Read Papantla Totonac Genesis 37 Bible Online

Genesis 37 - Papantla Totonac bible

Genesis 37

¹Awor Jakob tabata biba na e tera kaminda su tata tabata biba pa un tempu, na tera di Kanaan.

²Esakinan ta e generashonnan di Jakob. Jose, un hoben di dieshete ana, tabata pastoria e karnenan huntu ku su rumannan, huntu ku e yu hombernan di Bilha i e yu hombernan di Zilpa, esposanan di su tata. I Jose a hiba mal notisia di nan pa su tata.

³Awor Israel tabata stima Jose mas ku tur su otro yu hombernan, pasobra e tabata e yu di su biehes; i el a laga traha un tunika di hopi kolo p'e.

⁴I su ruman hombernan a mira ku nan tata tabata stim'e mas ku tur su otro ruman hombernan; pesei nan a odi'e i no por a papia kune ku karino.

⁵Anto Jose tabatin un sono, i ora ku el a konta su ruman hombernan esaki, nan a odi'e mas ainda.

⁶I el a bisa nan: "Pa fabor, skucha e sono aki ku mi tabatin;

⁷pasobra mira, nos tabata mara bohi den kunuku, i ata, mi bohi a lanta i a keda para regt; i mira, boso bohinan a bin para tur ront i a buig pa mi bohi."

⁸E ora ei su ruman hombernan a bis'e: "Ta reina bo ta bai reina riba nos? Of ta goberna bo ta bai goberna riba nos?" Asina nan a odi'e mas ainda pa motibu di su sononan i pa motibu di su palabranan.

⁹Awor el a bolbe hana un otro sono i a konta su ruman hombernan esaki, i a bisa: "Ata, mi tabatin un sono mas, i mira, solo, luna i diesun strea tabata buig pa mi."

¹⁰I el a konta su tata i su ruman hombernan esaki; i su tata a reprend'e i a bis'e: "Ta kiko e sono ku bo tabatin aki? Kier men anto ku ami, bo mama i bo ruman hombernan lo bin buig te na suela pa bo?"

¹¹I su rumannan tabata yalurs riba dje, ma su tata a keda pensa riba e asunto aki.

¹²Despues su rumannan a bai pastoria e karnenan di nan tata na Sikem.

¹³I Israel a bisa Jose: "Ta na Sikem bo rumannan ta pastoria e karnenan tog? Bin, i lo mi mandabo serka nan." I el a bisa su tata: "Mi ta bai."

¹⁴Anto el a bis'e: "Bai awor i mira kon ta bai ku bo rumannan i kon ta bai ku e karnenan, i bin kontami." Asina el a lagu'e bai for di e vaye di Hebron, i el a yega Sikem.

¹⁵I un homber a han'e ta kana dwal den kunuku, i e homber a puntr'e: "Kiko bo ta buska?"

¹⁶I Jose a bisa: "Mi ta buska mi rumannan; pa fabor, kontami unda nan ta pastoria e karnenan."

¹⁷I e homber a bisa: "Nan a bai for di aki, pasobra mi a tende nan ta bisa: 'Laga nos bai Dotan.'" Asina Jose a bai tras di su rumannan i a hana nan na Dotan.

¹⁸Ora nan a mir'e di leu, i prome ku el a yega serka nan, nan a traha komplot kontra dje pa mat'e.

¹⁹I nan a bisa otro: "Ata e sonado ta bin!

²⁰Awor anto, ban laga nos mat'e i tir'e den un di e posnan; i nos lo bisa: 'Un bestia salbahe a devor'e.' Anto laga nos mira kiko ta para di su sononan!"

²¹Ma Ruben a tende esaki i a reskata Jose for di nan man i a bisa: "Laga nos no kita su bida."

²²Tambe Ruben a bisa nan: "No drama sanger. Tir'e den e pos aki ku ta keda den desierto, ma no pone man riba dje"--pa e por reskat'e for di nan man, pa hib'e bek pa su tata.

²³Asina a sosode ku ora Jose a yega serka su rumannan, nan a kita Jose su tunika for di su kurpa, e tunika di hopi kolo ku e tabatin bisti;

²⁴i nan a kohe Jose tir'e den e pos. Awor e pos tabata bashi, sin ni un tiki awa aden.

²⁵E ora ei nan a kai sinta pa kome pan. I ora nan a hisa kara wak, ata un karavana di ismaelitanan tabata bin for di Galaad, nan kamelnan karga ku speserei, balsem i mirra, ku nan tabata hiba Egipto.

²⁶I Juda a bisa su rumannan: "Di ki probecho esei ta pa nos pa mata nos ruman i tapa su sanger?

²⁷Ban laga nos bend'e ku e ismaelitanan i no pone nos man riba dje, pasobra e ta nos ruman, nos mes karni." I su rumannan a skuch'e.

²⁸Anto algun komersiante madianita a pasa, i nan a hala Jose trese ariba i a sak'e for di e pos, i a bend'e ku e ismaelitanan pa binti siklo di plata. Asina nan a hiba Jose Egipto.

²⁹Despues Ruben a bolbe na e pos, i mira, Jose no tabata den e pos; pesei el a sker su pananan.

³⁰I el a bolbe bai serka su rumannan i a bisa: "E mucha no t'ei; i ami, unda lo mi bai?"

³¹Asina nan a kohe Jose su tunika, a mata un kabritu chubatu i a dop e tunika den e sanger.

³²Anto nan a laga hiba e tunika di hopi kolo pa nan tata i a bisa: "Nos a hana esaki; pa fabor, wak si ta bo yu homber su tunika, si of no."

³³Anto el a rekonose esaki i a bisa: "Ta mi yu homber su tunika. Un bestia salbahe a devor'e; siguramente el a sker Jose na pida-pida!"

³⁴Pesei Jakob a sker su pananan i a pone pana-di-saku na su hep, i a tene rou hopi dia pa su yu.

³⁵E ora ei tur su yu hombernan i tur su yu muhenan a lanta pa konsol'e, ma el a nenga di wordu konsola. I el a bisa: "Siguramente lo mi baha bai den Seol na rou pa mi yu homber." Asina su tata a yor'e.

³⁶Mientras tantu e madianitanan a bende Jose na Egipto ku Potifar, ofisial di Farao, kapitan di guardia.