melek ebi Amọ.

¹⁵Samien okekikpulu ebi Ijeren kubọk ogwu oyerebet mege ire òta usen ugwem kan̄.

¹⁶Me acha me acha, Samien îra ikijijen̄e ikana me Beten mè Giligan mè Mijipa, mè ikisibi oyerebet inyi ebi Ijeren me otutuuk ama chi.

¹⁷Isijijen̄e ikana ikeya isan̄a, îra ikiyaka igwu ikom ika inu me Rama, mije, îre ama ya ke uwu kan̄ okup. Me Rama si ke îkikup ikikpulu ebi Ijeren. Îre si me Rama ke înama ntook ngwugwa inyi Okumugwem.