Read Papantla Totonac Genesis 32 Bible Online

Genesis 32 - Papantla Totonac bible

Genesis 32

¹Asina Jakob a sigui su kaminda i e angelnan di Dios a bin kontr'e.

²I ora Jakob a mira nan, el a bisa: "Esaki ta e kampamentu di Dios." I el a yama e luga ei Mahanaim.

³Anto Jakob a manda mensaheronan su dilanti serka su ruman Esau na tera di Seir, e teritorio di Edom.

⁴Tambe el a ordena nan, bisando: "Asina lo bo bisa mi senor Esau: 'Asina bo sirbido Jakob ta bisa: "Mi a keda biba pa un tempu serka Laban i a keda te awor.

⁵Mi tin tambe buey, buriku i bestia chikitu, i sirbidonan homber i muhe; i mi a manda bisa mi senor pa mi hana grasia den bo bista.

⁶I e mensaheronan a bolbe serka Jakob, bisando: "Nos a yega serka bo ruman Esau i e ta na kaminda kaba pa kontra ku bo, i tin kuater shen homber huntu kune."

⁷Anto Jakob a hana masha miedu mes i a bira masha angustia; i el a parti e hendenan ku tabata huntu kune, i e karnenan i e bakanan i e kamelnan, den dos kampamentu,

⁸pasobra el a bisa: "Si Esau bin na esun kampamentu i atak'e, e ora ei e kampamentu ku keda lo hui bai."

⁹E ora ei Jakob a bisa: "O Dios di mi tata Abraham i Dios di mi tata Isaak, O SENOR, Kende a bisami: 'Bai bek na bo tera i serka bo famianan, i lo Mi hasibo prospera,'

¹⁰mi no ta digno di tur e miserikordia i di tur e fieldat ku Bo a mustra na Bo sirbido, pasobra ta ku solamente mi garoti mi a krusa e Jordan aki, i awor mi a bira dos kampamentu.

¹¹Mi ta pidiBo, librami for di man di mi ruman homber, for di man di Esau; pasobra mi tin miedu di dje, pa e no bin ataka ami, e mamanan ku e yunan.

¹²Pasobra Bo a bisa: 'Siguramente lo Mi hasibo prospera, i hasi bo desendientenan manera santu di laman ku no por wordu konta pa motibu di nan kantidat grandi.'"

¹³Asina el a keda pasa nochi ayanan. I for di loke ku e tabatin huntu kune el a aparta un regalo pa su ruman Esau:

¹⁴dos shen kabritu muhe i binti kabritu chubatu, dos shen karne muhe i binti karne chubatu,

¹⁵trinta kamel ku a kaba di werp, ku nan yunan chikitu, kuarenta baka i dies bishe machu, binti buriku yewa i dies buriku machu.

¹⁶I el a entrega nan den man di su sirbidonan, kada grupo apart, i a bisa su sirbidonan: "Pasa mi dilanti, i laga un espasio entre e gruponan."

¹⁷I el a ordena esun dilanti, bisando: "Ora mi ruman Esau kontrabo i puntrabo, bisando: 'Di ken bo ta, na unda bo ta bai, i di ken e animalnan aki bo dilanti ta?'

¹⁸e ora ei lo bo bisa: 'Di bo sirbido Jakob nan ta, un regalo manda pa mi senor Esau. I mira, e tambe ta bin nos tras."'

¹⁹Asina el a ordena e di dos i e di tres tambe i tur esnan ku tabata sigui e gruponan, bisando: "Asin'aki boso mester papia ku Esau, ora boso han'e;

²⁰i boso mester bisa: 'Ata bo sirbido Jakob tambe ta bin nos tras.'" Pasobra el a bisa: "Lo mi kalm'e ku e regalo ku ta bai mi dilanti. Anto despues lo mi mira su kara; kisas e lo aseptami."

²¹Asina e regalo a bai su dilanti, mientras ku e mes a keda pasa e anochi ei den e kampamentu.

²²Awor e mes anochi ei el a lanta i a tuma su dos esposanan, su dos krianan i su diesun yunan, i a krusa e vado di Jabok.

²³El a tuma nan manda nan na e otro banda di e roi. I tur loke ku e tabatin el a manda na e otro banda.

²⁴E ora ei Jakob so a keda; anto un Homber a lucha kune te ora dia a habri.

²⁵I ora ku El a mira ku E no tabata por a vense Jakob, El a mishi ku skarnir di su hep; asina e skarnir di Jakob su hep a sali for di luga, ora ku E tabata lucha kune.

²⁶E ora ei El a bisa: "LagaMi bai, pasobra dia ta bai habri." Ma Jakob a bisa: "Lo mi no lagaBo bai si Bo no bendishonami."

²⁷Pesei El a bisa Jakob: "Kon ta bo nomber?" I el a bisa: "Jakob."

²⁸I El a bisa: "Bo nomber lo no ta Jakob mas, sino Israel; pasobra bo a lucha ku Dios i ku hende, i bo a vense."

²⁹E ora ei Jakob a puntr'E i a bisa: "Pa fabor, bisami Bo nomber." Ma El a bisa: "Pakiko bo ta puntraMi Mi nomber?" I El a bendishon'e ayanan.

³⁰Pesei Jakob a yama e luga ei Peniel, pasobra el a bisa: "Mi a mira Dios kara-kara; sinembargo, mi bida a keda preserva."

³¹Awor solo a sali riba dje net ora ku e tabata krusa ofer di Penuel, i e tabata kana kokocha pa motibu di su hep.

³²Pesei te dia djawe e yunan di Israel no ta kome e muskulo di hep ku ta keda riba e skarnir di hep, pasobra El a mishi ku e skarnir di Jakob su hep den e muskulo di hep.