Read Papantla Totonac Genesis 21 Bible Online

Genesis 21 - Papantla Totonac bible

Genesis 21

¹E ora ei SENOR a bishita Sara, manera El a bisa, i SENOR a hasi pa Sara manera El a priminti.

²Asina Sara a sali na estado i a hana un yu homber pa Abraham den su biehes, na e tempu stipula, di kual Dios a papia kune.

³I Abraham a duna su yu homber ku a nase p'e, ku Sara a hana p'e, e nomber Isaak.

⁴Anto Abraham a sirkumsida su yu homber Isaak dia ku e tabatin ocho dia, manera Dios a orden'e.

⁵Awor Abraham tabatin shen ana dia ku su yu homber Isaak a nase p'e.

⁶I Sara a bisa: "Dios a hasimi hari; tur hende ku tende lo hari huntu ku mi."

⁷Tambe el a bisa: "Ken lo a bisa Abraham ku Sara lo a duna yu pechu? Sinembargo, mi a hana un yu homber p'e den su biehes."

⁸I e mucha a krese bira grandi i a wordu kita for di pechu; i Abraham a hasi un fiesta grandi riba e dia ku Isaak a wordu kita for di pechu.

⁹Awor Sara a mira ku e yu homber, ku Hagar e egipsio a hana pa Abraham, tabata hasi bofon.

¹⁰Pesei el a bisa Abraham: "Kore ku e kria aki i ku su yu homber, pasobra e yu homber di e kria aki lo no ta eredero huntu ku mi yu Isaak."

¹¹I e asunto a duel Abraham masha pa motibu di su yu homber.

¹²Ma Dios a bisa Abraham: "No tene duele pa motibu di e mucha ni pa motibu di bo kria; kiko ku Sara bisabo, skuch'e, pasobra ta dor di Isaak bo desendientenan lo wordu konta.

¹³I di e yu homber di e kria tambe lo Mi traha un nashon, pasobra ta bo desendiente e ta."

¹⁴Pesei Abraham a lanta mainta tempran i a kohe pan i un saku di kueru ku awa aden i a duna Hagar esakinan, poniendo nan riba su skouder, i a dun'e e mucha i a mand'e bai. I el a bai i a dwal ront den e desierto di Beerseba.

¹⁵I e awa den e saku a kaba i el a laga e mucha bou di un di e matanan.

¹⁶E ora ei el a bai i a kai sinta enfrente di dje, na un distansia di un tira di flecha, pasobra el a bisa: "No lagami mira e mucha muri." I e tabata sinta enfrente di dje i a halsa su bos i a yora.

¹⁷Anto Dios a tende e mucha ta yora; i for di shelu e angel di Dios a yama Hagar i a bis'e: "Ta kiko a pasabo, Hagar? No tene miedu, pasobra Dios a tende bos di e mucha kaminda e ta.

¹⁸Lant'ariba, lanta e mucha i ten'e na su man, pasobra lo Mi traha un nashon grandi for di dje."

¹⁹E ora ei Dios a habri wowo di Hagar, i el a mira un pos di awa; i el a bai yena e saku ku awa i a duna e mucha bebe.

²⁰I Dios tabata ku e mucha, i el a krese bira grandi i a bai biba den desierto i a bira un tirado-di-flecha.

²¹I e tabata biba den e desierto di Paran; i su mama a tuma un esposa p'e for di tera di Egipto.

²²Awor a sosode na e tempu ei ku Abimelek i Fikol, e komandante di su ehersito, a papia ku Abraham, bisando: "Dios ta ku bo den tur loke bo ta hasi;

²³pesei awor, hurami akinan pa Dios, ku lo bo no trata ku engano ku mi, ni ku mi yunan, ni ku yu di mi yunan; ma di akuerdo ku e karino ku mi a mustra na bo, lo bo trata ami i e tera ku bo a keda biba aden pa un tempu."

²⁴I Abraham a bisa: "Mi ta hura esaki."

²⁵Ma Abraham a keha serka Abimelek pa motibu di e pos di awa ku e sirbidonan di Abimelek a kita for di nan.

²⁶I Abimelek a bisa: "Mi no sa ta ken a hasi e kos aki; ni abo no a kontami; ta te awe numa mi a tende di dje."

²⁷I Abraham a kohe karne i buey i a duna Abimelek nan; i nan dos a sera un aliansa.

²⁸Anto Abraham a separa shete lamchi muhe di e kria di bestia chikitu.

²⁹I Abimelek a bisa Abraham: "Kiko e shete lamchinan muhe aki, ku bo a aparta, ta nifika?"

³⁰I Abraham a bisa: "Tuma e shete lamchinan muhe aki for di mi man pa esaki por ta un testimonio pa mi, ku t'ami a koba e pos aki."

³¹Pesei el a yama e luga ei Beerseba, pasobra aya nan dos a hasi un huramentu.

³²Asina nan a sera un aliansa na Beerseba; i Abimelek i Fikol, e komandante di su ehersito, a lanta i a bolbe pa e tera di e filisteonan.

³³I Abraham a planta un palu di tamarisko na Beerseba, i ayanan el a invoka e nomber di SENOR, e Dios Eterno.

³⁴I Abraham a keda biba hopi dia na e tera di e filisteonan.