Read Papantla Totonac Genesis 22 Bible Online

Genesis 22 - Papantla Totonac bible

Genesis 22

¹Awor a sosode ku despues di e kosnan aki Dios a pone Abraham na prueba i a bis'e: "Abraham!" I el a bisa: "At'ami aki."

²I El a bisa: "Tuma bo yu homber awor, bo uniko yu, kende bo ta stima, Isaak, i bai na e tera di Moria, i ofres'e aya komo un ofrenda kima riba un di e serunan ku lo Mi bisabo di dje."

³Asina Abraham a lanta mainta tempran i a siya su buriku i a hiba dos di su sirbidonan huntu kune i su yu Isaak; i el a spleit palu pa e ofrenda kima i a lanta bai na e luga ku Dios a bis'e.

⁴Riba e di tres dia Abraham a hisa kara wak i a mira e luga na un distansia.

⁵I Abraham a bisa su sirbidonan: "Keda aki ku e buriku, i ami ku e mucha lo bai ayanan; i nos lo adora i bolbe serka boso."

⁶I Abraham a kohe e palu pa e ofrenda kima pone riba su yu Isaak, i el a kohe kandela i un kuchu den su man. Asina nan dos a sigui kana huntu.

⁷I Isaak a papia ku su tata Abraham i a bisa: "Mi tata!" I el a bisa: "At'ami aki, mi yu." I Isaak a bisa: "At'e (p\{| kandela i e palu aki, ma unda e lamchi pa e ofrenda kima ta?"

⁸Anto Abraham a bisa: "Mi yu, Dios lo provee pa Su mes e lamchi pa e ofrenda kima." Asina nan dos a sigui kana huntu.

⁹Anto nan a yega na e luga di kual Dios a bis'e; i Abraham a traha e altar ayanan, i a aregla e palu i a mara su yu Isaak i a pon'e riba e altar, riba e palu.

¹⁰I Abraham a saka su man kohe e kuchu pa mata su yu.

¹¹Ma e Angel di SENOR a yama bis'e for di shelu: "Abraham, Abraham!" I el a bisa: "At'ami aki."

¹²I El a bisa: "No pone man riba e mucha i no hasie nada, pasobra awor Mi sa ku bo ta teme Dios, komo ku bo no a nengaMi bo yu, bo uniko yu."

¹³E ora ei Abraham a hisa kara wak, i ata, su tras tabatin un karne chubatu ku a keda pega na su kachunan den un pida mondi-sera; i Abraham a bai i a kohe e karne chubatu i a ofres'e komo un ofrenda kima na luga di su yu.

¹⁴Anto Abraham a yama e luga ei SENOR-Lo-Provee, manera ta wordu bisa te dia djawe: "Den e seru di SENOR lo wordu provee."

¹⁵E ora ei e Angel di SENOR a yama Abraham pa di dos biaha for di shelu,

¹⁶i a bisa: "Pa Mi mes Mi ta hura, SENOR ta deklara, ku pasobra bo a hasi e kos aki i no a nenga bo yu, bo uniko yu,

¹⁷di berdat lo Mi bendishonabo grandemente, i lo Mi multiplika bo desendientenan grandemente manera e streanan di e shelunan i manera e santu ku tin kantu di laman; i bo desendientenan lo posee e porta di nan enemigunan.

¹⁸I den bo desendientenan tur e nashonnan di e tera lo ta bendishona, pasobra bo a obedese Mi bos."

¹⁹Asina Abraham a bolbe serka su sirbidonan, i nan a sali bai Beerseba huntu; i Abraham a keda biba na Beerseba.

²⁰Awor a sosode ku despues di e kosnan aki nan a duna Abraham notisia, bisando: "Mira, Milka tambe a hana yu pa bo ruman homber Nakor:

²¹Uz, su primogenito, Buz, su ruman homber, i Kemuel, tata di Aram,

²²i Kesed, Hazo, Pildas, Jidlaf i Betuel."

²³I Betuel a engendra Rebeka. E ochonan aki Milka a hana pa Nakor, ruman homber di Abraham.

²⁴I tambe su konkubina ku tabata yama Reuma a duna lus na Teba, Gaham, Tahas i Maaka.