Read Papantla Totonac Genesis 15 Bible Online

Genesis 15 - Papantla Totonac bible

Genesis 15

¹Despues di e kosnan aki palabra di SENOR a yega na Abram den un vishon, bisando: "No tene miedu, Abram, Ami ta un eskudo pa bo; bo rekompensa lo ta masha grandi mes."

²I Abram a bisa: "O Senor DIOS, kiko lo Bo dunami, siendo ku mi no tin yu, i ku ta Eliezer di Damasko ta e eredero di mi kas?"

³I Abram a bisa: "Komo ku Bo no a dunami desendensia, un ku a nase den mi kas ta mi eredero."

⁴I mira, palabra di SENOR a yega na dje, bisando: "E homber aki lo no ta bo eredero, ma un ku lo sali for di bo mes kurpa, esei lo ta bo eredero."

⁵I El a bai pafo kune i a bisa: "Awor wak na e shelunan i konta e streanan, si bo por konta nan." I El a bis'e: "Asina bo desendientenan lo ta."

⁶E ora ei el a kere den SENOR, i El a konta esaki komo hustisia p'e.

⁷Anto El a bis'e: "Ami ta SENOR, Kende a sakabo for di Ur di e kaldeonan, pa dunabo e tera aki pa bo ered'e."

⁸I Abram a bisa: "O Senor DIOS, kon mi por sa ku lo mi ered'e?"

⁹Asina El a bis'e: "Trese pa Mi un bishe muhe di tres ana, un kabritu muhe di tres ana, un karne chubatu di tres ana, un tortelduif i un pichon."

¹⁰E ora ei el a trese tur esakinan p'E i a korta nan na dos, i a pone kada mitar enfrente di esun otro; ma e parhanan e no a korta.

¹¹Anto e parhanan di rapina a baha riba e kadavernan i Abram a kore ku nan.

¹²Awor, ora solo tabata baha, un sono profundo a baha riba Abram, i mira, teror i gran skuridat a baha riba dje.

¹³I Dios a bisa Abram: "Sabi por sierto ku bo desendientenan lo ta stranhero na un tera ku no ta di nan, kaminda nan lo bira esklabu i keda oprimi kuater shen ana.

¹⁴Ma tambe e nashon ku nan lo sirbi lo Mi huzga; i for di einan nan lo sali bai ku hopi propiedat.

¹⁵I abo, lo bo bai serka bo tatanan na pas; lo bo wordu dera na un edat hopi avansa.

¹⁶I den e di kuater generashon nan lo bolbe akinan, pasobra e inikidat di e amoreo no ta kompleto ainda."

¹⁷I a sosode ku ora solo a baha i tabata hopi skur, ata a parese un fornu ku tabata huma i un flambeu tur na flam, ku a pasa meimei di e pida-pidanan aki.

¹⁸Riba e dia ei SENOR a sera un aliansa ku Abram, bisando: "Na bo desendientenan Mi a duna e tera aki, for di e riu di Egipto te na e riu grandi, Riu Eufrates:

¹⁹e keneo, e kenezeo i e kadmoneo,

²⁰e heteo, e ferezeo i e refaita,

²¹e amoreo, e kananeo, e gergeseo i e jebuseo."