Read Papantla Totonac Genesis 3 Bible Online

Genesis 3 - Papantla Totonac bible

Genesis 3

¹Awor e kolebra tabata mas astuto ku tur otro bestia di sabana ku SENOR Dios a traha. I el a bisa e muhe: "Di berdat Dios a bisa: 'Bo no mag kome di ningun palu di e hofi'?"

²I e muhe a bisa e kolebra: "Di fruta di e palunan di e hofi nos por kome,

³ma di fruta di e palu ku ta keda meimei di e hofi, Dios a bisa: 'Boso no mester kome di dje ni mishi kune, pa boso no muri.'"

⁴I e kolebra a bisa e muhe: "Siguramente boso lo no muri!

⁵Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu."

⁶Ora ku e muhe a mira ku e palu tabata bon pa kuminda, i ku e tabata un delisia pa bista, i ku e palu tabata deseabel pa hasi hende bira sabi, el a kohe di su fruta i a kome; i el a duna su esposo tambe ku tabata huntu kune, i el a kome.

⁷E ora ei wowo di nan tur dos a habri, i nan tabata sa ku nan tabata sunu; anto nan a kose blachi di figo pega na otro i a traha lantera pa nan mes.

⁸I nan tabata tende e zonidu di SENOR Dios, kanando den e hofi den aire fresku di dia, i e homber i su esposa a skonde pa e presensia di SENOR Dios meimei di e palunan di e hofi.

⁹E ora ei SENOR Dios a yama e homber i a bis'e: "Unda bo ta?"

¹⁰I e homber a bisa: "Mi a tende e zonidu di Bo den e hofi i mi tabatin miedu, pasobra mi tabata sunu; pesei mi a bai skonde."

¹¹I El a bisa: "Ta ken a bisabo ku bo tabata sunu? Bo a kome di e palu ku Mi a ordenabo pa no kome di dje?"

¹²I e homber a bisa: "E muhe ku Bo a duna pa ta huntu ku mi, ta el a dunami for di e palu, i mi a kome."

¹³E ora ei SENOR Dios a bisa e muhe: "Ta kiko e kos aki ta ku bo a hasi?" I e muhe a bisa: "E kolebra a ganami i mi a kome."

¹⁴I SENOR Dios a bisa e kolebra: "Pasobra bo a hasi e kos aki, "maldishona bo ta mas ku tur bestia di kria, i mas ku tur bestia di sabana; riba bo barika lo bo lastra, i stof lo bo kome tur e dianan di bo bida;

¹⁵i lo Mi pone enemistat entre abo i e muhe, i entre bo simia i su simia; e lo herida bo kabes, i abo lo herida Su hilchi di pia."

¹⁶E muhe El a bisa: "Lo Mi multiplika masha hopi mes bo dolo na ora di parto; ku dolo lo bo hana yu; tog bo deseo lo ta pa bo esposo, i e lo manda riba bo."

¹⁷E ora ei El a bisa Adam: "Pasobra bo a skucha na bos di bo esposa i a kome for di e palu di kual Mi a ordenabo, bisando: 'Lo bo no kome di dje', "Maldishona e tera ta pa bo motibu; ku trabou duru lo bo kome di dje tur e dianan di bo bida.

¹⁸Mata di sumpina i bringamosa lo e produsi pa bo, i lo bo kome yerba di sabana.

¹⁹Ku sodo di bo frenta lo bo kome pan, te ora bo bolbe na tera, pasobra for di dje bo a wordu tuma; pasobra stof bo ta, i na stof lo bo bolbe."

²⁰I e homber a duna su esposa e nomber Eva, pasobra ta e tabata mama di tur ser bibu.

²¹I SENOR Dios a traha bisti di kueru pa Adam i su esposa, i a bisti nan.

²²E ora ei SENOR Dios a bisa: "Mira, e homber a bira manera un di Nos, konosiendo bon i malu. I awor, pa e no saka su man kohe for di e palu di bida tambe, i kome i biba pa semper"--

²³pesei SENOR Dios a mand'e bai for di e hofi di Eden, pa kultiva e tera for di kual el a wordu tuma.

²⁴Asina El a saka e homber afo; anto parti pariba di hofi di Eden El a stashona e kerubinnan i un spada tur na flam di kandela ku tabata bira den tur direkshon, pa warda e kaminda ku ta bai na e palu di bida.