Read Papantla Totonac Genesis 4 Bible Online

Genesis 4 - Papantla Totonac bible

Genesis 4

¹Awor e homber tabatin relashon ku su esposa Eva, i Eva a sali na estado i a duna lus na Kain, i el a bisa: "Mi a hana un yu homber ku yudansa di SENOR."

²Siguientemente el a duna lus na Abel, ruman homber di Kain. I Abel tabata un wardado di bestia, ma Kain tabata un kunukero.

³I a sosode ku den kurso di tempu Kain a hiba un ofrenda di fruta di e tera pa SENOR.

⁴Anto Abel, di su parti, tambe a hiba for di e promenan ku a nase di su kria di bestia chikitu i di nan vet. I SENOR a apresia Abel i su ofrenda,

⁵ma Kain i su ofrenda E no a apresia. Pesei Kain a rabia masha pisa i su kara a sera.

⁶E ora ei SENOR a bisa Kain: "Pakiko bo ta rabia? I pakiko bo kara ta sera asina?

⁷Si bo hasi bon, lo bo no wordu asepta? I si bo no hasi bon, pika ta lur na porta. I su deseo ta pa bo, ma abo mester domin'e."

⁸Anto Kain a papia ku su ruman Abel. I a sosode ku ora nan tabata den kunuku, Kain a lanta kontra su ruman Abel i a mat'e.

⁹E ora ei SENOR a bisa Kain: "Unda bo ruman Abel ta?" I el a bisa: "Mi no sa. Ta wardado di mi ruman mi ta anto?"

¹⁰I El a bisa: "Ta kiko bo a hasi? Bos di bo ruman su sanger ta sklama na Mi for di suela.

¹¹I awor bo ta maldishona for di e tera ku a habri su boka pa risibi bo ruman su sanger for di bo man.

¹²Ora bo kultiva e tera, e lo no dunabo su forsa mas. Lo bo ta un fugitivo i un bagamundo riba tera."

¹³I Kain a bisa SENOR: "Mi kastigu ta muchu grandi pa mi soporta!

¹⁴Mira, awe Bo a kore ku mi for di superfisio di tera; i lo mi ta skondi pa Bo kara; i lo mi ta un fugitivo i un bagamundo riba tera, i lo sosode ku ken ku hanami, lo matami."

¹⁵I SENOR a bis'e: "Pesei, ken ku mata Kain, vengansa lo wordu tuma riba dje shete bes." I SENOR a pone un marka riba Kain, pa ningun hende ku han'e no mat'e.

¹⁶E ora ei Kain a sali for di e presensia di SENOR i a bai biba na tera di Nod, pariba di Eden.

¹⁷I Kain tabatin relashon ku su esposa, i su esposa a sali na estado i a duna lus na Enok. I Kain a traha un stat i a yama e stat Enok, na nomber di su yu.

¹⁸Anto pa Enok a nase Irad; i Irad a engendra Mehuyael. Mehuyael a engendra Metusael, i Metusael a engendra Lamek.

¹⁹I Lamek a tuma dos esposa pa su mes: nomber di esun tabata Ada, i nomber di e otro Zila.

²⁰I Ada a duna lus na Jabal. E tabata tata di esnan ku ta biba den tent i ku tin bestia di kria.

²¹I nomber di su ruman homber tabata Jubal. E tabata tata di tur esnan ku ta toka arpa i fluit.

²²Zila tambe a duna lus, esta, na Tubal-kain, trahado di tur herment di brons i heru. I e ruman muhe di Tubal-kain tabata Naama.

²³Anto Lamek a bisa su esposanan: "Ada i Zila, tende na mi bos, boso, esposanan di Lamek, pone atenshon na loke mi ta bisa; pasobra mi a mata un homber, pasobra el a heridami, i un mucha homber, pasobra el a dal mi;

²⁴si Kain a wordu venga shete bes, anto Lamek setenta bes shete."

²⁵I Adam tabatin relashon ku su esposa atrobe, i su esposa a duna lus na un yu homber i a dun'e e nomber Set, pasobra el a bisa: "Dios a dunami un otro yu na luga di Abel, pasobra Kain a mat'e."

²⁶I pa Set tambe a nase un yu homber, i el a dun'e e nomber Enos. E ora ei hende a kuminsa invoka e nomber di SENOR.