Read Papantla Totonac Genesis 34 Bible Online

Genesis 34 - Papantla Totonac bible

Genesis 34

¹Awor Dina, yu muhe di Lea, ku el a hana pa Jakob, a sali bai bishita e yu muhenan di e pais.

²I ora Sikem, yu homber di Hamor e heveo, e prens di e tera, a mir'e, el a tum'e i a drumi kune i a viol'e.

³I el a pega masha na Dina, yu muhe di Jakob, i el a stima e mucha muhe, i su palabranan a toka kurason di e mucha muhe.

⁴Pesei Sikem a papia ku su tata Hamor, bisando: "Buska e mucha muhe aki pa mi, pa e bira mi esposa."

⁵Awor Jakob a tende ku el a desonra su yu muhe Dina. Ma su yu hombernan tabata den kunuku ku su bestianan; pesei Jakob a keda ketu te ora nan a bin.

⁶Awor Hamor, tata di Sikem, a sali bai serka Jakob pa papia kune.

⁷I e yu hombernan di Jakob a bin for di kunuku ora nan a tende esaki; i a duel e hombernan i nan tabata masha rabia, pasobra el a hasi un kos skandaloso asina na Israel, esta, di drumi ku yu muhe di Jakob, pasobra un kos asina no mag wordu hasi.

⁸Ma Hamor a papia ku nan, bisando: "Mi yu homber Sikem ta anhela na bo yu muhe; pa fabor, dun'ele komo esposa.

⁹I emparenta ku nos; duna nos boso yu muhenan i tuma nos yu muhenan pa boso.

¹⁰Asina boso lo keda biba serka nos, i e tera lo ta na boso ordu; biba i negosha den dje, i atkiri propiedat den dje."

¹¹Tambe Sikem a bisa tata di Dina i su ruman hombernan: "Si mi hana grasia den boso bista, lo mi duna boso tur loke boso pidimi.

¹²Pidimi kuantu plaka-di-bruit i regalo ku boso ke, i lo mi duna boso loke boso pidimi, ma dunami e mucha muhe komo esposa."

¹³Ma e yu hombernan di Jakob a kontesta Sikem i su tata Hamor, i a papia ku engano, pasobra el a desonra nan ruman muhe Dina.

¹⁴I nan a bisa nan: "Nos no por hasi e kos aki, esta, duna nos ruman muhe na un hende ku ta insirkumsida, pasobra esei lo ta un berguensa pa nos.

¹⁵Solamente ku e kondishon aki nos lo konsenti ku boso: si boso bira manera nos, esta, si tur boso hende hombernan wordu sirkumsida;

¹⁶e ora ei nos lo duna boso nos yu muhenan, i nos lo tuma boso yu muhenan pa nos, i nos lo biba serka boso i bira un pueblo.

¹⁷Ma si boso no skucha na nos pa wordu sirkumsida, nos lo tuma nos yu muhe i bai."

¹⁸I nan palabranan a agrada Hamor i Sikem, yu homber di Hamor.

¹⁹I e hoben no a tarda pa hasi esaki, pasobra e tabata enkanta ku e yu muhe di Jakob. Awor e tabata esun di mas respeta di henter e kas di su tata.

²⁰Asina Hamor i su yu homber Sikem a yega na porta di nan stat, i a papia ku e hombernan di nan stat, bisando:

²¹"E hombernan aki ta na pas ku nos; pesei, laga nan keda biba den e tera i negosha den dje, pasobra mira, e tera tin basta luga pa nan. Laga nos tuma nan yu muhenan komo esposa i duna nan nos yu muhenan.

²²Solamente ku e kondishon aki e hombernan lo konsenti pa keda biba serka nos, pa bira un pueblo: si tur hende homber entre nos wordu sirkumsida, meskos ku nan ta sirkumsida.

²³Nan bestianan di kria, nan propiedat i tur nan animalnan, no ta di nos nan lo ta? Solamente, laga nos duna nan nos konsentimentu, i nan lo keda biba serka nos."

²⁴I tur esnan ku a sali pa e porta di su stat a skucha na Hamor i na su yu homber Sikem, i tur hende homber a wordu sirkumsida, tur ku a sali pa e porta di su stat.

²⁵Awor a sosode ku riba e di tres dia, ora nan tabata den dolo, dos di Jakob su yu hombernan, Simeon i Levi, rumannan di Dina, kada un a kohe su spada i a bin inesperadamente riba e stat, i a mata tur e hombernan.

²⁶I nan a mata Hamor i su yu homber Sikem ku filo di spada, i a kohe Dina bai kune for di kas di Sikem.

²⁷E yu hombernan di Jakob a pasa riba esnan ku a wordu mata i a plunder e stat, pasobra nan a desonra nan ruman muhe.

²⁸Nan a kohe nan karnenan, nan bakanan i nan burikunan, i loke tabatin den e stat i loke tabatin den kunuku,

²⁹i tur nan rikesa. Tur nan yu chikitunan i nan esposanan nan a kaptura; i nan a plunder tur loke tabatin den e kasnan.

³⁰E ora ei Jakob a bisa Simeon i Levi: "Boso a hinkami den problema dor di hasimi odia serka e habitantenan di e tera, serka e kananeonan i e ferezeonan; i komo ku mi hombernan ta poko den kantidat, nan lo bin huntu kontra mi i atakami, i lo mi wordu destrui, ami i e hendenan di mi kas."

³¹Ma nan a bisa: "E tabatin mag di trata nos ruman muhe komo prostituta anto?"