Read Papantla Totonac Genesis 40 Bible Online

Genesis 40 - Papantla Totonac bible

Genesis 40

¹Anto despues di e kosnan aki a sosode ku e kopero i e panadero di rei di Egipto a ofende nan senor, rei di Egipto.

²I Farao tabata masha rabia ku su dos ofisialnan, e hefe di e koperonan i e hefe di e panaderonan.

³Asina el a detene nan den kas di e kapitan di guardia, den prizon, e luga kaminda Jose tabata sera.

⁴I e kapitan di guardia a enkarga Jose ku nan i el a perkura pa nan; i nan a keda deteni pa algun tempu.

⁵Anto e kopero i e panadero di rei di Egipto, kendenan tabata sera den prizon, tur dos tabatin un sono e mesun anochi, kada un su mes sono i kada sono ku su mes interpretashon.

⁶Ora Jose a bin mainta serka nan i a opserva nan, el a ripara ku nan tabata tristu.

⁷I el a puntra e ofisialnan di Farao, kendenan tabata deteni huntu kune den kas di su shon: "Pakiko boso kara ta tristu asina awe?"

⁸E ora ei nan a bis'e: "Nos tabatin un sono i no tin ningun hende pa interpret'd." E ora ei Jose a bisa nan: "Interpretashon no ta Dios Su asunto? Pa fabor, kontami e sono."

⁹Anto e hefe di e koperonan a konta Jose su sono i a bis'e: "Ata, den mi sono tabatin un mata di wendruif mi dilanti;

¹⁰i na e mata di wendruif tabatin tres taki. I segun ku e tabata saka konopi, su flornan tabata habri i su troshinan tabata pari wendruif hechu.

¹¹Awor Farao su kopa tabata den mi man; i mi a kohe e wendruifnan primi nan den Farao su kopa, i mi a duna Farao e kopa den su man."

¹²E ora ei Jose a bis'e: "Esaki ta su interpretashon: e tres takinan ta tres dia.

¹³Den termino di tres dia Farao lo halsa bo kabes i bolbe ponebo na bo puesto. Lo bo entrega Farao su kopa den su man, meskos ku bo tabata hasi antes, tempu ku bo tabata su kopero.

¹⁴Solamente, korda riba mi ora kos ta bai bon pa bo i hasimi un fabor di papia ku Farao pa mi, i sakami for di e kas aki.

¹⁵Pasobra en realidat mi a wordu sekuestra hiba for di tera di e hebreonan i aki tampoko mi no a hasi nada pa nan a serami den prizon."

¹⁶Ora ku e hefe di e panaderonan a mira ku e interpretashon tabata faborabel, el a bisa Jose: "Ami tambe a mira den mi sono, i ata, tabatin tres makutu di pan blanku riba mi kabes;

¹⁷i den e makutu di mas ariba tabatin tur sorto di kuminda horna pa Farao, i e parhanan tabata kome nan for di den e makutu riba mi kabes."

¹⁸Anto Jose a kontesta i a bisa: "Esaki ta su interpretashon: e tres makutunan ta tres dia.

¹⁹Denter di tres dia Farao lo halsa bo kabes i lo kologabo na un palu; i parhanan lo kome bo karni for di bo kurpa."

²⁰Asina a sosode riba e di tres dia, ku tabata Farao su hasimentu di ana, ku el a pone un fiesta pa tur su sirbidonan; i el a halsa kabes di e hefe di e koperonan i kabes di e hefe di e panaderonan meimei di su sirbidonan.

²¹I el a pone e hefe di e koperonan bek na su puesto, i esaki tabata pone e kopa den man di Farao atrobe;

²²ma el a horka e hefe di e panaderonan, manera Jose a interpreta pa nan.

²³Sinembargo, e hefe di e koperonan no a korda riba Jose, ma a lubida riba dje.