Read Papantla Totonac Genesis 13 Bible Online

Genesis 13 - Papantla Totonac bible

Genesis 13

¹Asina Abram a sali for di Egipto bai Negev, e ku su esposa i tur loke tabata pertenese na dje, i Lot huntu kune.

²Awor Abram tabata masha riku na bestia di kria, na plata i na oro.

³I el a sigui su biahenan for di Negev te na Bet-el, na e luga kaminda su tent tabata na prinsipio, entre Bet-el i Ai,

⁴na e luga di e altar ku el a traha ayanan anteriormente; i ayanan Abram a invoka e nomber di SENOR.

⁵Awor Lot, kende a bai ku Abram, tambe tabatin karne, baka i tent.

⁶I e tera no tabata sufisiente pa nan keda biba huntu, pasobra nan propiedatnan tabata asina tantu ku nan no por a keda huntu.

⁷I tabatin pleitu entre e wardadonan di Abram su bestianan i e wardadonan di Lot su bestianan. Awor den e tempu ei e kananeonan i e ferezeonan tabata biba den e tera.

⁸E ora ei Abram a bisa Lot: "Pa fabor, no laga tin pleitu entre abo i ami, ni entre mi wardadonan i bo wardadonan, pasobra ta ruman nos ta.

⁹Henter e tera no ta bo dilanti? Pa fabor, separa bo mes for di mi: si ta pa man robes, ami lo bai pa man drechi; of si ta pa man drechi, ami lo bai pa man robes."

¹⁰I Lot a hisa kara i a mira henter e vaye di Jordan, ku esaki tabatin hopi awa tur kaminda (prome ku SENOR a destrui Sodoma i Gomora) manera e hofi di SENOR, manera e tera di Egipto den direkshon di Zoar.

¹¹Pesei Lot a skohe pa su mes henter e vaye di Jordan; i Lot a biaha bai pariba. Asina nan a separa for di otro.

¹²Abram a keda biba na tera di Kanaan, mientras ku Lot a keda biba den e statnan di e vaye, i a bai pone su tentnan te na Sodoma.

¹³Awor e hombernan di Sodoma tabata masha malbado mes i pekadonan kontra SENOR.

¹⁴Anto SENOR a bisa Abram, despues ku Lot a separa for di dje: "Awor hisa bo kara i, for di e luga kaminda bo ta, mira panort, pasuit, pariba i pabou;

¹⁵pasobra henter e tera ku bo ta mira lo Mi duna abo i bo desendientenan pa semper.

¹⁶I lo Mi hasi bo desendientenan manera e stof di tera, asina ku si un hende por konta e stof di tera, anto bo desendientenan tambe por wordu konta.

¹⁷Lanta, pasa dor di e tera den su largura i hanchura, pasobra lo Mi dunabo e tera."

¹⁸E ora ei Abram a lanta su tent i a bai biba banda di e palunan di eik di Mamre, kualnan ta keda na Hebron, i ayanan el a traha un altar pa SENOR.