Read obolo I Sam 9 Bible Online

I Sam 9 - obolo bible

I Sam 9

¹Îkaan̄ ogwu enerieen̄ ge, ogwu Benjamin, ogwu òbọbọọn̄ ubọọn̄, mè isibi isi enenen. Erieen̄ ogwu enerieen̄ ya ìre Kis. Ọmọ ìre gwun̄ kè Abiyen, gwun̄ kè Sero, gwun̄ kè Bekorat, gwun̄ kè Afia ogwu otoko kè Benjamin.

²Kis îbon gwun̄ enerieen̄ ge ekigwen Sọọlu. Sọọlu ìre gwun̄ enerieen̄ òjajaan̄ uja enenen. Me etete nsabọn irieen̄ ebi Ijeren, kpunu ogwu òjajaan̄ uja isoon̄ ọmọ. Ọmọ si ojọn̄ọ ichit me etete otutuuk ebi ido Ijeren.

³Me ike mgbọ ge, usini me lek uman inyinya akpan kè Kis enenigak ichep. Kis onenigwen Sọọlu ogwu gwun̄, mè inibe ọmọ, “Soso, sa ene ge me etete ebi ikwaan̄ kiji gbaalek kwun̄ je si week anam cha tet sa na.”

⁴Sọọlu mè ogwu ikwaan̄ ya eneninan̄a, mè ije itibi inyọn̄ ijọn̄ ogoon̄ ogoon̄ otoko kè Iferem, mè ikana isi igwook me agan̄ Salisa. Ire, kpemun̄ anam cha. Ema enenije isi itibi agan̄ Sayalim, ire, kpemun̄ si anam cha. Ema ejeje itibi otubọk ijọn̄ ebi otoko kè Benjamin, ire, kpemun̄ si anam cha me agan̄ ya.

⁵Mgbọ ema ejebe inire agan̄ ijọn̄ Sufu, Sọọlu onenitumu inyi ogwu ikwaan̄ kan̄ ya ibe, “Eji enegwu ekom efon, inyi nte n̄a ikatele ekiket ofolek anam cha, mè ìyaka ìnibene ìkifieek owot mije kiji.”

⁶Ire, ogwu ikwaan̄ kan̄ ya onenitumu inyi ọmọ ibe, “Îkaan̄ ogwu ikwaan̄ Awaji ge òkup me ama yi, ogwu otutuuk ene ekinyi ulibi. Inu geelek îtumube ìkirọrọ iso. Eji enesi eweek ogwu enerieen̄ ya. Usini mgbọ, ọmọ môkọt iteme eji ere eji mêkọtbe isi imun̄ inyinya akpan cha.”

⁷Ire, Sọọlu obebe ọmọ, “Ire eji isi, ìre keke ke eji ebekaan̄ me ubọk isa isi imun̄ ogwu enerieen̄ ya ni? Inorie òkup me emen akpa kiji îta. Eji kpekaan̄ inu geege ebesa inyi ogwu ikwaan̄ Awaji ya. Kpọ-nu mè ìre îkaan̄ inu òkukup?”

⁸Ogwu ikwaan̄ kan̄ ya onenikpọk ifọọk ọmọ ibe, “Nkaan̄ gwun̄ ikpoko alata okuket ge.[7] Mâkọt isa inyi ogwu ikwaan̄ Awaji ya, inyi iteme eji ere eji mêkọtbe isi imun̄ inyinya akpan cha.”

⁹Me mgbọ ukot ikaan̄ me Ijeren, ogwu isiweek isisi inọ ida Awaji òfo me lek inu geelek, ekitumu ibe, “Ìna eji esi lek ogwu òmọọn̄ inu,” mije, ebi ekigwen ebi nriran me ukot keyi, me ukot mgbọ ya, ebi ene ekigwen ema ebi ìmọọn̄ inu.

¹⁰Sọọlu onenitumu inyi ogwu ikwaan̄ kan̄ ya ibe, “Ikọ kwun̄ îtop. Ngwa, eji eneje.” Ema enenije isi ama ya ere ogwu ikwaan̄ Awaji ya okupbe.

¹¹Mgbọ ema ekije inene orioon̄ ibenin̄ ama ya, ema enenichichini nsabọn ibaan̄ ebi ìkinan̄a me ama ya isibi ibesi ichibi mudim, mè inido nsabọn ibaan̄ cha ibe, “Ìre ogwu òmọọn̄ inu ya ìkup me ama kinyi?”

¹²Nsabọn ibaan̄ cha efọfọọk ibe, “Iin̄. Kpọ ọmọ ire ogwa òkije me isi kinyi. Ìgwat ukot ìje. Îre mgbọ keyi mgbọ keyi ke înu ama kiji, mije, ebi ama kiji mîkaan̄ ngwugwa ebegwa me ere mbuban chereyi.

¹³Enyi isijeje inin̄ emen ama, enyi mêmun̄ ọmọ sabum ìbosi ere mbuban ere ìborie inorie. Mije, ire ọmọ ìkanu, ebi ichen ebi egwenbe kpeberie inorie. Bak me lek, îre ọmọ obogbana inorie ngwugwa ya sabum eberie. Eya orọ, ìsaba ukot ìje, inyi enyi ekọt emun̄ ọmọ sabum ọmọ môninin̄ emen mfaka ya.”

