Read Papantla Totonac Genesis 24 Bible Online

Genesis 24 - Papantla Totonac bible

Genesis 24

¹Awor Abraham tabata bieu, di edat avansa, i SENOR a bendishona Abraham den tur kos.

²I Abraham a bisa su sirbido, esun di mas bieu di su kas, kende tabata enkarga ku tur loke e tabatin: "Pa fabor, pone bo man bou di mi bel di pia,

³i lo mi hasibo hura na SENOR, e Dios di shelu i e Dios di tera, ku lo bo no tuma un esposa pa mi yu homber for di e yu muhenan di e kananeonan, meimei di kendenan mi ta biba,

⁴ma lo bo bai na mi pais i serka mi famianan, i tuma un esposa pa mi yu Isaak."

⁵I e sirbido a bis'e: "Supone ku e muhe no kier siguimi bin na e tera aki; mi mester hiba bo yu homber bek na e tera for di unda bo a bin?"

⁶E ora ei Abraham a bis'e: "Perkura pa bo no hiba mi yu homber bek ayanan!

⁷SENOR, e Dios di shelu, Kende a tumami for di kas di mi tata i for di e tera di mi nasementu, i Kende a papia ku mi i Kende a hurami, bisando: 'Na bo desendientenan Mi ta duna e tera aki', E lo manda Su angel bo dilanti, i lo bo tuma un esposa pa mi yu for di ayanan.

⁸Ma si e muhe no kier siguibo, e ora ei lo bo ta liber di e huramentu aki di mi; solamente, no hiba mi yu homber bek ayanan."

⁹Asina e sirbido a pone su man bou di bel di pia di su shon Abraham, i a hur'e tokante di e asunto aki.

¹⁰E ora ei e sirbido a kohe dies kamel for di e kamelnan di su shon i a sali bai ku tur klase di kos bon di su shon; i el a lanta i a bai Mesopotamia, e stat di Nakor.

¹¹I el a laga e kamelnan hinka rudia pafo di stat banda di e pos di awa na ora di atardi, e ora ku e muhenan ta sali bai saka awa.

¹²I el a bisa: "O SENOR, e Dios di mi shon Abraham, pa fabor, dunami eksito awe, i mustra miserikordia na mi shon Abraham.

¹³At'ami para na e fuente di awa, i e yu muhenan di e hombernan di e stat ta sali pa saka awa;

¹⁴awor laga ku e mucha muhe ku mi bisa: 'Pa fabor, pone bo purun abou pa mi bebe,' i ku kontesta: 'Bebe, i lo mi duna bo kamelnan tambe di bebe'; laga esei ta esun ku Bo a apunta pa Bo sirbido Isaak; i na esaki lo mi sa ku Bo a mustra miserikordia na mi shon."

¹⁵I a sosode ku prome ku el a kaba di papia, ata Rebeka ku a nase pa Betuel, yu homber di Milka, esposa di Abraham su ruman homber Nakor, a sali ku su purun riba su skouder.

¹⁶I e mucha muhe tabata masha bunita, un birgen, i ningun homber no tabatin relashon kune nunka; i el a baha bai na e fuente, a yena su purun, i a subi bek.

¹⁷E ora ei e sirbido a kore bai kontr'e i a bisa: "Pa fabor, lagami bebe un tiki awa for di bo purun."

¹⁸I el a bisa: "Bebe, mi senor"; i el a baha su purun lihe ten'e den su man i a dun'e di bebe.

¹⁹Awor ora ku el a kaba di dun'e di bebe, el a bisa: "Lo mi saka awa pa bo kamelnan tambe te ora ku nan a kaba di bebe."

²⁰I mesora el a basha e awa for di su purun den e baki i a kore bai bek na e pos pa saka awa, i el a saka awa pa tur su kamelnan.

²¹Mientrastantu e homber tabata keda wak e sin bisa nada, pa sa si SENOR a hasi su biahe eksitoso si of no.

