Read Papantla Totonac Genesis 27 Bible Online

Genesis 27 - Papantla Totonac bible

Genesis 27

¹Awor a sosode ku ora Isaak a bira bieu i su wowonan asina skur ku e no por a mira mas, el a yama Esau, su yu homber mayo, i a bis'e: "Mi yu." I el a bis'e: "At'ami aki."

²I Isaak a bisa: "Mira, mi a bira bieu, mi no sa e dia di mi morto.

³Pesei anto, pa fabor, kohe bo armanan, bo muchila-pa-karga-flecha i bo bog i bai den kunuku i tira un bestia pa mi;

⁴i prepara un plato sabroso pa mi, manera mi gusta, i tres'e pa mi kome, pa mi alma bendishonabo prome ku mi muri."

⁵Anto Rebeka tabata skucha ora ku Isaak tabata papia ku su yu Esau. Asina, ora Esau a bai kunuku pa tira bestia pa hiba kas,

⁶Rebeka a bisa su yu Jakob: "Mira, mi a tende bo tata ta papia ku bo ruman Esau, bisando:

⁷'Trese un bestia ku bo a tira pa mi i prepara un plato sabroso pa mi, pa mi kome i bendishonabo den e presensia di SENOR prome ku mi muri.'

⁸Pesei anto, mi yu, skuchami den loke mi ta mandabo.

⁹Bai awor na e kria di bestia chikitu i trese pa mi dos di e miho yunan di kabritu for di einan, pa ku nan mi prepara un plato sabroso pa bo tata, manera e ta gusta.

¹⁰E ora ei lo bo hib'e pa bo tata p'e kome, pa e bendishonabo prome ku e muri."

¹¹I Jakob a kontesta su mama Rebeka: "Mira, mi ruman Esau ta un homber tur na kabei, i ami no.

¹²Podise mi tata ta bai fulami, e ora ei lo mi ta manera un ganado den su bista; i lo mi trese maldishon riba mi mes i no bendishon."

¹³Ma su mama a bis'e: "Bo maldishon sea riba mi, mi yu; solamente obedese mi bos, i bai buska nan pa mi."

¹⁴Asina el a bai kohe nan i a trese nan pa su mama, i su mama a traha kuminda sabroso manera su tata ta gusta.

¹⁵Anto Rebeka a kohe e miho pananan di su yu mayo Esau ku e tabatin serka dje na kas, i a laga Jakob, su yu homber mas chikitu, bisti nan.

¹⁶I el a pone e kuerunan di e yunan di kabritu riba su mannan i riba e parti di su nek ku no tabatin kabei.

¹⁷Tambe el a duna su yu homber Jakob e kuminda sabroso i e pan ku el a prepara.

¹⁸E ora ei esaki a bai serka su tata i a bisa: "Mi tata." I su tata a bisa: "At'ami aki. Ken bo ta, mi yu?"

¹⁹I Jakob a bisa su tata: "Ami ta Esau, bo primogenito; mi a hasi manera bo a bisami. Pa fabor, bai sinta i kome di loke mi a tira, pa bo bendishonami."

²⁰Ma Isaak a bisa su yu: "Ta kon bo a han'e lihe asina, mi yu?" I el a bisa: "Pasobra SENOR bo Dios a tres'e pa mi."

²¹E ora ei Isaak a bisa Jakob: "Pa fabor, hala serka pa mi fulabo, mi yu, si ta di berdat bo ta mi yu Esau, of no."

²²Asina Jakob a hala serka su tata Isaak, i su tata a ful'e i a bisa: "E bos ta bos di Jakob, ma e mannan ta mannan di Esau."

²³I e no a rekonos'e, pasobra su mannan tabata yen di kabei, manera man di su ruman Esau; i el a bendishon'e.

²⁴I el a bisa: "Di berdat bo ta mi yu Esau?" I el a bisa: "Si."

²⁵E ora ei el a bisa: "Trese e kuminda pa mi, i lo mi kome di loke mi yu a tira, pa mi bendishonabo." I Jakob a tres'e p'e, i el a kome; tambe el a trese bina p'e, i el a bebe.

²⁶E ora ei su tata Isaak a bis'e: "Pa fabor, hala serka i dunami un sunchi, mi yu."

