Read Papantla Totonac Genesis 14 Bible Online

Genesis 14 - Papantla Totonac bible

Genesis 14

¹Anto a sosode den e dianan di Amrafel, rei di Sinar, Ariok, rei di Elasar, Kedorlaomer, rei di Elam i Tidal, rei di Goim,

²ku nan a hasi guera kontra Bera, rei di Sodoma, i kontra Birsa, rei di Gomora, kontra Sinab, rei di Adma, kontra Semeber, rei di Zeboim, i kontra rei di Bela (esta, Zoar).

³Tur esakinan a uni ku otro komo aliado den e vaye di Sidim (esta, Laman Salu).

⁴Diesdos ana nan a sirbi Kedorlaomer, ma e di diestres ana nan a rebeldia.

⁵I den e di dieskuater ana Kedorlaomer i e reinan ku tabata huntu kune a bin derota e refaitanan na Astorot-karnaim, e zuzitanan na Ham, e emitanan na Save-kiriataim,

⁶i e horeonan den nan Seru Seir, te na El Paran, ku ta keda banda di e desierto.

⁷E ora ei nan a bai bek i a yega na En-mispat (esta, Kades), i a konkista henter e tera di e amalekitanan, i tambe e amoreonan ku tabata biba na Hazezon-tamar.

⁸Anto e rei di Sodoma, e rei di Gomora, e rei di Adma, e rei di Zeboim i e rei di Bela (esta, Zoar) a sali i nan a pone nan mes den ordu di bataya kontra esnan den e vaye di Sidim,

⁹kontra Kedorlaomer, rei di Elam, Tidal, rei di Goim, Amrafel, rei di Sinar i Ariok, rei di Elasar--kuater rei kontra sinku.

¹⁰Awor e vaye di Sidim tabata yen di pos di breu, i e reinan di Sodoma i Gomora a hui i nan a kai den e posnan. Ma esnan ku a sobrebibi a hui bai den e serunan.

¹¹E ora ei nan a kohe tur e biennan di Sodoma i Gomora i tur nan provishon di kuminda i nan a bai.

¹²I nan a kohe Lot tambe, e subrino di Abram, kende tabata biba na Sodoma, i su propiedatnan, i nan a bai.

¹³E ora ei un fugitivo a bin konta Abram e hebreo esaki. Awor Abram tabata biba banda di e palunan di eik di Mamre e amoreo, ruman homber di Eskol i ruman homber di Aner, i esakinan tabata aliado di Abram.

¹⁴I ora Abram a tende ku su ruman a wordu kaptura, el a mobilisa su hombernan entrena ku a nase den su kas, tres shent'i diesocho, i a persigm nan te na Dan.

¹⁵I anochi el a parti su trupanan kontra nan, e ku su sirbidonan, i a derota nan i persigui nan te na Hoba, ku ta keda panort di Damasko.

¹⁶I el a trese tur e biennan bek, i tambe el a trese bek su ruman Lot ku su propiedatnan, i tambe e muhenan i e pueblo.

¹⁷Anto despues ku el a bolbe di e derota di Kedorlaomer i e reinan ku tabata huntu kune, rei di Sodoma a sali bai kontr'e na e vaye di Save (esta, e Vaye di Rei).

¹⁸I Melkisedek, rei di Salem, a trese pan i bina; awor e tabata un saserdote di e Dios Haltisimo.

¹⁹I el a bendishona Abram i a bisa: "Bendishona sea Abram di e Dios Haltisimo, Kreador di shelu i di tera;

²⁰i bendishona sea e Dios Haltisimo, Kende a entrega bo enemigunan den bo man." I Abram a dun'e un diesmo di tur kos.

²¹Anto rei di Sodoma a bisa Abram: "Dunami e hendenan i tuma e biennan pa bo mes."

²²I Abram a bisa e rei di Sodoma: "Mi a hura na SENOR, e Dios Haltisimo, Kreador di shelu i di tera,

²³ku lo mi no tuma ni un pida hilu ni strep di sandalia ni nada di bo, pa bo no bisa: 'Mi a hasi Abram riku.'

²⁴Lo mi no tuma nada sino solamente loke e hombernan a kome, i e porshon di e hombernan ku a bai ku mi: Aner, Eskol i Mamre; laga nan tuma nan porshon."