Read Papantla Totonac Genesis 17 Bible Online

Genesis 17 - Papantla Totonac bible

Genesis 17

¹Awor tempu ku Abram tabatin nobent'i nuebe ana, SENOR a parese na Abram i a bis'e: "Mi ta Dios Todopoderoso; kana Mi dilanti i sea perfekto.

²I lo Mi stablese Mi aliansa entre Ami i abo, i lo Mi multiplikabo masha hopi mes."

³Anto Abram a tira su kurpa abou ku su kara te na suela, i Dios a papia kune, bisando:

⁴"Pa loke t'Ami, mira, Mi aliansa ta ku bo, i abo lo ta tata di un multitut di nashonnan.

⁵Lo bo no wordu yama Abram mas, ma bo nomber lo ta Abraham, pasobra lo Mi hasibo tata di un multitut di nashonnan.

⁶I lo Mi hasibo masha fruktifero mes, i lo Mi traha nashonnan for di bo, i reinan lo sali for di bo.

⁷I lo Mi stablese Mi aliansa entre Ami i abo i bo desendientenan despues di bo durante di tur nan generashonnan, komo un aliansa eterno, pa ta bo Dios i Dios di bo desendientenan despues di bo.

⁸I lo Mi duna abo i bo desendientenan despues di bo e tera kaminda bo ta keda biba pa un tempu, henter tera di Kanaan, komo un propiedat eterno; i lo Mi ta nan Dios."

⁹Dios a sigui bisa Abraham: "Awor pa loke t'abo, lo bo warda Mi aliansa, abo i bo desendientenan despues di bo durante di tur nan generashonnan.

¹⁰Esaki ta Mi aliansa ku boso mester warda entre Ami i boso i bo desendientenan despues di bo: tur persona maskulino entre boso mester wordu sirkumsida.

¹¹I boso mester laga sirkumsida e karni di boso prepusio, i esaki lo ta e senal di e aliansa entre Ami i boso.

¹²I durante di tur boso generashonnan tur persona maskulino entre boso, ora nan hasi ocho dia, mester wordu sirkumsida, tantu esun ku a nase den kas komo esun ku a wordu kumpra ku plaka serka kualke stranhero ku no ta di bo desendientenan.

¹³Esun ku a nase den bo kas of ku ta kumpra ku bo plaka, siguramente mester wordu sirkumsida; asina Mi aliansa lo ta den boso karni komo un aliansa eterno.

¹⁴Ma un persona maskulino insirkumsida, ku no ta sirkumsida na e karni di su prepusio, e persona ei mester wordu korta kita for di su pueblo; el a kibra Mi aliansa."

¹⁵Despues Dios a bisa Abraham: "Pa loke ta bo esposa Sarai, lo bo no yam'e Sarai, ma Sara lo ta su nomber.

¹⁶I lo Mi bendishon'e, i di berdat lo Mi dunabo un yu homber pa medio di dje. E ora ei lo Mi bendishon'e i e lo ta un mama di nashonnan; reinan di pueblonan lo sali for di dje."

¹⁷E ora ei Abraham a tira su kurpa abou ku su kara te na suela i a hari, i a bisa den su kurason: "Lo nase un yu pa un homber di shen ana? I Sara, ku tin nobenta ana, lo hana yu?"

¹⁸I Abraham a bisa Dios: "Ohala ku Ismael por biba Bo dilanti!"

¹⁹Ma Dios a bisa: "No, ma bo esposa Sara lo hana un yu homber pa bo, i lo bo dun'e e nomber Isaak; i lo Mi stablese Mi aliansa kune komo un aliansa eterno pa su desendientenan despues di dje.

²⁰I enkuanto Ismael, Mi a tendebo; mira, lo Mi bendishon'e i hasie fruktifero i multiplik'e masha hopi mes. E lo bira tata di diesdos prens, i lo Mi hasie un nashon grandi.

²¹Ma Mi aliansa lo Mi stablese ku Isaak, kende Sara lo hana pa bo otro ana na e temporada aki."

²²I ora ku El a kaba di papia kune, Dios a subi bai laga Abraham.

²³E ora ei Abraham a tuma su yu homber Ismael i tur ku a nase den su kas i tur esnan ku tabata kumpra ku su plaka, tur persona maskulino entre e hendenan di Abraham su kas, i a sirkumsida e karni di nan prepusio riba e mesun dia ei, manera Dios a bis'e.

²⁴Awor Abraham tabatin nobent'i nuebe ana dia ku el a wordu sirkumsida na e karni di su prepusio.

²⁵I su yu homber Ismael tabatin diestres ana dia ku el a wordu sirkumsida na e karni di su prepusio.

²⁶Riba e mesun dia Abraham a wordu sirkumsida, i su yu homber Ismael tambe.

²⁷I tur e hombernan di su kas ku a nase na kas of ku a wordu kumpra ku plaka serka un stranhero, a wordu sirkumsida huntu kune.