Read Papantla Totonac Genesis 1 Bible Online

Genesis 1 - Papantla Totonac bible

Genesis 1

¹Na prinsipio Dios a krea e shelunan i tera.

²I tera tabata sin forma i bashi i tabatin skuridat riba superfisio di e abismo. I e Spiritu di Dios tabata move riba superfisio di e awanan.

³E ora ei Dios a bisa: "Laga tin lus." I tabatin lus.

⁴I Dios a mira ku e lus tabata bon, i Dios a separa e lus for di e skuridat.

⁵I Dios a yama e lus Dia i e skuridat El a yama Nochi. I tabata atardi i tabata mainta: e prome dia.

⁶E ora ei Dios a bisa: "Laga tin un firmamentu meimei di e awanan, i laga esei separa e awanan for di e awanan."

⁷I Dios a traha e firmamentu, i a separa e awanan ku tabatin bou di e firmamentu for di e awanan ku tabatin ariba di e firmamentu; i asina tabata.

⁸I Dios a yama e firmamentu Shelu. I tabata atardi i tabata mainta: e di dos dia.

⁹E ora ei Dios a bisa: "Laga e awanan ku tin bou di e shelunan bin huntu na un luga i laga tera seku parese"; i asina tabata.

¹⁰I e parti seku Dios a yama Tera, i tur e awanan ku a bin huntu El a yama Lamannan. I Dios a mira ku esaki tabata bon.

¹¹E ora ei Dios a bisa: "Laga tera produsi vegetashon, mata ku ta duna simia i palu di fruta ku ta duna fruta segun su sorto, ku simia den nan, riba tera"; i asina tabata.

¹²Anto tera a produsi vegetashon, mata ku ta duna simia segun su sorto, i palu ku ta duna fruta, ku simia den nan, segun su sorto; i Dios a mira ku esaki tabata bon.

¹³I tabata atardi i tabata mainta: e di tres dia.

¹⁴E ora ei Dios a bisa: "Laga tin lusnan na e firmamentu di e shelunan pa separa dia for di nochi, i laga nan sirbi komo senalnan i pa temporadanan di ana, i pa dianan i ananan;

¹⁵i laga nan ta lusnan na e firmamentu di e shelunan pa duna lus riba tera"; i asina tabata.

¹⁶I Dios a traha e dos lusnan grandi, e lus mas grandi pa goberna dia i e lus mas chikitu pa goberna nochi; El a traha e streanan tambe.

¹⁷I Dios a pone nan na e firmamentu di e shelunan pa duna lus riba tera,

¹⁸i pa goberna dia i nochi, i pa separa lus for di skuridat; i Dios a mira ku esaki tabata bon.

¹⁹I tabata atardi i tabata mainta: e di kuater dia.

²⁰E ora ei Dios a bisa: "Laga e awanan abunda ku kantidat di ser bibu, i laga parhanan bula riba tera na e firmamentu habri di e shelunan."

²¹I Dios a krea e monsternan grandi di laman i tur ser bibu ku ta move, di kualnan e awanan tabata abunda, segun nan sorto, i tur parha ku hala segun su sorto; i Dios a mira ku esaki tabata bon.

²²I Dios a bendishona nan, bisando: "Sea fruktifero i multiplika, i yena e awanan den e lamannan, i laga parhanan multiplika riba tera."

²³I tabata atardi i tabata mainta: e di sinku dia.

²⁴E ora ei Dios a bisa: "Laga e tera produsi sernan bibu segun nan sorto: bestia di kria i bestia ku ta lastra i bestia di mondi segun nan sorto"; i asina tabata.

²⁵I Dios a traha e bestianan di mondi segun nan sorto, i e bestianan di kria segun nan sorto, i tur loke ta lastra abou na suela segun nan sorto; i Dios a mira ku esaki tabata bon.

²⁶E ora ei Dios a bisa: "Laga Nos traha hende segun Nos imagen, konforme Nos semehansa; i laga nan goberna riba e piskanan di laman i riba e parhanan di shelu i riba e bestianan di kria i riba henter e tera, i riba tur bestia ku ta lastra riba tera."

²⁷I Dios a krea hende segun Su mes imagen; segun e imagen di Dios El a krea hende; homber i muhe El a krea nan.

²⁸Anto Dios a bendishona nan, i Dios a bisa nan: "Sea fruktifero i multiplika, i yena e tera i hasi esaki somete na bo; i goberna riba e piskanan di laman i riba e parhanan di shelu, i riba tur ser bibu ku ta move riba tera."

²⁹Anto Dios a bisa: "Mira, Mi a duna boso tur mata ku ta duna simia riba superfisio di henter tera i tur palu ku tin fruta ku ta duna simia; esei lo ta kuminda pa boso.

³⁰I pa tur bestia di mondi, tur parha di shelu i tur loke ta lastra riba tera, ku tin bida, Mi a duna tur mata berde pa kuminda"; i asina tabata.

³¹I Dios a mira tur loke El a traha, i ata, tur kos tabata masha bon. I tabata atardi i tabata mainta: e di seis dia.