²²I a sosode ku ora e kamelnan a kaba di bebe, e homber a kohe un renchi di oro ku tabata pisa mitar siklo i dos armbant ku tabata pisa dies siklo na oro,

²³i a bis'e: "Yu di ken bo ta? Pa fabor, bisami, tin luga pa nos hospeda den kas di bo tata?"

²⁴I Rebeka a bis'e: "Mi ta yu muhe di Betuel, yu homber di Milka, ku el a hana pa Nakor."

²⁵Ademas, el a bis'e: "Nos tin tantu yerba seku komo kuminda pa bestia na abundansia, i luga pa hospeda."

²⁶E ora ei e homber a buig te na suela i a adora SENOR.

²⁷I el a bisa: "Bendishona sea SENOR, e Dios di mi shon Abraham, Kende no a kita Su miserikordia i Su berdat for di mi shon; pa loke t'ami, ta SENOR a guiami riba e kaminda pa kas di mi shon su rumannan."

²⁸E ora ei e mucha muhe a kore bai i a konta e hendenan di kas di su mama e kosnan aki.

²⁹Awor Rebeka tabatin un ruman homber ku yama Laban, i Laban a kore sali bai serka e homber na e fuente di awa.

³⁰I a sosode ku ora el a mira e renchi i e armbantnan na man di su ruman muhe, i ora ku el a tende e palabranan di su ruman Rebeka, kende a bisa: "Asin'aki e homber a bisami," el a bai serka e homber, i mira, esaki tabata para banda di e kamelnan na e pos.

³¹I el a bisa: "Drenta, abo ku ta bendishona di SENOR! Pakiko bo ta para pafo, siendo ku mi a prepara e kas i un luga pa e kamelnan?"

³²Asina e homber a bai den e kas. E ora ei Laban a deskarga e kamelnan, i el a duna e kamelnan yerba seku i kuminda, i awa pa laba su pia i pia di e hombernan ku tabata huntu kune.

³³Ma ora kuminda a wordu poni su dilanti p'e kome, el a bisa: "Mi no ta kome prome ku mi duna mi rospondi." I Laban a bisa: Tapia."

³⁴Anto el a bisa: "Mi ta sirbido di Abraham.

³⁵I SENOR a bendishona mi shon grandemente, asina ku el a bira riku; i El a dun'e karne i baka, plata i oro, sirbido homber i muhe, kamel i buriku.

³⁶I Sara, esposa di mi shon, a hana un yu homber pa mi shon den su biehes; i mi shon a duna e yu tur loke e tin.

³⁷I mi shon a hasimi hura, bisando: 'Bo no mag tuma un esposa pa mi yu for di e yu muhenan di e kananeonan, den kendenan su tera mi ta biba,

³⁸ma bai kas di mi tata i serka mi famianan, i tuma un esposa pa mi yu.'

³⁹"I mi a bisa mi shon: 'Podise e muhe no kier siguimi.'

⁴⁰"I el a bisami: 'SENOR, den Kende Su presensia mi a kana, lo manda Su angel huntu ku bo pa hasi bo biahe eksitoso, i lo bo tuma un esposa pa mi yu for di mi famianan i for di kas di mi tata.

⁴¹Anto lo bo ta liber di mi huramentu ora bo yega serka mi famianan; pasobra si nan no dunabo e, e ora ei lo bo ta liber di mi huramentu.'

⁴²"Asina mi a bin awe na e pos i a bisa: 'O SENOR, e Dios di mi shon Abraham, si awor Bo kier hasi e biahe ku mi ta hasi un eksito,

⁴³at'ami para na e pos; laga t'asina ku e mucha muhe ku bin pa saka awa i na kende mi bisa: "Pa fabor, lagami bebe un tiki awa for di bo purun",

⁴⁴i e bisami: "Abo bebe, i lo mi saka awa pa bo kamelnan tambe", laga esei ta e muhe ku SENOR a apunta pa e yu di mi shon.'

⁴⁵"Prome ku mi a kaba di bisa esaki den mi mes, ata Rebeka a sali ku su purun riba su skouder i a baha bai na e pos i a saka awa; i mi a bis'e: 'Pa fabor, lagami bebe.'

