Read Papantla Totonac Genesis 19 Bible Online

Genesis 19 - Papantla Totonac bible

Genesis 19

¹Awor e dos angelnan a yega Sodoma atardi i Lot tabata sinta na porta di Sodoma. Ora Lot a mira nan, el a lanta bai kontra ku nan i a buig ku su kara te na suela.

²I el a bisa: "Awor mira, mi senornan, pa fabor, ban kas di bo sirbido, keda pasa nochi i laba boso pia; e ora ei boso por lanta tempran i sigui boso kaminda." Ma nan a bisa: "No, nos lo pasa nochi riba e plenchi."

³Ma el a keda insist!; asina nan a bai serka dje i a drenta su kas; i el a prepara un fiesta pa nan i a traha pan sin zurdeg, i nan a kome.

⁴Prome ku nan a bai drumi e hombernan di e stat, e hombernan di Sodoma, a rondona e kas, tantu hoben komo bieu, henter e pueblo for di tur parti;

⁵anto nan a grita Lot bis'e: "Unda e hombernan ku a bin serka bo awe nochi ta? Saka nan pafo pa nos, pa nos por tin relashon ku nan."

⁶Ma Lot a sali bai na porta serka nan i a sera e porta su tras,

⁷i a bisa: "Pa fabor, mi rumannan, no aktua ku maldat.

⁸Mira aki, mi tin dos yu muhe ku nunka a yega di tin relashon ku homber; pa fabor, lagami saka nan pafo pa boso i hasi ku nan manera boso hana ta bon; solamente, no hasi e hombernan aki nada, pasobra ta esaki ta e motibu ku nan a bin bou di e sombra di mi dak."

⁹Ma nan a bisa: "Hala un banda." Tambe nan a bisa: "Esaki a bin biba aki komo stranhero i ya ta aktua manera hues; awor nos ta bai tratabo pio ku nan." I ku forsa nan a pusha Lot un banda i a yega serka pa kibra e porta.

¹⁰Ma e hombernan a saka man i a hala Lot den kas serka nan i a sera e porta.

¹¹I nan a dal e hombernan ku tabata na porta di e kas ku sieguedat, tantu chikitu komo grandi, asina ku nan a purba di hana e porta te kansa.

¹²E ora ei e hombernan a bisa Lot: "Ken mas bo tin aki? Y erno, bo yu hombernan, bo yu muhenan, i ken ku bo tin den e stat, saka nan for di e luga aki,

¹³komo ku nos ta bai destrui e luga aki, pasobra nan klamor a bira asina duru dilanti di SENOR, ku SENOR a manda nos pa destruie."

¹⁴Anto Lot a sali bai i a papia ku su yernonan ku tabata bai kasa ku su yu muhenan, i a bisa: "Lanta, sali for di e luga aki, pasobra SENOR ta bai destrui e stat." Ma pa su yernonan tabata parse ku ta chansa e tabata chansa.

¹⁵I ora dia tabata habri e angelnan a insist! serka Lot, bisando: "Lanta, tuma bo esposa i bo dos yu muhenan ku t'aki, pa boso no perese den e kastigu di e stat."

¹⁶Ma Lot a tarda. Pesei e hombernan a gara su man i man di su esposa i man di su dos yu muhenan, pasobra e kompashon di SENOR tabata riba dje; i nan a hib'e pafo i a pon'e pafo di e stat.

¹⁷I a sosode ku ora nan a hiba nan pafo, un di nan a bisa: "Hui pa bo salba bo bida! No wak bo tras, ni keda para ningun kaminda den e vaye; hui bai na e serunan, pa bo no perese."

¹⁸Ma Lot a bisa nan: "Ai no, mi senornan!

¹⁹Awor mira, bo sirbido a hana grasia den bo bista i bo a engrandese bo miserikordia ku bo a mustra na mi dor di salba mi bida; ma mi no por hui bai na e serunan, pa e kalamidat no alkansami i mi muri;

²⁰awor mira, e stat aki ta basta serka pa hui bai ayanan, i e ta chikitu. Pa fabor, lagami hui bai ayanan (e ta chikitu tog?) pa mi bida wordu salba."

²¹I el a bis'e: "Mira, mi ta konsedebo e suplika aki tambe, pa no destrui e stat ku bo a papia di dje.

²²Hasi lihe, hui bai ayanan, komo ku mi no por hasi nada prome ku bo yega ayanan." Pesei nan ta yama e stat Zoar.

²³Solo a sali kaba riba tera ora Lot a yega Zoar.

²⁴E ora ei SENOR a laga yobe riba Sodoma i Gomora, swafel i kandela di SENOR, for di shelu,

²⁵i El a destrui e statnan ei, henter e vaye, tur e habitantenan di e statnan i tur loke tabata krese riba tera.

²⁶Ma esposa di Lot, kende tabata kana su tras, a drai wak patras, i el a bira un pilar di salu.

²⁷Awor Abraham a lanta mainta tempran i a bai na e luga kaminda el a para dilanti di SENOR;

²⁸i el a wak den direkshon di Sodoma i Gomora i den direkshon di henter e tera di e vaye, i el a wak, i ata, e huma di e tera tabata subi bai ariba manera huma di fornu.

²⁹Asina a sosode ku dia Dios a destrui e statnan di e vaye, Dios a korda di Abraham, i a saka Lot for di meimei di e destrukshon, dia ku El a destrui e statnan kaminda Lot tabata biba.

³⁰I Lot a sali for di Zoar i a bai biba den e serunan, i su dos yu muhenan a bai kune; pasobra e tabatin miedu di keda na Zoar; anto el a keda biba den un kueba, e ku su dos yu muhenan.

³¹I esun mayo a bisa esun mas chikitu: "Nos tata ta bieu i no tin ni un homber den e pais pa tene relashon ku nos segun e kustumber di henter e tera.

³²Ban, laga nos hasi nos tata bebe bina, i laga nos drumi kune, pa nos preserva nos famia pa medio di nos tata."

³³Asina nan a hasi nan tata bebe bina e anochi ei, i esun mayo a bai paden i a drumi ku su tata; i Lot no a ripara ki ora el a kai drumi ni ki ora el a lanta.

³⁴I a sosode ku su manise esun mayo a bisa esun mas chikitu: "Mira, ayera nochi mi a drumi ku mi tata; laga nos hasie bebe bina awe nochi tambe; e ora ei abo ta bai paden i ta drumi kune, pa nos por preserva nos famia pa medio di nos tata."

³⁵Asina nan a hasi nan tata bebe bina e anochi ei tambe, i esun mas chikitu a lanta i a bai drumi kune; i Lot no a ripara ki ora el a kai drumi ni ki ora el a lanta.

³⁶Asina tur dos e yu muhenan di Lot a sali na estado di nan tata.

³⁷I esun mayo a duna lus na un yu homber, i a dun'e e nomber Moab; e ta tata di e moabitanan te dia djawe.

³⁸I esun mas chikitu tambe a duna lus na un yu homber, i a dun'e e nomber Ben-ami; e ta tata di e yu hombernan di Amon te dia djawe.