Read Papantla Totonac Genesis 25 Bible Online

Genesis 25 - Papantla Totonac bible

Genesis 25

¹Awor Abraham a tuma un otro esposa ku tabata yama Ketura.

²I esaki a hana Zimram, Joksan, Medan, Madian, Isbak i Sua pa Abraham.

³I Joksan a engendra Seba i Dedan. I e yu hombernan di Dedan tabata Asurim, Letusim i Leumim.

⁴I e yu hombernan di Madian tabata Efa, Efer, Hanok, Abida i Elda. Tur esakinan tabata yu hombernan di Ketura.

⁵I Abraham a duna Isaak tur loke e tabatin,

⁶ma e yu hombernan di su konkubinanan Abraham a duna regalo, mientras ku e tabata na bida ainda, i a manda nan bai for di su yu Isaak, direkshon pariba, na e pais di oriente.

⁷I esakinan ta tur e ananan di Abraham su bida, ku el a biba: shent'i setent'i sinku ana.

⁸I Abraham a hala su ultimo rosea i a muri na un edat hopi avansa, un homber bieu i satisfecho di su bida, i el a wordu reuni ku su pueblo.

⁹E ora ei su yu hombernan Isaak i Ismael a der'e den e kueba di Makpela, den e kunuku di Efron, yu homber di Zohar e heteo, enfrente di Mamre,

¹⁰e kunuku ku Abraham a kumpra serka e yu hombernan di Het; ayanan Abraham a wordu dera serka su esposa Sara.

¹¹I a sosode ku despues di morto di Abraham Dios a bendishona su yu Isaak; i Isaak tabata biba na Beer-lahai-roi.

¹²Awor esakinan ta e generashonnan di Ismael, yu homber di Abraham, ku Hagar e egipsio, kria di Sara, a hana pa Abraham.

¹³I esakinan ta e nombernan di e yu hombernan di Ismael, nombra den e orden di nan nasementu: Nebaiot, e primogenito di Ismael, i Kedar, Adbeel i Mibsam,

¹⁴Misma, Duma i Masa,

¹⁵Hadar, Tema, Jetur, Nafis i Kedema.

¹⁶Esakinan ta e yu hombernan di Ismael i esakinan ta nan nombernan, segun nan statnan i segun nan kampamentunan; diesdos prens konforme nan tribunan.

¹⁷I esakinan ta e ananan di bida di Ismael: shent'i trint'i shete ana; i el a hala su ultimo rosea i a muri i a wordu reuni ku su pueblo.

¹⁸I nan tabata biba di Havila te na Shur ku ta keda pariba di Egipto ora bo ta bai den direkshon di Asiria; el a muri den presensia di tur su famianan.

¹⁹Awor esakinan ta e generashonnan di Isaak, yu homber di Abraham. Abraham a engendra Isaak;

²⁰i Isaak tabatin kuarenta ana tempu ku el a tuma Rebeka, yu muhe di Betuel, e amoreo di Padan-aram, ruman muhe di Laban e amoreo, pa ta su esposa.

²¹Anto Isaak a hasi orashon na SENOR pa su esposa, pasobra esaki tabata steril; i SENOR a kontest'e i su esposa Rebeka a sali na estado.

²²Ma e yunan tabata bringa ku otro den su barika, i el a bisa: "Si t'asina, ta pakiko esaki ta pasa ku mi?" Pesei el a bai konsulta ku SENOR.

²³I SENOR a bis'e: "Ta dos nashon tin den bo barika; i ta dos pueblo lo wordu separa for di bo kurpa; i esun pueblo lo ta mas fuerte ku e otro; i esun mayo lo sirbi esun mas chikitu."

²⁴Ora su dianan pa duna lus a keda kumpli, ata, tabatin yu morocho den su barika.

²⁵I e prome yu a nase kora, tur na kabei, manera un bisti di lana; i nan a dun'e e nomber Esau.

²⁶I despues su ruman homber a nase, ku su man ta tene hilchi di Esau; pesei el a wordu yama Jakob; i Isaak tabatin sesenta ana dia ku Rebeka a hana nan.

²⁷Ora ku e muchanan a krese bira grandi, Esau a bira un bon yagdo, un homber di kunuku; ma Jakob tabata un homber trankil ku tabata biba den tent.

²⁸Awor Isaak tabata stima Esau, pasobra e tabata gusta kome bestia ku e yag, ma Rebeka tabata stima Jakob.

²⁹Awor Jakob a kushina stoba, i Esau a bin di kunuku i tabata mort'i hamber;

³⁰i Esau a bisa Jakob: "Pa fabor, dunami di e stoba kora ei pa mi kome, pasobra mi ta mort'i hamber." Pesei el a wordu yama Edom.

³¹Ma Jakob a bisa: "Bendemi bo derecho di primogenitura prome."

³²I Esau a bisa: "Mira, mi ta serka di muri; di kiko anto e derecho di primogenitura ta sirbimi?"

³³Anto Jakob a bisa: "Hurami prome"; asina el a hur'e i a bende su derecho di primogenitura ku Jakob.

³⁴E ora ei Jakob a duna Esau pan i stoba di lenteha, i el a kome i bebe i a lanta bai. Asina Esau a despresia su derecho di primogenitura.