²⁷Asina el a hala serka i a dun'e un sunchi; i ora ku el a hana holo di su pana, el a bendishon'e i a bisa: "Mira, e holo di mi yu ta manera e holo di un kunuku ku SENOR a bendishona.

²⁸Awor, ku Dios dunabo di e serena di shelu, i di e gordura di tera, i un abundansia di mainshi i bina nobo;

²⁹ku pueblonan sirbibo, i nashonnan buig pa bo. Sea shon di bo rumannan, i ku e yu hombernan di bo mama buig pa bo. Maldishona sea esnan ku maldishonabo, i bendishona sea esnan ku bendishonabo."

³⁰Awor a sosode ku asina Isaak a kaba di bendishona Jakob, i Jakob apenas a sali for di presensia di su tata Isaak, ata su ruman Esau a yega di su yagmentu.

³¹E ora ei e tambe a traha kuminda sabroso hiba pa su tata. I el a bisa su tata: "Laga mi tata lanta, i kome di loke su yu a tira, pa bo bendishonami."

³²I su tata Isaak a bis'e: "Ta ken bo ta?" I el a bisa: "Mi ta bo yu, bo primogenito Esau."

³³E ora ei Isaak a kuminsa tembla masha hopi mes, i el a bisa: "Ta ken a tira bestia trese pa mi anto, asina ku mi a kome tur di dje prome ku bo bin, i a bendishon'e? Si, i e lo ta bendishona."

³⁴Ora Esau a tende e palabranan di su tata, el a dal un gritu masha duru i masha amargo mes, i a bisa su tata: "Bendishonami, ami tambe, O mi tata!"

³⁵Ma el a bisa: "Bo ruman a bin ku engano i a kita bo bendishon."

³⁶I Esau a bisa: "No ta ku rason e ta wordu yama Jakob? Pasobra ya el a ganami dos biaha kaba. El a kita mi derecho di primogenitura, i at'awor el a kita mi bendishon." I el a bisa: "Bo no a warda un bendishon pa mi?"

³⁷Ma Isaak a kontesta i a bisa Esau: "Mira, mi a hasie bo shon, i henter su famia mi a dun'e komo sirbido, i ku mainshi i bina nobo mi a sosten'e. Awor abo, kiko asina mi por hasi pa bo, mi yu?"

³⁸I Esau a bisa su tata: "Ta un bendishon so bo tin, mi tata? Bendishonami, ami tambe, O mi tata." I Esau a halsa su bos i a yora.

³⁹E ora ei su tata Isaak a kontesta i a bis'e: "Mira, bo luga di biba lo ta leu for di e fertilidat di tera, i leu for di e serena di shelu for di ariba.

⁴⁰Pa medio di bo spada lo bo biba, i bo ruman homber lo bo sirbi; ma lo sosode ku ora bo hasi esfuerso, lo bo kibra su yugo kita for di bo nek."

⁴¹Asina Esau tabatin renkor kontra Jakob pa motibu di e bendishon ku su tata a bendishon'e kune, i Esau a bisa den su mes: "E dianan di tene rou pa mi tata ta serka; e ora ei lo mi mata mi ruman Jakob."

⁴²Ora nan a konta Rebeka e palabranan di su yu mayo Esau, el a manda yama su yu mas chikitu Jakob, i a bis'e: "Mira, bo ruman Esau ta konsola su mes ku e pensamentu ku e tin pa matabo.

⁴³Awor pesei, mi yu, obedese mi bos i lanta, hui bai Haran serka mi ruman homber Laban!

⁴⁴I keda algun dia serka dje, te ora ku e furia di bo ruman baha,

⁴⁵te ora ku e rabia ku bo ruman tin riba bo baha, i e lubida kiko bo a hasi kune. E ora ei lo mi manda buskabo for di ayanan. Pakiko mi mester wordu roba di boso tur dos riba e mesun dia?"

⁴⁶I Rebeka a bisa Isaak: "Mi ta fada di mi bida pa motibu di e yu muhenan di Het; si Jakob tuma un esposa manera esakinan, for di e yu muhenan di Het, for di e yu muhenan di e tera, pakiko biba ainda anto?"