Read Papantla Totonac Genesis 30 Bible Online

Genesis 30 - Papantla Totonac bible

Genesis 30

¹Awor ora Raquel a mira ku e no tabata hana yu pa Jakob, el a bira yalurs riba su ruman i el a bisa Jakob: "Dunami yu, sino mi ta muri."

²E ora ei Jakob su rabia a kima kontra Raquel i el a bisa: "T'ami ta Dios anto ku no kier dunabo e fruta di bo barika?"

³Anto Raquel a bisa: "Ata mi kria Bilha aki, drumi kune, pa e duna lus riba mi rudianan, pa dor di dje ami tambe por tin yu."

⁴Asina el a dun'e su kria Bilha komo esposa i Jakob a drumi kune.

⁵I Bilha a sali na estado i a hana un yu homber pa Jakob.

⁶E ora ei Raquel a bisa: "Dios a huzgami, i di berdat a tende mi bos i a dunami un yu homber." Pesei el a dun'e e nomber Dan.

⁷I Bilha, Raquel su kria, a bolbe sali na estado i a hana un di dos yu homber pa Jakob.

⁸I Raquel a bisa: "Ku gran lucha mi a lucha ku mi ruman, i di berdat mi a vense." I el a duna e yu e nomber Neftali.

⁹Ora Lea a mira ku el a stop di hana yu, el a tuma su kria Zilpa i a dun'e na Jakob komo esposa.

¹⁰I Zilpa, Lea su kria, a hana un yu homber pa Jakob.

¹¹E ora ei Lea a bisa: "Ki afortuna!" Pesei el a dun'e e nomber Gad.

¹²I Zilpa, Lea su kria, a hana un di dos yu homber pa Jakob.

¹³E ora ei Lea a bisa: "Felis mi ta! Pasobra hende muhe lo yamami felis." Pesei el a dun'e e nomber Aser.

¹⁴Awor den e dianan di kosecha di trigo Ruben a bai i a hana mandragora den kunuku, i a hiba nan pa su mama Lea. Anto Raquel a bisa Lea: "Pa fabor, dunami algun mandragora di bo yu."

¹⁵Ma Lea a bis'e: "No ta basta ku bo a tuma mi esposo? I bo kier tuma e mandragoranan di mi yu tambe?" Asina Raquel a bisa: "Pesei e por drumi ku bo awe nochi en kambio di e mandragoranan di bo yu."

¹⁶Ora Jakob a bolbe di kunuku atardi, Lea a bai kontr'e i a bisa: "Bo mester drumi ku mi, pasobra siguramente mi a hur bo ku e mandragoranan di mi yu." Asina Jakob a drumi kune e anochi ei.

¹⁷I Dios a skucha Lea, i el a sali na estado i a hana un di sinku yu homber pa Jakob.

¹⁸Anto Lea a bisa: "Dios a dunami mi rekompensa, pasobra mi a duna mi kria na mi esposo." I el a dun'e e nomber Isakar.

¹⁹I Lea a bolbe sali na estado i a hana un di seis yu homber pa Jakob.

²⁰E ora ei Lea a bisa: "Dios a dunami un bon regalo; awor mi esposo lo keda biba serka mi, pasobra mi a hana seis yu homber p'e." I el a dun'e e nomber Zabulon.

²¹I despues el a hana un yu muhe i a dun'e e nomber Dina.

²²Anto Dios a korda riba Raquel, i Dios a skuch'e i a habri su matris.

²³I el a sali na estado i a hana un yu homber i a bisa: "Dios a kita mi reproche."

²⁴I el a dun'e e nomber Jose, bisando: "Ku SENOR dunami un yu homber mas."

²⁵Awor a sosode ku ora Raquel a hana Jose, Jakob a bisa Laban: "Lagami bai, pa mi por bai mi mes luga i mi mes pais.

²⁶Dunami mi esposanan i mi yunan pa kendenan mi a sirbibo, i lagami bai, pasobra bo mes sa di mi sirbishi ku mi a hasi pa bo."

²⁷Ma Laban a bis'e: "Pa fabor, keda si mi a hana grasia den bo bista, pasobra dor di eksperensia mi a hana sa ku SENOR a bendishonami pa bo motibu."

²⁸I el a sigui bisa: "Nombrami bo pago i lo mi duna esei."

²⁹Ma Jakob a bis'e: "Bo mes sa kon mi a sirbibo i kon a bai ku bo bestianan serka mi.

³⁰Pasobra loke bo tabatin prome ku mi a bin tabata poko, i esei a rende bira un multitut; i SENOR a bendishonabo for di mi yegada. Ma awor, ta ki dia lo mi provee pa mi mes kas tambe?"

³¹I el a bisa: "Kiko mi mester dunabo?" I Jakob a bisa: "Bo no tin di dunami nada. Si bo hasi esun kos aki pa mi, lo mi sigui pastoria i warda bo bestianan:

³²lagami pasa dor di henter bo tou awe i saka afo tur karne pinta i ku mancha, i tur lamchi pretu, i tur kabritu ku mancha i pinta; i eseinan lo ta mi pago.

³³Asina mi hustisia lo papia pa mi despues, dia bo bin regla kuenta ku mi. Tur kabritu ku no ta pinta i ku no tin mancha i tur lamchi ku no ta pretu, si nan wordu hana den mi poder, lo wordu konsidera komo horta."

³⁴I Laban a bisa: "Bon, laga sosode konforme bo palabra."

³⁵Asina riba e dia ei el a saka e kabritunan chubatu strepia i ku mancha, i tur e kabritunan muhe pinta i ku mancha, tur ku tabatin algu di blanku den nan, i tur e karnenan pretu, i a duna nan na su yu hombernan pa nan kuida nan.

³⁶Anto el a pone un distansia di tres dia di biahe entre e mes i Jakob, i Jakob tabata kuida e otro bestianan di Laban.

³⁷E ora ei Jakob a kohe bara berde di palu di populir, di amandel i di kastana, i a pela nan saka strepi blanku den nan, i a ekspone e blanku di e baranan.

³⁸I el a pone e baranan ku el a pela dilanti di e tounan di bestia chikitu den e roinan, den e bakinan di awa, kaminda e tounan tabata bin bebe; i nan tabata dek ora nan tabata bin bebe.

³⁹Asina e tounan tabata dek banda di e baranan, i nan tabata werp yu strepia, pinta i ku mancha.

⁴⁰I Jakob a separa e lamchinan, i a hasi e bestianan bira nan kabes den direkshon di esnan strepia i tur esnan pretu entre e bestianan di Laban; i su mes bestianan el a separa, i no a pone nan huntu ku e bestianan di Laban.

⁴¹I a sosode ku ki ora ku e bestianan mas fuerte tabata dek, Jakob tabata pone e baranan dilanti di e bestianan den e roinan, pa nan dek banda di e baranan;

⁴²ma ora ku e bestianan tabata swak, e no tabata pone e baranan den e roinan, asina ku esnan mas swak tabata pa Laban i esnan mas fuerte tabata pa Jakob.

⁴³Asina e homber a bira masha riku mes i e tabatin masha hopi bestia chikitu i sirbido homber i muhe i kamel i buriku.