Read Papantla Totonac Genesis 20 Bible Online

Genesis 20 - Papantla Totonac bible

Genesis 20

¹Awor Abraham a biaha for di ayanan pa tera di Negev, i a stablese su mes entre Kades i Shur, i el a keda biba pa un tempu na Gerar.

²I Abraham a bisa di su esposa Sara: "E ta mi ruman." Pesei Abimelek, rei di Gerar, a manda buska Sara i a tum'e.

³Ma Dios a bin serka Abimelek anochi den un sono i a bis'e: "Mira, bo ta morto pa motibu di e muhe ku bo a tuma, pasobra e ta kasa."

⁴Ma Abimelek no a yega serka dje; i el a bisa: "Senor, lo Bo mata un nashon, maske ku e ta hustu?

⁵No ta e homber mes a bisami: 'E ta mi ruman'? I ta e muhe mes a bisa: 'E ta mi ruman.' Den e integridat di mi kurason i inosensia di mi mannan mi a hasi e kos aki."

⁶E ora ei Dios a bis'e den e sono: "Si, Mi sa ku ta den e integridat di bo kurason bo a hasi e kos aki, i Mi no a lagabo peka kontra Mi tampoko; pesei Mi no a lagabo mishi kune.

⁷Pesei anto, trese e homber su esposa bek, pasobra e homber ta un profeta, i e lo hasi orashon pa bo, i lo bo keda na bida. Ma si bo no tres'e bek, sabi ku lo bo muri sigur, abo i tur esnan ku ta di bo."

⁸Asina Abimelek a lanta mainta tempran, a yama tur su sirbidonan i a konta tur e kosnan aki pa nan tende; i e hombernan a spanta masha.

⁹E ora ei Abimelek a yama Abraham i a bis'e: "Ta kiko bo a hasi ku nos? I ta den kiko mi a peka kontra bo, ku bo a trese riba mi i riba mi reino un pika asina grandi? Bo a hasi kosnan ku mi, ku bo no mester a hasi."

¹⁰I Abimelek a bisa Abraham: "Kiko bo tabatin na bista, ku bo a hasi e kos aki?"

¹¹I Abraham a bisa: "Pasobra mi a pensa, sigur-sigur no tin temor di Dios den e luga aki, i nan lo matami pa motibu di mi esposa.

¹²Ademas, e ta berdaderamente mi ruman, yu muhe di mi tata, ma no yu muhe di mi mama, i el a bira mi esposa;

¹³i a sosode ku ora Dios a hasimi dwal bai for di kas di mi tata, mi a bis'e: 'Esaki ta e karino ku lo bo mustra na mi: unda ku nos bai, bisa di mi: "E ta mi ruman.

¹⁴E ora ei Abimelek a kohe karne, buey i sirbidonan homber i muhe i a duna Abraham nan, i a manda su esposa Sara bek p'e.

¹⁵I Abimelek a bisa: "Mira, mi pais ta bo dilanti; bai biba kaminda bo kier."

¹⁶I el a bisa Sara: "Mira, mi a duna bo ruman mil pida plata; at'esei ta pa vindikabo dilanti di tur esnan ku ta ku bo, i dilanti di tur hende bo ta hustifika."

¹⁷I Abraham a hasi orashon na Dios, i Dios a kura Abimelek i su esposa i su krianan muhe, asina ku nan a hana yu.

¹⁸Pasobra SENOR a sera tur matris di e hendenan di kas di Abimelek pa motibu di Sara, esposa di Abraham.