Read Papantla Totonac Genesis 42 Bible Online

Genesis 42 - Papantla Totonac bible

Genesis 42

¹Awor Jakob a hana sa ku tabatin mainshi na Egipto, i Jakob a bisa su yu hombernan: "Pakiko boso ta wak otro den kara?"

²I el a bisa: "Mira, mi a tende ku tin mainshi na Egipto; bai na e luga ei i kumpra poko pa nos for di einan, pa nos keda na bida i no muri."

³Asina dies ruman homber di Jose a bai pa kumpra mainshi na Egipto.

⁴Ma Jakob no a manda Benjamin, Jose su ruman homber, huntu ku su rumannan, pasobra el a bisa: "Mi tin miedu pa algu malu no pas'e."

⁵Asina, entre esnan ku tabata bin pa kumpra mainshi, a yega tambe e yunan di Israel, pasobra tabatin hamber na tera di Kanaan.

⁶Awor Jose tabata gobernado di e tera; e tabata esun ku tabata bende ku henter e pueblo di e tera. I Jose su rumannan a yega i a buig p'e ku nan kara te na suela.

⁷Ora Jose a mira su rumannan, el a rekonose nan, ma el a hasi manera e no konose nan i a papia brutu ku nan. I el a bisa nan: "Di unda boso a bin?" I nan a bisa: "For di tera di Kanaan, pa kumpra kuminda."

⁸Asina Jose a rekonose su rumannan, ma nan si no a rekonos'e.

⁹I Jose a korda e sononan ku el a sona ku nan, i a bisa nan: "Boso ta spion; boso a bin pa wak e partinan di nos tera ku no tin defensa!"

¹⁰I nan a bis'e: "No, mi senor, ma bo sirbidonan a bin pa kumpra kuminda.

¹¹Nos tur ta yu di un homber; nos ta hende onesto; bo sirbidonan no ta spion."

¹²Ma Jose a bisa nan: "No, ma boso a bin pa wak e partinan di nos tera ku no tin defensa!"

¹³I nan a bisa: "Bo sirbidonan ta diesdos ruman, yu di un tata na tera di Kanaan; i mira, esun di mas chikitu a keda serka nos tata awe, i un no t'ei mas."

¹⁴I Jose a bisa nan: "Ta manera mi a bisa boso, boso ta spion!

¹⁵Ku esaki boso lo wordu poni na prueba: pa bida di Farao, boso lo no sali for di e luga aki si boso ruman homber di mas chikitu no bin akinan.

¹⁶Manda un di boso bai buska boso ruman, mientras ku boso ta keda sera, pa boso palabranan wordu poni na prueba, si tin berdat den boso. I si no, pa bida di Farao, siguramente ta spion boso ta."

¹⁷Asina el a sera nan tur huntu den prizon pa tres dia.

¹⁸I riba e di tres dia Jose a bisa nan: "Hasi esaki i biba, pasobra mi ta teme Dios:

¹⁹si boso ta hende onesto, laga un di boso rumannan keda sera den boso prizon; ma boso bai hiba mainshi pa e hamber di boso kasnan,

²⁰i trese boso ruman homber di mas chikitu serka mi, pa boso palabranan wordu verifika, i boso lo no muri." I asina nan a hasi.

²¹E ora ei nan a bisa otro: "Di berdat nos ta kulpabel enkuanto nos ruman homber, pasobra nos a mira e angustia di su alma ora ku el a roga nos, ma nos no kier a skucha; pesei e angustia aki a bin riba nos."

²²Anto Ruben a kontesta nan, bisando: "Mi no a bisa boso: 'No peka kontra e mucha'; ma boso no kier a skucha. Awor nos tin ku duna kuenta tokante di su sanger."

²³Ma nan no tabata sa ku Jose tabata komprende nan, pasobra nan tabata hasi uzo di un interprete.

²⁴I Jose a kita bai for di nan i a yora. Ma ora ku el a bolbe serka nan i a papia ku nan, el a kita Simeon for di nan i a mar'e nan dilanti.

²⁵E ora ei Jose a duna ordu pa yena nan saku ku mainshi i pa pone kada un su plaka bek den su saku, i pa duna nan provishon pa na kaminda. I asina nan a hasi pa nan.

²⁶I nan a karga nan buriku ku mainshi i a bai for di einan.

²⁷I ora ku un di nan a habri su saku pa duna su buriku di kome na e posada, el a mira su plaka; i at'e tabata den boka di su saku.

²⁸E ora ei el a bisa su rumannan: "Nan a debolbemi mi plaka, i at'e aki den mi saku!" Anto nan kurason a hera di para, i na temblamentu nan a bisa otro: "Ta kiko esaki ku Dios a hasi ku nos?"

²⁹Ora nan a yega serka nan tata Jakob na tera di Kanaan, nan a kont'e tur loke a pasa ku nan, bisando:

³⁰"E homber, e senor di e tera, a papia brutu ku nos, i a tuma nos pa spion di e tera.

³¹Ma nos a bis'e: 'Nos ta hende onesto; nos no ta spion.

³²Nos ta diesdos ruman homber, yunan di nos tata; un no t'ei mas, i esun di mas chikitu ta serka nos tata awe na tera di Kanaan.'

³³"I e homber, e senor di e tera, a bisa nos: 'Na esaki lo mi sa ku boso ta hende onesto: laga un di boso ruman hombernan serka mi i tuma mainshi pa e hamber di e hendenan di boso kasnan, i bai.

³⁴Ma trese boso ruman homber di mas chikitu serka mi, pa mi sa ku boso no ta spion, sino hende onesto. I lo mi entrega boso ruman homber na boso, i boso por negosha den e tera.'"

³⁵Awor a sosode ku ora nan tabata hasi nan saku bashi, ata, kada un su saku di plaka tabata den su saku; i ora nan i nan tata a mira nan saku di plaka, nan a spanta masha.

³⁶I nan tata Jakob a bisa nan: "Boso a robami di mi yunan: Jose no t'ei mas i Simeon no t'ei mas, i boso kier bai ku Benjamin; tur e kosnan aki ta kontra mi."

³⁷E ora ei Ruben a papia ku su tata, bisando: "Bo por mata mi dos yu hombernan si mi no trese Benjamin bek pa bo; entregu'e den mi man i lo mi bolbe tres'e pa bo."

³⁸Ma Jakob a bisa: "Mi yu no ta bai ayanan ku boso, pasobra su ruman homber a muri i e so a keda. Si algu malu pasa kune durante di e biahe ku boso ta hasi, boso lo hasi mi kabei blanku baha ku tristesa den Seol."