Read Papantla Totonac Genesis 35 Bible Online

Genesis 35 - Papantla Totonac bible

Genesis 35

¹E ora ei Dios a bisa Jakob: "Lanta, bai Bet-el, i keda biba ayanan, i traha un altar ayanan pa Dios, Kende a parese na bo tempu ku bo a hui pa bo ruman Esau."

²Pesei Jakob a bisa e hendenan di su kas i tur esnan ku tabata serka dje: "Deshasi di e diosnan stranhero ku ta meimei di boso, i purifika boso mes i kambia boso pana.

³I laga nos lanta bai Bet-el, i ayanan lo mi traha un altar pa Dios, Kende a kontestami den e dia di mi angustia, i tabata ku mi unda ku mi a bai."

⁴Asina nan a duna Jakob tur e diosnan stranhero ku nan tabatin i e renchinan ku tabata na nan orea; i Jakob a skonde nan bou di e palu di eik ku tabata keda pega ku Sikem.

⁵I nan a sali bai, i e teror di Dios tabata riba e statnan ku tabata ront di nan, i nan no a persigui e yunan di Jakob.

⁶Asina Jakob a yega na Luz (esta, Bet-el) ku ta keda na tera di Kanaan, e ku tur e hendenan ku tabata huntu kune.

⁷I ayanan Jakob a traha un altar, i a yama e luga El-bet-el, pasobra ayanan Dios a revela Su mes na dje, tempu ku el a hui pa su ruman.

⁸Awor Debora, yaya di Rebeka, a muri, i el a wordu dera serka di Bet-el bou di e palu di eik, i e palu a wordu yama Alon-bakut.

⁹Anto Dios a parese na Jakob atrobe, ora ku el a yega for di Padan-aram, i El a bendishon'e.

¹⁰I Dios a bis'e: "Bo nomber ta Jakob; lo bo no yama Jakob mas, ma Israel lo ta bo nomber." Asina El a dun'e e nomber Israel.

¹¹Tambe Dios a bis'e: "Ami ta Dios Todopoderoso; sea fruktifero i multiplika. Un nashon i un multitut di nashon lo sali for di bo, i reinan lo sali for di bo.

¹²I e tera ku Mi a duna Abraham i Isaak, lo Mi dunabo e, i lo Mi duna e tera na bo desendientenan despues di bo."

¹³E ora ei Dios a subi bai lagu'e na e luga kaminda El a papia kune.

¹⁴Anto Jakob a pone un pilar para na e luga kaminda El a papia kune, un pilar di piedra, i el a basha un ofrenda di bibida riba dje; tambe el a basha zeta riba dje.

¹⁵I Jakob a yama e luga kaminda Dios a papia kune, Bet-el.

¹⁶E ora ei nan a biaha bai for di Bet-el; i ora tabata falta algu di distansia ainda pa yega Efrata, Raquel a hana yu, i e tabatin mal parto.

¹⁷I a sosode ku ora dolo a bira hopi pisa, e partera a bis'e: "No tene miedu, pasobra e biaha aki tambe bo tin un yu homber."

¹⁸I a sosode ku ora su alma tabata sali (pasobra el a muri), el a dun'e e nomber Benoni, ma su tata a dun'e e nomber Benjamin.

¹⁹Asina Raquel a muri i a wordu dera na kaminda pa Efrata (esta, Betlehem).

²⁰I Jakob a pone un pilar riba su graf; esei ta e pilar di Raquel su graf te dia djawe.

²¹Despues Israel a sigui biaha i a lanta su tent mas aya di e toren di Edar.

²²I a sosode ku mientras ku Israel tabata biba na e tera ei, Ruben a bai i a drumi ku Bilha, konkubina di su tata; i Israel a hana sa esaki. Awor Jakob tabatin diesdos yu homber:

²³e yu hombernan di Lea: Ruben, Jakob su primogenito, despues Simeon, Levi, Juda, Isakar i Zabulon;

²⁴e yu hombernan di Raquel: Jose i Benjamin;

²⁵i e yu hombernan di Bilha, Raquel su kria: Dan i Neftali;

²⁶i e yu hombernan di Zilpa, Lea su kria: Gad i Aser. Esakinan ta e yu hombernan di Jakob ku a nase p'e na Padan-aram.

²⁷I Jakob a bin serka su tata Isaak na Mamre di Kiriat-arba (esta, Hebron), kaminda Abraham i Isaak a keda biba pa un tempu.

²⁸Awor e dianan di Isaak tabata shent'i ochenta ana.

²⁹I Isaak a hala su ultimo rosea i a muri i a wordu reuni ku su pueblo, un homber bieu, di edat avansa; i su yu hombernan Esau i Jakob a der'e.