Read Papantla Totonac Genesis 26 Bible Online

Genesis 26 - Papantla Totonac bible

Genesis 26

¹Awor tabatin un hamber na e tera, ademas di e hamber ku tabatin prome den e dianan di Abraham. Pesei Isaak a bai Gerar serka Abimelek, rei di e filisteonan.

²I SENOR a parese na dje i a bisa: "No baha bai Egipto; keda biba na e tera ku lo Mi bisabo di dje.

³Keda biba pa un tempu na e tera aki i lo Mi ta ku bo i bendishonabo, pasobra abo i bo desendientenan lo Mi duna tur e teranan aki, i lo Mi stablese e huramentu ku Mi a hura na bo tata Abraham.

⁴I lo Mi multiplika bo desendientenan manera e streanan di shelu, i lo Mi duna bo desendientenan tur e teranan aki; i den bo desendientenan tur e nashonnan di mundu lo ta bendishona,

⁵pasobra Abraham a obedeseMi i a kumpli ku Mi ordu, Mi mandamentunan, Mi statutonan i Mi leinan."

⁶Asina Isaak a keda biba na Gerar.

⁷Ora ku e hombernan di e luga a hasie pregunta tokante di su esposa, el a bisa: "Ta mi ruman e ta," pasobra e tabatin miedu di bisa: "Ta mi esposa e ta", pensando, "e hombernan di e luga ta kapas di matami pa motibu di Rebeka, pasobra e ta bunita."

⁸I a sosode ku ora e tabata ayanan pa basta tempu, Abimelek, rei di e filisteonan, tabata wak dor di bentana, i mira, ata Isaak tabata karisia su esposa Rebeka.

⁹E ora ei Abimelek a yama Isaak i a bisa: "Mira, siertamente ta bo esposa e ta! Kon anto bo a bisa: 'Ta mi ruman e ta'?" I Isaak a bis'e: "Pasobra mi a bisa: 'Mi por muri pa su motibu.'"

¹⁰I Abimelek a bisa: "Ta kiko e kos aki ta ku bo a hasi ku nos? Fasilmente un hende di e pueblo por a drumi ku bo esposa, i lo bo a trese kulpa riba nos."

¹¹Asina Abimelek a ordena henter e pueblo, bisando: "Esun ku mishi ku e homber aki of ku su esposa mester wordu mata sigur."

¹²Awor Isaak a sembra den e tera ei, i den e mesun ana a kosecha shen bes mas tantu. I SENOR a bendishon'e,

¹³i e homber a bira riku i a sigui bira mas riku te ora ku el a bira masha riku mes,

¹⁴pasobra e tabatin krianan di bestia chikitu i krianan di baka i gran kantidat di sirbido, asina ku e filisteonan tabata envidi'e.

¹⁵Awor tur e posnan ku e sirbidonan di su tata a koba den e dianan di su tata Abraham, e filisteonan a dempel dor di yena nan ku tera.

¹⁶E ora ei Abimelek a bisa Isaak: "Bai for di nos, pasobra bo ta muchu mas poderoso ku nos."

¹⁷Anto Isaak a bai for di einan i a lanta kampamentu den e vaye di Gerar i a keda biba aya.

¹⁸E ora ei Isaak a bolbe koba e posnan di awa ku nan a koba den e dianan di su tata Abraham, pasobra e filisteonan a dempel nan despues di morto di Abraham; i el a duna nan e mesun nombernan ku su tata a duna nan.

¹⁹Ma ora ku e sirbidonan di Isaak a koba den e vaye i ayanan a hana un pos di awa bibu,

²⁰e wardadonan di Gerar a pleita ku e wardadonan di Isaak, bisando: "Ta di nos e awa ta!" Pesei el a yama e pos Esek, pasobra nan a pleita kune.

²¹Despues nan a koba un otro pos, i nan a pleita pa esaki tambe; pesei el a yam'e Sitna.

²²I el a bai for di einan i a koba un otro pos, i pa esun ei nan no a pleita; i el a yama esei Rehobot, pasobra el a bisa: "Porfin SENOR a traha luga pa nos, i nos lo ta fruktifero den e tera."

²³Despues el a sali for di einan bai Beerseba.

²⁴I SENOR a parese na dje den e anochi ei i a bisa: "Ami ta e Dios di bo tata Abraham; no tene miedu, pasobra Mi ta ku bo. Lo Mi bendishonabo i multiplika bo desendientenan pa kousa di Mi sirbido Abraham."

²⁵Pesei el a traha un altar ayanan i a invoka e nomber di SENOR, i a lanta su tent ayanan. I ayanan e sirbidonan di Isaak a koba un pos.

²⁶Anto Abimelek a bin serka dje for di Gerar ku su konsehero Ahuzat i e komandante di su ehersito Fikol.

²⁷I Isaak a bisa nan: "Pakiko boso a bin serka mi, siendo ku boso ta odiami i a mandami bai for di boso?"

²⁸I nan a bisa: "Nos ta mira klaramente ku SENOR ta ku bo; pesei nos a bisa: 'Laga tin awor un huramentu entre nos, entre abo i nos, i laga nos sera un aliansa ku bo,

²⁹ku lo bo no hasi nos dano, meskos ku nos no a mishi ku bo i a hasi solamente bon pa bo, i a mandabo bai na pas. Awor bo ta e bendishona di SENOR.'"

³⁰E ora ei el a hasi un fiesta pa nan, i nan a kome i bebe.

³¹I nan a lanta mainta tempran i a hasi un huramentu na otro. E ora ei Isaak a despedi di nan, i nan a bai for di dje na pas.

³²Awor a sosode ku riba e mesun dia ei Isaak su sirbidonan a bin kont'e di e pos ku nan a koba i a bis'e: "Nos a hana awa."

³³I Isaak a yama esaki Seba; pesei nomber di e stat ta Beerseba te dia djawe.

³⁴I tempu ku Esau tabatin kuarenta ana, el a kasa ku Judith, yu muhe di Beeri e heteo, i ku Basemat, yu muhe di Elon e heteo.

³⁵I nan a trese amargura den bida di Isaak i Rebeka.