Read Papantla Totonac Genesis 12 Bible Online

Genesis 12 - Papantla Totonac bible

Genesis 12

¹Awor SENOR a bisa Abram: "Sali for di bo tera, i for di bo famianan i for di kas di bo tata, bai na e tera ku lo Mi mustrabo;

²i lo Mi hasibo un nashon grandi, i lo Mi bendishonabo, i hasi bo nomber grandi; i lo bo ta un bendishon.

³I lo Mi bendishona esnan ku bendishonabo, i esun ku maldishonabo lo Mi maldishona. I den bo tur e famianan di mundu lo ta bendishona."

⁴Asina Abram a sali bai manera SENOR a papia kune, i Lot a bai kune. Awor Abram tabatin setent'i sinku ana dia ku el a sali for di Haran.

⁵I Abram a tuma su esposa Sarai i su subrino Lot, i tur nan propiedatnan ku nan a akumula, i e hendenan ku nan a hana na Haran; i nan a sali pa bai tera di Kanaan; asina nan a yega na tera di Kanaan.

⁶Anto Abram a pasa dor di e tera te na e luga di Sikem, te na e palu di eik di More. Awor den e tempu ei e kananeonan tabata den e tera.

⁷I SENOR a parese na Abram i a bisa: "Bo desendientenan lo Mi duna e tera aki." I ayanan el a traha un altar pa SENOR, Kende a parese na dje.

⁸I for di einan el a sigui bai na e seru pariba di Bet-el i a lanta su tent, ku Bet-el parti pabou i Ai parti pariba; i ayanan el a traha un altar pa SENOR i a invoka e nomber di SENOR.

⁹I Abram a sigui biaha bai den direkshon di Negev.

¹⁰Awor tabatin hamber den e tera; pesei Abram a baha bai Egipto pa keda biba ayanan pa un tempu, pasobra e hamber tabata masha pisa den e tera.

¹¹I a sosode ku ora e tabata serka di yega Egipto, el a bisa su esposa Sarai: "Mira, mi sa ku bo ta un muhe bunita;

¹²i lo sosode ku ora e egipsionan mirabo, nan lo bisa: 'Esaki ta su esposa'; i nan lo matami, ma abo nan lo laga keda na bida.

¹³Pa fabor, bisa ku bo ta mi ruman pa bai mi bon pa bo motibu, i pa mi por keda na bida pa bo motibu."

¹⁴I a sosode ku ora Abram a yega Egipto, e egipsionan a mira ku e muhe tabata masha bunita.

¹⁵I e ofisialnan di F arao a mir'e i nan a gab'e dilanti di F arao; i e muhe a wordu hiba den kas di F arao.

¹⁶Pesei Farao a trata Abram bon pa su motibu, i a dun'e karne, buey i buriku, sirbido homber i muhe, buriku yewa i kamel.

¹⁷Ma SENOR a dal Farao i su kas ku plaganan pisa pa motibu di Sarai, esposa di Abram.

¹⁸E ora ei Farao a yama Abram i a bisa: "Ta kiko e kos ku bo a hasi ku mi aki? Pakiko bo no a bisami ku e tabata bo esposa?

¹⁹Pakiko bo a bisa: 'E ta mi ruman,' asina ku mi a tum'e komo mi esposa? Asina anto, ata bo esposa aki, tum'e bai kune."

²⁰I Farao a ordena su hendenan enkuanto Abram; i nan a mand'e bai, huntu ku su esposa i tur loke tabata pertenese na dje.