Read Papantla Totonac Genesis 18 Bible Online

Genesis 18 - Papantla Totonac bible

Genesis 18

¹Awor SENOR a parese na Abraham banda di e palunan di eik di Mamre, ora ku e tabata sinta na porta di e tent den e kalor di dia.

²I ora ku el a hisa kara wak, ata, tabatin tres homber para na un distansia su dilanti; i ora ku el a mira nan, el a kore sali for di porta di e tent pa kontra nan, i a buig te na suela,

³i a bisa: "Mi Senor, si awor mi a hana grasia den Bo bista, pa fabor, no pasa Bo sirbido forbei.

⁴Pa fabor, lagami trese poko awa pa boso laba boso pia, i bai sosega boso kurpa bou di e palu;

⁵i lo mi trese pida pan pa boso refreska boso kurason; despues boso por sigui, pasobra ta pa e motibu aki boso a bin serka boso sirbido." I nan a bisa: "Hasi manera bo a bisa."

⁶E ora ei Abraham a kore bai den tent serka Sara i a bisa: "Hasi lihe, prepara tres midi di harina fini, mans'e, i traha pan."

⁷Tambe Abraham a kore bai na e bakanan i a kohe un bishe bon i moli asina duna e sirbido; i el a pura bai prepar'e.

⁸I el a kohe manteka i lechi i e bishe ku el a prepara i a pone esaki nan dilanti; i e tabata para serka nan bou di e palu mientras ku nan tabata kome.

⁹E ora ei nan a bis'e: "Unda bo esposa Sara ta?" I el a bisa: "Aki den tent."

¹⁰Anto El a bisa: " Siguramente lo mi bolbe serka bo otro ana na e tempu aki; i mira, bo esposa Sara lo tin un yu homber." I Sara tabata skucha na porta di e tent ku tabata keda su tras.

¹¹Awor Abraham i Sara tabata bieu, di edat avansa; Sara a pasa edat di hana yu.

¹²Pesei Sara a hari den su mes, bisando: "Awor ku mi a bira bieu, lo mi tin plaser, mi esposo siendo bieu tambe?"

¹³I SENOR a bisa Abraham: "Pakiko Sara a hari, bisando: 'Lo mi hana yu berde, awor ku mi ta asina bieu?'

¹⁴Por tin algu ku ta muchu difisil pa SENOR? Na e tempu stipula lo Mi bolbe serka bo, otro ana na e tempu aki, i Sara lo tin un yu homber."

¹⁵Ma Sara a nenga esaki, bisando: "Mi no a hari"; pasobra e tabatin miedu. I El a bisa: "No, ma bo a hari si!"

¹⁶E ora ei e hombernan a lanta for di einan i a wak den direkshon di Sodoma; i Abraham a bai ku nan pa despedi di nan.

¹⁷I SENOR a bisa: "Lo Mi skonde pa Abraham loke Mi ta bai hasi,

¹⁸siendo ku sigur-sigur Abraham lo bira un nashon grandi i poderoso, i den dje tur e nashonnan di mundu lo ta bendishona?

¹⁹Pasobra Mi a skoh'e, pa e por ordena su yunan i e hendenan di su kas despues di dje pa warda e kaminda di SENOR, dor di hasi hustisia i huisio, pa SENOR por trese riba Abraham loke El a papia tokante di dje."

²⁰Anto SENOR a bisa: "E klamor kontra Sodoma i Gomora di berdat ta grandi, i nan pika ta masha pisa mes.

²¹Lo Mi baha awor i wak si nan a hasi kompletamente segun e klamor ku a yega na Mi; si no, lo Mi hana sa."

²²E ora ei e hombernan a sali for di einan i a bai Sodoma, mientras ku Abraham tabata para ainda dilanti di SENOR.

²³Anto Abraham a yega serka i a bisa: "Di berdat Bo ta bai destrui e hustu huntu ku e malbado?

²⁴Supone ku tin sinkuenta hende hustu den e stat; di berdat lo Bo destruie sin salba e luga pa kousa di e sinkuenta hendenan hustu ku tin den dje?

²⁵Ku esei keda leu di Bo pa hasi un kos asina, esta, mata e hustu huntu ku e malbado, asina ku e hustu i e malbado ta wordu trata igual. Ku esei keda leu di Bo! E Hues di henter mundu lo no hasi hustisia?"

²⁶I SENOR a bisa: "Si na Sodoma Mi hana sinkuenta hende hustu den e stat, e ora ei lo Mi spar henter e luga pa nan motibu."

²⁷I Abraham a kontesta i a bisa: "At'awor mi a tribi papia ku Senor, ounke ta djis stof i shinishi mi ta.

²⁸Supone ku tabatin sinku menos di e sinkuenta hendenan hustu ei; lo Bo a destrui henter e stat pa motibu di sinku?" I El a bisa: "Lo Mi no destruie si Mi hana kuarent'i sinku ayanan."

²⁹I el a sigui papia kuné i a bisa: "Supone ku hana kuarenta ayanan?" I El a bisa: "Lo Mi no hasie pa motibu di e kuarentanan."

³⁰E ora ei el a bisa: "O ku Senor no rabia, i lo mi papia; supone ku hana trinta ayanan?" I El a bisa: "Lo Mi no hasie si Mi hana trinta ayanan."

³¹I el a bisa: "Awor mira, mi a tribi papia ku Senor; supone ku hana binti ayanan?" I El a bisa: "Lo Mi no destruie pa motibu di e bintinan."

³²E ora ei el a bisa: "O ku Senor no rabia, i lo mi papia solamente un biaha mas; supone ku hana dies ayanan?" I El a bisa: "Lo Mi no destruie pa motibu di e diesnan."

³³I asina ku El a kaba di papia ku Abraham, SENOR a bai, i Abraham a bai su luga bek.