Read Papantla Totonac Genesis 38 Bible Online

Genesis 38 - Papantla Totonac bible

Genesis 38

¹I a sosode na e tempu ei ku Juda a bai laga su ruman hombernan, i a bai bishita un adulamita ku tabata yama Hira.

²I ayanan Juda a mira yu muhe di un homber kananeo ku tabata yama Sua, i el a tum'e i a drumi kune.

³Asina el a sali na estado i a hana un yu homber i Juda a dun'e e nomber Er.

⁴Despues el a bolbe sali na estado i a hana un yu homber i el a dun'e e nomber Onan.

⁵I el a hana un yu homber mas i a dun'e e nomber Sela; i ta na Kezib el a han'e.

⁶Awor Juda a tuma un esposa pa su primogenito Er, i su nomber tabata Tamar.

⁷Ma Er, e primogenito di Juda, tabata malbado den bista di SENOR; pesei SENOR a kita su bida.

⁸E ora ei Juda a bisa Onan: "Drumi ku bo ruman homber su esposa, i kumpli ku bo deber di sua kune i lanta desendensia pa bo ruman."

⁹Ma Onan tabata sa ku e desendensia lo no ta di dje; asina a sosode ku ora ku el a drumi ku su ruman su esposa, el a laga su simia basha abou na suela, pa no duna su ruman desendensia.

¹⁰Ma loke ku el a hasi tabata desagradabel den bista di SENOR; pesei El a kita su bida tambe.

¹¹E ora ei Juda a bisa su nuera Tamar: "Keda biuda den kas di bo tata te ora mi yu homber Sela krese bira grandi"; pasobra el a pensa: "Pa e tambe no muri manera su ruman hombernan." Asina Tamar a bai biba den kas di su tata.

¹²Awor despues di basta tempu Juda su esposa, yu muhe di Sua, a muri; i ora e temporada di rou a pasa, Juda a bai serka su peladonan di karne na Timnat, e ku su amigu Hira e adulamita.

¹³Anto nan a bisa Tamar: "Ata bo suegro ta bai Timna pa pela su karnenan."

¹⁴E ora ei Tamar a kita su pananan di biuda i a tapa su kurpa ku un velo, a lora su kurpa den dje, i a bai sinta den porta di Enaim, ku ta keda na kaminda pa Timnat; pasobra el a mira ku Sela a krese bira grandi, i e no a wordu duna na Sela komo esposa.

¹⁵Ora Juda a mir'e, el a kere ku tabata un prostituta, pasobra e tabatin su kara tapa.

¹⁶Pesei el a kita for di kaminda bai serka dje i a bisa: "Pa fabor, lagami drumi ku bo", pasobra e no tabata sa ku tabata su nuera. I Tamar a bisa: "Kiko bo ta dunami pa bo drumi ku mi?"

¹⁷Anto Juda a bisa: "Lo mi mandabo un yu di kabritu for di e tou." I Tamar a bisa: "Bo ta dunami un garantia te ora bo mand'e?"

¹⁸I Juda a bisa: "Ki garantia mi mester dunabo?" I Tamar a bisa: "Bo seyo i bo kordon i bo garoti ku bo tin den bo man." Asina el a dun'e nan, i el a drumi kune, i el a sali na estado di Juda.

¹⁹Despues el a lanta bai, i a kita su velo, i a bisti su pananan di biuda.

²⁰Ora Juda a manda e yu di kabritu ku su amigu e adulamita, pa risibi e garantia for di man di e muhe, e no a hana e muhe.

²¹I el a puntra e hombernan di su luga, bisando: "Unda e prostituta ta ku tabata sinta banda di kaminda na Enaim?" Ma nan a bisa: "No tabatin ningun prostituta akinan."

²²Pesei el a bolbe bai serka Juda i a bisa: "Mi no a han'e; i ademas, e hombernan di e luga ei a bisa: 'No tabatin ningun prostituta akinan.'"

²³E ora ei Juda a bisa: "Lagu'e keda ku nan, pa nos kara no keda na berguensa. Al fin i al kabo, mi a manda e yu di kabritu aki, ma bo no a han'e."

²⁴Awor mas o menos tres luna despues nan a bisa Juda: "Bo nuera Tamar a komete fornikashon, i mira, e ta na estado tambe dor di fomikashon." E ora ei Juda a bisa: "Sak'e pafo i laga kim'e!"

²⁵Ora nan tabata sak'e pafo, el a manda bisa su suegro: "Mi ta na estado di e homber na kende e kosnan aki ta pertenese." I el a bisa: "Pa fabor, wak bon i mira ta di ken e renchi-di-seyo, e kordon i e garoti aki ta."

²⁶Anto Juda a rekonose nan i a bisa: "E ta mas hustu ku mi, pasobra mi no a dun'e na mi yu Sela." I Juda no a tene relashon mas kune.

²⁷I a sosode na e tempu ku e tabata pa duna lus, ku ta yu morocho e tabatin den su barika.

²⁸I a sosode ku ora e tabata duna lus, esun a saka su man, i e partera a kohe pida hilu skarlata mara na su man, bisando: "Esaki a sali prome."

²⁹Ma ora ku el a hala su man bek, ata su ruman a sali. E ora ei e partera a bisa: "Esta un salida bo a traha pa bo mes!" Pesei el a wordu yama Fares.

³⁰I despues su ruman ku tabatin e hilu skarlata na su man a sali; i el a wordu yama Zara.