Read Papantla Totonac Genesis 11 Bible Online

Genesis 11 - Papantla Totonac bible

Genesis 11

¹Awor henter tera tabatin e mesun idioma i e mesun palabranan.

²I a sosode ku ora nan tabata biaha bai pariba, nan a hana un sabana na tera di Sinar i a keda biba ayanan.

³I un a bisa otro: "Ban, laga nos traha klenku hinka nan den fornu pa nan seka bon." I nan tabata uza klenku na luga di piedra, i nan tabata uza breu na luga di klei.

⁴I nan a bisa: "Ban, laga nos traha un stat pa nos mes i un toren ku su top ta yega te den shelu, i laga nos traha un nomber pa nos mes, pa nos no wordu plama riba superfisio di henter tera."

⁵Anto SENOR a baha pa mira e stat i e toren ku e yunan di hende a traha.

⁶I SENOR a bisa: "Mira, nan ta un pueblo, i nan tur tin e mesun idioma. I esaki nan a kuminsa hasi i awor nada ku nan propone pa hasi lo no ta imposibel pa nan.

⁷Ban, laga Nos baha bai ayanan i konfundi nan idioma pa nan no komprende otro su idioma."

⁸Asina SENOR a plama nan for di einan riba superfisio di henter tera; i nan a stop di traha e stat.

⁹Pesei su nomber tabata Babel, pasobra einan SENOR a konfundi e idioma di henter tera; i for di einan SENOR a plama nan riba superfisio di henter tera.

¹⁰Esakinan ta e generashonnan di Sem. Sem tabatin 100 ana i el a engendra Arfaksad dos ana despues di diluvio;

¹¹i Sem a biba 500 ana despues ku el a engendra Arfaksad, i e tabatin mas yu homber i yu muhe.

¹²I tempu ku Arfaksad tabatin 35 ana, el a engendra Sala;

¹³i Arfaksad a biba 403 ana despues ku el a engendra Sala, i e tabatin mas yu homber i yu muhe.

¹⁴I tempu ku Sala tabatin 30 ana, el a engendra Heber;

¹⁵i Sala a biba 403 ana despues ku el a engendra Heber, i e tabatin mas yu homber i yu muhe.

¹⁶I tempu ku Heber tabatin 34 ana, el a engendra Peleg;

¹⁷i Heber a biba 430 ana despues ku el a engendra Peleg, i e tabatin mas yu homber i yu muhe.

¹⁸I tempu ku Peleg tabatin 30 ana, el a engendra Reu;

¹⁹i Peleg a biba 209 ana despues ku el a engendra Reu, i e tabatin mas yu homber i yu muhe.

²⁰I tempu ku Reu tabatin 32 ana, el a engendra Serug;

²¹i Reu a biba 207 ana despues ku el a engendra Serug, i e tabatin mas yu homber i yu muhe.

²²I tempu ku Serug tabatin 30 ana, el a engendra Nakor;

²³i Serug a biba 200 ana despues ku el a engendra Nakor, i e tabatin mas yu homber i yu muhe.

²⁴I tempu ku Nakor tabatin 29 ana, el a engendra Tare;

²⁵i Nakor a biba 119 ana despues ku el a engendra Tare, i e tabatin mas yu homber i yu muhe.

²⁶I tempu ku Tare tabatin 70 ana, el a engendra Abram, Nakor i Haran.

²⁷Awor esakinan ta e generashonnan di Tare. Tare a engendra Abram, Nakor i Haran; i Haran a engendra Lot.

²⁸Anto Haran a muri durante di bida di su tata Tare na e tera di su nasementu, na Ur di e kaldeonan.

²⁹I Abram i Nakor a tuma esposanan pa nan mes. Nomber di esposa di Abram tabata Sarai; i nomber di esposa di Nakor tabata Milka, yu muhe di Haran, tata di Milka i Iska.

³⁰I Sarai tabata steril; e no tabatin yu.

³¹I Tare a tuma su yu homber Abram i su nietu Lot, yu homber di Haran, i su suegra Sarai, esposa di su yu Abram, i nan a sali bai huntu for di Ur di e kaldeonan pa bai na tera di Kanaan; i nan a yega Haran i a keda biba ayanan.

³²I e dianan di Tare tabata 205 ana, i Tare a muri na Haran.