¹⁴Ema enenikije inene isi ama ya. Ike ema ekije inin̄ emen ama ya, ema ekpọkpọ inichichini Samien okije ikweek ema me oniin̄ iboraka isi ere mbuban ya.

¹⁵Me iyakwut òraraka, Okumugwem îwuuk lek ichili inu ya òborọ ijeen̄ Samien, mè itumu inyi ibe,

¹⁶“Me ike mgbọ keyi me iyakwut òbowele, mâria ogwu enerieen̄ ge, ogwu otoko kè Benjamin ijet owu. Isinu, tọkọ ọmọ aran̄ me ibot sa rọ ọmọ ogwu ibot mkpulu ogwu òbokikpulu ebi n̄a ebi Ijeren, inyi ininyan̄a ebi n̄a isibi me ubọk ebi Filisia. Mije, nra imun̄ ufialek ebi n̄a ekibọkọ, mè inọ si ida ito kiban̄.”

¹⁷Mgbọ yaage chieen̄ kè Samien okanabe itoon̄ me lek kè Sọọlu, Okumugwem otutumu inyi Samien ibe, “Kpọ ogwu enerieen̄ ya ire ogwu, ogwu ntumube inyi owu ibe ìre ọmọ obonikikpulu ebi n̄a.”

¹⁸Sọọlu onenije igọọk Samien me emen otunchit ama ya, mè inido ọmọ ibe, “Soso, ìre uwu owa ke ogwu òmọọn̄ inu ya oluk?”

¹⁹Samien ofọfọọk ọmọ ibe, “Emi nre ogwu òmọọn̄ inu ya. Je me isi n̄a, inyi eji esi ere mbuban. Cherekeyi, enyi mêgọọk emi igbaan̄ irie inorie, mè igọọk emi ilaak si iwele egwe sabum enyi menifo. Otutuuk inu geelek òkup owu me ejit, mâtumu inyi owu.

²⁰“Ire me lek inyinya akpan cha òchechieen̄ usen ita òraraka, kayaka ìsisaak ejit kwun̄ me lek, mije, mîra iweek ema imun̄. Ire, ìre ekene ene ire ogwu ebi Ijeren ekiweek uyọt uyọt mgbọ keyi? Ìre ìkare owu melek uwu kè nte kwun̄?”

²¹Sọọlu ofọfọọk ọmọ ibe, “Emi ìre ogwu otoko kè Benjamin, òrere otoko òsisip ichit me etete otutuuk otoko ebi Ijeren. Ototun̄ ukan̄ kè nte n̄a si ore ototun̄ ukan̄ òsisip ichit me otutuuk otoko kè Benjamin. Owu òjeje initumu ojelek ikọ òkup ikeyi inyi emi?”

²²Samien osasa Sọọlu melek ogwu ikwaan̄ kan̄ initap me emen uwu ere ebi ichen ebi egwenbe cha ekweekbe irek, mè inisa ema isi inyi irek me ibot ikasi ere otutuuk ife cha ekweekbe. Ebi ichen ebi egwenbe cha mîso akọp ebirieen̄ ita.

²³Samien onenitumu inyi ogwu òkitem inorie me ere ya ibe, “Sa okpọkọ anam ya, eyi ntumube ibe owu òsan̄a òsun̄ esese ya, na.”

²⁴Ogwu òkitem inorie ya obeben ototuuk ukot anam ge melek inu òje me lek isa iniyik me inyọn̄ ikasi me isi kè Sọọlu. Samien onenitumu inyi Sọọlu ibe, “Kpọ, inorie esun̄be inyi owu ire eya eyikbe me isi kwun̄. Rie, ke esusun̄ inorie keyi inyi owu me lek orirọ keyi bene me karake nkitọt igwegwen ebi ichen chi.” Sọọlu ogọgọọk Samien igbaan̄ ikweek irie inorie me usen ya.

²⁵Mfaka ya itata, Samien melek kè Sọọlu enanan̄a me ere mbuban ama ya isibi ifo uwu kè Samien. Samien osasa Sọọlu inene isi ikup me inyọn̄ otoon̄-uwu kan̄, mè itumu ikọ melek kan̄ me ere ya.

²⁶Me agan̄ egwe, Samien ogwegwen Sọọlu me inyọn̄ otoon̄-uwu ya, mè itumu inyi ibe, “Nan̄a keke, mè ǹsa owu m̀ban me oniin̄ ije kwun̄.” Sọọlu onanan̄a ikeke. Ema ene iba enenisibi ijọn̄, mè ije isibi lek oniin̄.

²⁷Mgbọ ema ejebe ire okputut ama ya, Samien onenitumu inyi Sọọlu ibe, “Tumu nyi ogwu ikwaan̄ kwun̄ ibe ije iraka ifo isi, mè owu keke sọnja, inyi ǹlook owu etip ònan̄a me ubọk Awaji.” Ogwu ikwaan̄ kè Sọọlu ya ojeje iraka ifo isi.