⁴⁶"I el a baha su purun mesora for di su skouder, i a bisa: 'Bebe, i lo mi duna bo kamelnan tambe di bebe'; asina mi a bebe, i el a duna e kamelnan tambe di bebe.

⁴⁷"E ora ei mi a puntr'e i a bisa: 'Yu di ken bo ta?' "I el a bisa: 'Yu di Betuel, yu homber di Nakor, ku Milka a hana p'e'. "Anto mi a pone e renchi na su nanishi i e armbantnan na su mannan.

⁴⁸I mi a buig te na suela i a adora SENOR, i mi a bendishona SENOR, e Dios di mi shon Abraham, Kende a guiami den e kaminda korekto pa tuma yu muhe di famia di mi shon pa su yu homber.

⁴⁹Pesei anto, si bo ta bai mustra mi shon miserikordia i berdat, bisami; i si no, lagami sa, pa mi bira na man drechi of na man robes."

⁵⁰E ora ei Laban i Betuel a kontesta i a bisa: "E asunto aki ta bin di SENOR; pesei nos no por papia ni bon ni malu ku bo.

⁵¹Ata Rebeka bo dilanti, tum'e i bai kune, i lagu'e ta esposa di e yu di bo shon, manera SENOR a papia."

⁵²I a sosode ku ora e sirbido di Abraham a tende nan palabranan, el a buig te na suela dilanti di SENOR.

⁵³E ora ei e sirbido a saka artikulonan di plata i artikulonan di oro i bisti, i a duna Rebeka nan; tambe el a duna su ruman homber i su mama kosnan presioso.

⁵⁴I e sirbido i e hombernan ku tabata huntu kune a kome i bebe i a keda pasa nochi. Ora nan a lanta mainta, el a bisa: "Lagami bai serka mi shon."

⁵⁵Ma Rebeka su ruman homber i su mama a bisa: "Laga e mucha muhe keda un par di dia serka nos, por lo menos dies dia; despues e por bai."

⁵⁶I e sirbido a bisa nan: "No tardami, ya ku SENOR a prospera mi kaminda. Lagami bai pa mi bolbe serka mi shon."

⁵⁷I nan a bisa: "Nos lo yama e mucha muhe i puntr'e personalmente."

⁵⁸E ora ei nan a yama Rebeka i a bis'e: "Bo kier bai ku e homber aki?" I el a bisa: "Mi kier bai."

⁵⁹Asina nan a manda nan ruman Rebeka i su yaya bai ku e sirbido di Abraham i e hombernan ku tabata huntu kune.

⁶⁰Anto nan a bendishona Rebeka i a bis'e: "Nos ruman, ohala ku bo bira mama di miles i miles, i bo desendientenan posee e porta di esnan ku ta odia nan."

⁶¹E ora ei Rebeka i su krianan a lanta, i nan a subi e kamelnan i a sigui e homber. Asina e sirbido a tuma Rebeka i a bai.

⁶²Awor Isaak a kaba di yega for di Beer-lahai-roi, pasobra e tabata biba na Negev.

⁶³I na ora di atardi Isaak a sali bai medita den kunuku; i el a hisa kara wak, i ata, tabatin kamelnan ta bin.

⁶⁴Anto Rebeka a hisa su kara, i ora ku el a mira Isaak, el a baha for di e kamel.

⁶⁵I el a bisa e sirbido: "Ta ken e homber ei ku ta kana den kunuku pa bin topa ku nos?" I e sirbido a bisa: "Ta mi shon." E ora ei Rebeka a kohe su velo i a tapa su mes kune.

⁶⁶I e sirbido a konta Isaak tur loke ku el a hasi.

⁶⁷E ora ei Isaak a hiba Rebeka den tent di su mama Sara, i el a tuma Rebeka i esaki a bira su esposa, i el a stim'e. Asina Isaak a hana konsuelo despues di morto di su mama.