Read Papantla Totonac Genesis 28 Bible Online

Genesis 28 - Papantla Totonac bible

Genesis 28

¹Asina Isaak a yama Jakob i a bendishon'e i a dun'e ordu i a bis'e: "No tuma un esposa for di e yu muhenan di Kanaan.

²Lanta, bai Padan-aram, na kas di Betuel, tata di bo mama; i tuma pa bo mes for di ayanan un esposa for di e yu muhenan di Laban, ruman homber di bo mama.

³I ku Dios Todopoderoso bendishonabo i hasibo fruktifero i multiplikabo, pa bo bira un multitut di pueblonan.

⁴Ku E dunabo tambe e bendishon di Abraham, abo i tur bo desendientenan huntu ku bo, pa bo posee e tera kaminda bo ta keda biba pa un tempu, kual Dios a duna Abraham."

⁵Asina Isaak a manda Jakob bai, i el a bai Padan-aram serka Laban, yu homber di Betuel e arameo, ruman homber di Rebeka, mama di Jakob i Esau.

⁶Awor Esau a mira ku Isaak a bendishona Jakob i a mand'e bai Padan-aram, pa tuma pa su mes un esposa for di ayanan, i ku ora el a bendishon'e, el a dun'e ordu, bisando: "No tuma un esposa for di e yu muhenan di Kanaan,"

⁷i ku Jakob a obedese su tata i su mama i a bai Padan-aram.

⁸Asina Esau a mira ku e yu muhenan di Kanaan no tabata agrada su tata Isaak;

⁹anto Esau a bai serka Ismael, i ademas di e esposanan ku e tabatin kaba, el a tuma komo su esposa Mahalat, yu muhe di Ismael, yu homber di Abraham, ruman muhe di Nebaiot.

¹⁰Despues Jakob a sali for di Beerseba bai Haran.

¹¹I el a yega na un luga i ayanan el a pasa nochi, pasobra solo a baha kaba; i el a kohe un di e piedranan di e luga, pon'e bou di su kabes i a kai drumi na e luga ei.

¹²I el a sona, i mira, un trapi a wordu poni riba tera ku su parti di ariba alkansando shelu. I mira, e angelnan di Dios tabata subi baha riba dje.

¹³I mira, SENOR tabata para te ariba di e trapi i tabata bisa: "Ami ta SENOR, e Dios di bo tata Abraham i e Dios di Isaak; e tera ku bo ta drumi ariba lo Mi duna abo i bo desendientenan.

¹⁴Tambe bo desendientenan lo ta manera e stof di tera i lo bo plama bai pabou, pariba, panort i pasuit; i den bo i den bo desendientenan tur e famianan di mundu lo ta bendishona.

¹⁵I mira, Mi ta ku bo, i lo Mi wardabo unda ku bo bai, i lo tresebo bek den e tera aki; pasobra lo Mi no lagabo te ora Mi a kumpli ku loke Mi a primintibo."

¹⁶E ora ei Jakob a spierta for di su sono i a bisa: "Siguramente SENOR ta na e luga aki, i mi no tabata sa esei."

¹⁷E tabatin miedu i a bisa: "Ki temibel e luga aki ta! Esaki no ta nada otro sino e kas di Dios, i esaki ta e porta di shelu."

¹⁸Asina Jakob a lanta mainta tempran i a kohe e piedra ku el a pone bou di su kabes i a pon'e para komo un pilar, i a basha zeta na su parti ariba.

¹⁹I el a yama e luga ei Bet-el, ma prome e nomber di e stat tabata Luz.

²⁰E ora ei Jakob a hasi un huramentu, bisando: "Si Dios ta ku mi i ta wardami riba e biahe aki ku mi ta hasi, i ta dunami pan pa kome i pana pa bisti,

²¹i ami bolbe kas di mi tata sano i salvo, e ora ei SENOR lo ta mi Dios.

²²I e piedra aki, ku mi a pone para komo un pilar, lo ta Dios Su kas, i di tur loke Bo dunami, siguramente lo mi dunaBo un desimo parti."