Read Papantla Totonac Genesis 23 Bible Online

Genesis 23 - Papantla Totonac bible

Genesis 23

¹Awor Sara a biba shent'i bint'i shete ana; esakinan tabata e ananan di Sara su bida.

²I Sara a muri na Kiriat-arba (esta, Hebron) na tera di Kanaan; i Abraham a bin pa tene rou pa Sara i pa yor'e.

³E ora ei Abraham a lanta for di dilanti di su defunto i a papia ku e yu hombernan di Het, bisando:

⁴"Mi ta un stranhero i mi ta keda biba pa un tempu meimei di boso; dunami pida tereno-pa-dera-morto aki serka boso, pa mi dera mi defunto kit'e for di mi bista."

⁵I e yu hombernan di Het a kontesta Abraham i a bis'e:

⁶"Skucha nos, mi senor, bo ta un prens poderoso meimei di nos; dera bo defunto den e miho di nos grafnan; ningun di nos lo no nengabo su graf pa dera bo defunto."

⁷Asina Abraham a lanta i a buig dilanti di e pueblo di e tera, e yu hombernan di Het.

⁸I el a papia ku nan, bisando: "Si ta boso deseo pa mi dera mi defunto kit'e for di mi bista, tendemi, i aserka Efron, yu homber di Zohar, pa mi,

⁹p'e dunami e kueba di Makpela ku ta pertenese na dje i ku ta keda na fin di su kunuku; lagu'e dunami esei pa loke e bal, komo pida tereno-pa-dera-morto aki serka boso."

¹⁰Awor Efron tabata sinta huntu ku e yu hombernan di Het; i Efron e heteo a kontesta Abraham pa e yu hombernan di Het tende, pa tur esnan ku tabata drenta na porta di su stat tende:

¹¹"No, mi senor, tendemi; mi ta dunabo e kunuku i mi ta dunabo e kueba ku ta keda den dje. Den presensia di e yu hombernan di mi pueblo mi ta dunabo esaki; dera bo defunto."

¹²I Abraham a buig dilanti di e pueblo di e tera.

¹³I el a papia ku Efron pa e pueblo di e tera tende, bisando: "Pa fabor, skuchami; mi ta duna e preis di e kunuku, asepta esaki di mi pa mi dera mi defunto ayanan."

¹⁴E ora ei Efron a kontesta Abraham i a bis'e:

¹⁵"Mi senor, skuchami; un pida tereno ku ta bal kuater shen siklo di plata, kiko esei ta entre abo i ami? Pues, bai dera bo defunto."

¹⁶I Abraham a skucha Efron; i Abraham a pisa pa Efron e plata ku el a menshona pa e yu hombernan di Het tende, kuater shen siklo di plata, manera un komersiante ta kalkula.

¹⁷Asina e kunuku di Efron ku tabata keda na Makpela enfrente di Mamre, e kunuku i e kueba ku tabata keda den dje i tur e palunan ku tabatin den e kunuku, riba henter su tereno ku tabata rondon'e, a wordu pasa

¹⁸pa Abraham komo propiedat den presensia di e yu hombernan di Het, dilanti di tur esnan ku tabata drenta porta di su stat.

¹⁹I despues di esaki Abraham a dera su esposa Sara den e kueba di e kunuku di Makpela enfrente di Mamre (esta, Hebron), na tera di Kanaan.

²⁰Asina e kunuku, i e kueba ku ta keda den dje, a wordu pasa pa Abraham dor di e yu hombernan di Het, komo pida tereno-pa-dera-morto.