Read Papantla Totonac Genesis 33 Bible Online

Genesis 33 - Papantla Totonac bible

Genesis 33

¹Awor Jakob a hisa kara wak, i ata Esau tabata bin, i kuater shen homber huntu kune. Asina el a parti e yunan entre Lea, Raquel i e dos krianan.

²I el a pone e krianan ku nan yunan dilanti, i Lea ku su yunan despues, i Raquel ku Jose ultimo.

³Ma e mes a bai nan dilanti, i a buig shete biaha te na suela, te ora ku el a yega serka su ruman.

⁴Anto Esau a kore bin kontr'e i a bras'e, a pasa su mannan ront di su nek i a sunch'e, i nan a yora.

⁵I el a hisa kara wak e muhenan i e muchanan, i a bisa: "Ken e hendenan aki huntu ku bo ta?" I el a bisa: "E yunan ku Dios den Su grasia a duna bo sirbido."

⁶E ora ei e krianan a kana yega serka ku nan yunan i nan a buig te na suela.

⁷I Lea tambe a kana yega serka ku su yunan, i nan a buig te na suela; i despues Jose ku Raquel a kana yega serka, i nan a buig te na suela.

⁸I el a bisa: "Kiko bo kier men ku henter e grupo aki ku mi a topa?" I el a bisa: "Pa hana grasia den bista di mi senor."

⁹Ma Esau a bisa: "Mi ruman, mi tin sufisiente; keda ku loke ta di bo."

¹⁰I Jakob a bisa: "No, pa fabor, si awor mi a hana grasia den bo bista, anto asepta mi regalo for di mi man, pasobra mi ta mira bo kara manera ta mira kara di Dios, i bo a risibimi kontentu.

¹¹Pa fabor, asepta mi bendishon ku a wordu tresi pa bo, pasobra Dios a trata miserikordiosamente ku mi, i pasobra mi tin sufisiente." Asina el a keda insist!, i Esau a asepta esaki.

¹²E ora ei Esau a bisa: "Ban sigui nos kaminda, i ami lo bai bo dilanti."

¹³Ma Jakob a bis'e: "Mi senor sa ku e muchanan ta delikado i ku mi tin serka mi bestia chikitu i bakanan ku ta duna yu lechi. I si pone nan kana duru un dia so, tur e bestianan lo muri.

¹⁴Pa fabor, ku mi senor bai dilanti di su sirbido, i ami lo sigui bai poko-poko, pareu ku e bestianan ku ta mi dilanti i pareu ku e muchanan, te ora mi yega serka mi senor na Seir."

¹⁵I Esau a bisa: "Pa fabor, permitimi laga algun di e hendenan ku ta huntu ku mi keda serka bo." Ma Jakob a bisa: "No tin mester. Lagami hana grasia den bista di mi senor."

¹⁶Asina Esau a bolbe e dia ei riba su kaminda pa Seir.

¹⁷I Jakob a biaha bai Sukot, i a traha un kas pa su mes i ramadanan pa su bestianan; pesei e luga ta wordu yama Sukot.

¹⁸Awor Jakob a yega sano i salvo na e stat di Sikem ku ta keda na tera di Kanaan, ora ku el a bin for di Padan-aram, i a lanta kampamentu dilanti di e stat.

¹⁹Anto el a kumpra e pida tereno, kaminda el a lanta su tent, serka e yunan di Hamor, tata di Sikem, pa shen pida plata.

²⁰I ayanan el a lanta un altar i a yam'e El-Elohe-Israel.