Read Papantla Totonac Genesis 2 Bible Online

Genesis 2 - Papantla Totonac bible

Genesis 2

¹Asina e shelunan i tera a keda kla, i tur nan ehersitonan.

²I riba e di shete dia Dios a kaba Su trabou ku El a hasi, i riba e di shete dia El a sosega di tur Su trabou ku El a hasi.

³E ora ei Dios a bendishona e di shete dia i a santifik'e, pasobra riba e dia ei El a sosega di tur Su trabou ku Dios a krea i a traha.

⁴Esaki ta e historia di e shelunan i tera tempu ku nan a wordu krea, den e dia ku SENOR Dios a traha tera i shelu.

⁵Awor no tabatin ningun mata di kunuku riba tera ainda, ni no a nase ningun yerba di kunuku ainda, pasobra SENOR Dios no a manda awaseru riba tera, i no tabatin hende pa kultiva tera.

⁶Ma un damp tabata subi for di tera i tabata muha henter superfisio di tera.

⁷E ora ei SENOR Dios a forma hende di e stof di tera i a supla e rosea di bida den su nanishi; i hende a bira un ser bibu.

⁸I SENOR Dios a planta un hofi parti pariba, na Eden; i ayanan El a pone e homber ku El a forma.

⁹I for di suela SENOR Dios a hasi nase tur palu ku ta agradabel pa bista i bon pa kuminda; tambe e palu di bida meimei di e hofi, i e palu di konosementu di bon i malu.

¹⁰Awor un riu tabata sali for di Eden pa muha e hofi, i for di einan el a parti i a bira kuater riu.

¹¹Nomber di e prome ta Pison; esaki ta kore ront di henter tera di Havila, kaminda tin oro.

¹²I e oro di e tera ei ta bon; aya tin bedelio i piedra di oneks.

¹³Nomber di e di dos riu ta Gihon; esaki ta kore ront di henter tera di Kus.

¹⁴Nomber di e di tres riu ta Tigris; esaki ta kore pariba di Asiria. I e di kuater riu ta Eufrates.

¹⁵E ora ei SENOR Dios a kohe e homber i a pon'e den e hofi di Eden pa kultiv'e i kuid'e.

¹⁶I SENOR Dios a ordena e homber, bisando: "Di tur palu di e hofi bo mag kome libremente,

¹⁷ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur."

¹⁸E ora ei SENOR Dios a bisa: "No ta bon pa e homber ta so; lo Mi traha un yudado p'e ku ta pas kune."

¹⁹I for di tera SENOR Dios a forma tur bestia di sabana i tur parha di shelu, i a hiba nan pa e homber, pa mira kon e lo a yama nan; anto manera e homber a yama kada ser bibu, asina su nomber tabata.

²⁰I e homber a duna nomber na tur bestia di kria i parha di shelu, i tur bestia di sabana, ma pa Adam no a wordu hana un yudado ku tabata pas kune.

²¹Asina SENOR Dios a hasi e homber pega un sono profundo, i el a drumi; e ora ei El a tuma un di su repchinan i a sera e karni na e luga ei.

²²I SENOR Dios a traha un muhe ku e repchi ku El a tuma for di e homber i a hib'e pa e homber.

²³I e homber a bisa: "Esaki ta awor wesu di mi wesunan, i karni di mi karni; e lo wordu yama Muhe, pasobra el a wordu tuma for di Homber."

²⁴Pesei un homber lo bandona su tata i su mama i lo uni ku su esposa. I nan lo bira un karni.

²⁵I e homber i su esposa tur dos tabata sunu i no tabatin berguensa.