Read Papantla Totonac Genesis 39 Bible Online

Genesis 39 - Papantla Totonac bible

Genesis 39

¹Awor nan a hiba Jose Egipto, i Potifar, un ofisial egipsio di Farao, kapitan di guardia, a kumpr'e serka e ismaelitanan, kendenan a hib'e ayanan.

²I SENOR tabata ku Jose, asina ku el a bira un homber eksitoso. I e tabata biba den kas di su shon, e egipsio.

³Awor su shon a mira ku SENOR tabata kune i kon SENOR tabata laga tur loke ku e tabata hasi prospera den su man.

⁴Asina Jose a hana grasia den su bista i a bira su sirbido personal; i el a hasie mayordomo di su kas, i tur loke ku e tabatin el a pone na su enkargo.

⁵I a sosode ku for di tempu ku el a hasie mayordomo di su kas i di tur loke ku e tabatin, SENOR a bendishona kas di e egipsio pa motibu di Jose; asina e bendishon di SENOR tabata riba tur loke ku e tabatin, na kas i den kunuku.

⁶Pesei el a laga tur loke ku e tabatin na enkargo di Jose, i ku Jose einan e no tabata preokup'e ku nada sino ku e pan ku e tabata kome so. I Jose tabatin bon tipo i bon aparensia.

⁷I a sosode ku despues di e kosnan aki e esposa di su shon tabata wak Jose ku deseo i el a bisa: "Drumi ku mi."

⁸Ma Jose a nenga i a bisa esposa di su shon: "Mira, ku mi akinan mi shon no ta preokup'e ku nada den kas, i el a pone tur loke ku e tin na mi enkargo.

⁹No tin ningun hende mas haltu den e kas aki ku ami, i e no a nengami nada sino abo so, pasobra abo ta su esposa. Kon anto mi por hasi e maldat grandi aki i peka kontra Dios?"

¹⁰I a sosode ku ounke ku e tabata papia ku Jose dia tras dia, Jose no tabata skuch'e pa drumi kune, ni pa ta serka dje.

¹¹Awor a sosode ku un dia Jose a bai den kas pa hasi su trabou, i ningun di e hombernan di e kas no tabat'ei.

¹²I e muhe a kohe Jose tene na su pana, bisando: "Drumi ku mi!" I Jose a laga su pana den man di e muhe i a hui, i a sali bai pafo.

¹³I ora ku e muhe a mira ku Jose a laga su pana den su man i a hui bai pafo,

¹⁴el a yama e hombernan di su kas i a bisa nan: "Mira, el a trese un hebreo pa nos, pa hasi bofon di nos; e hebreo a drenta pa drumi ku mi i mi a grita.

¹⁵I a sosode ku ora el a tendemi dal un gritu, el a laga su pana band'i mi i a hui, i a sali bai pafo."

¹⁶Asina el a laga Jose su pana band'i dje te ora Jose su shon a bin kas.

¹⁷E ora ei e muhe a bis'e e palabranan aki: "E esklabu hebreo, ku bo a trese pa nos, a bin serka mi pa hasi bofon di mi;

¹⁸i a sosode ku ora mi a dal un gritu, el a laga su pana band'i mi i a hui bai pafo."

¹⁹Ora Jose su shon a tende e palabranan di su esposa, kende a bis'e: "Esaki ta loke bo esklabu a hasi ku mi," su rabia a lanta.

²⁰Pesei Jose su shon a koh'e ser'e den prizon, e luga kaminda e prezonan di rei tabata wordu sera; i e tabata ayanan den prizon.

²¹Ma SENOR tabata ku Jose i a mustr'e miserikordia, i a dun'e grasia den bista di e hefe di prizon.

²²I e hefe di prizon a pone tur e prezonan ku tabata den prizon bou di enkargo di Jose, asina ku e tabata responsabel pa tur loke tabata pasa ayanan.

²³E hefe di prizon no tabata atende ku nada ku tabata bou di enkargo di Jose, pasobra SENOR tabata kune; i kiko ku e tabata hasi, SENOR tabata hasi prospera.