Read Papantla Totonac Genesis 29 Bible Online

Genesis 29 - Papantla Totonac bible

Genesis 29

¹Despues Jakob a sigui su biahe i a yega na e tera di e hendenan di oriente.

²I el a wak ront i a mira un pos den kunuku. I ata, tabatin tres tou di karne drumi ayanan banda di e pos, pasobra for di e pos ei nan tabata duna e tounan awa. I e piedra na boka di e pos tabata grandi.

³Ora tur e tounan di karne a wordu hunta einan, e wardadonan tabata lora e piedra kita for di boka di e pos i duna e karnenan awa i pone e piedra bek na su luga na boka di e pos.

⁴I Jakob a bisa nan: "Mi rumannan, di unda boso ta?" I nan a bisa: "Nos ta di Haran."

⁵I el a bisa nan: "Boso konose Laban, yu homber di Nakor?" I nan a bisa: "Si, nos konos'e."

⁶Anto Jakob a bisa nan: "Tur kos ta bon kune?" I nan a kontesta: "Tur kos ta bon, i ata su yu muhe Raquel ta bin ku e karnenan."

⁷I el a bisa: "Mira, solo ta haltu ainda; no ta ora di hunta bestia ainda. Duna e karnenan awa i bai laga nan kome atrobe."

⁸Ma nan a bisa: "Nos no por te ora tur e tounan di karne wordu hunta i nan lora e piedra kita for di boka di e pos; e ora ei nos ta duna e karnenan awa."

⁹Mientras ku e tabata papia ku nan ainda, Raquel a yega ku e karnenan di su tata, pasobra e tabata un wardado di karne.

¹⁰I a sosode ku ora Jakob a mira Raquel, yu muhe di Laban, ruman di su mama, i e karnenan di Laban, ruman di su mama, Jakob a yega serka i a lora e piedra kita for di boka di e pos i a duna e tou di Laban, ruman di su mama, awa.

¹¹E ora ei Jakob a sunchi Raquel i a halsa su bos i a yora.

¹²I Jakob a konta Raquel ku e tabata famia di su tata i ku e tabata yu di Rebeka, i Raquel a kore bai konta su tata.

¹³Asina a sosode ku ora Laban a tende e notisia di Jakob, yu homber di su ruman muhe, el a kore bai kontr'e, a bras'e, sunch'e i hib'e su kas. E ora ei el a konta Laban tur e kosnan aki.

¹⁴I Laban a bis'e: "Siguramente bo ta mi wesu i mi karni." I el a keda un luna serka dje.

¹⁵E ora ei Laban a bisa Jakob: "Ta pasobra bo ta mi famia bo mester sirbimi pornada? Bisami, kiko bo pago mester ta?"

¹⁶Awor Laban tabatin dos yu muhe; esun mayo tabata yama Lea i esun mas chikitu tabata yama Raquel.

¹⁷Lea su wowonan tabata swak, ma Raquel tabatin bunita kurpa i bunita kara.

¹⁸Awor Jakob tabata stima Raquel. Pesei el a bisa: "Lo mi sirbibo shete ana pa Raquel, bo yu mas chikitu."

¹⁹I Laban a bisa: "Miho mi dun'e na abo ku mi dun'e na un otro homber; keda serka mi."

²⁰Asina Jakob a sirbi shete ana pa Raquel i nan tabata parse djis un par di dia p'e, pasobra e tabata stim'e.

²¹E ora ei Jakob a bisa Laban: "Dunami mi esposa pa mi drumi kune, pasobra mi tempu ta kumpli."

²²I Laban a reuni tur e hombernan di e luga i a hasi un fiesta.

²³Awor a sosode ku anochi Laban a tuma su yu muhe Lea i a hib'e pa Jakob, i Jakob a drumi kune.

²⁴Tambe Laban a duna su kria Zilpa na su yu muhe Lea komo kria.

²⁵Asina a sosode ku ora a bira mainta, ata, tabata Lea! I Jakob a bisa Laban: "Ta kiko e kos aki ku bo a hasi ku mi? No ta pa Raquel mi a sirbibo? Pakiko bo a ganami anto?"

²⁶Ma Laban a bisa: "No ta kustumber di nos luga pa kasa esun di mas chikitu prome ku esun mayo.

²⁷Kompleta e siman di esun aki, i nos lo dunabo e otro tambe pa shete ana mas di sirbishi ku bo mester dunami."

²⁸I asina Jakob a hasi i a kompleta su siman, i Laban a dun'e su yu muhe Raquel komo su esposa.

²⁹Tambe Laban a duna su kria Bilha na su yu muhe Raquel komo su kria.

³⁰Asina Jakob a drumi ku Raquel tambe, i di berdat e tabata stima Raquel mas ku Lea, i el a sirbi Laban shete ana mas.

³¹Awor SENOR a mira ku Lea no tabata stima, i El a habri su matris, ma Raquel tabata steril.

³²I Lea a sali na estado i a hana un yu homber i a dun'e e nomber Ruben, pasobra el a bisa: "Pasobra SENOR a mira mi aflikshon; awor si mi esposo lo stimami."

³³I el a bolbe sali na estado i a hana un yu homber i a bisa: "Pasobra SENOR a tende ku mi no ta stima, pesei El a dunami e yu homber aki tambe." I el a dun'e e nomber Simeon.

³⁴I el a bolbe sali na estado i a hana un yu homber i a bisa: "Awor e biaha aki mi esposo lo ta mara na mi, pasobra mi a hana tres yu homber p'e." Pesei el a wordu yama Levi.

³⁵Anto el a bolbe sali na estado i a hana un yu homber i a bisa: "E biaha aki lo mi alaba SENOR." Pesei el a dun'e e nomber Juda. E ora ei el a stop di hana yu.