Read Papantla Totonac Genesis 44 Bible Online

Genesis 44 - Papantla Totonac bible

Genesis 44

¹I Jose a duna mayordomo di su kas ordu, bisando: "Yena e hombernan su sakunan ku kuminda, mes tantu ku nan por karga, i pone plaka di kada homber den boka di su saku.

²I pone mi kopa, e kopa di plata, den boka di saku di esun di mas chikitu, huntu ku su plaka pa su mainshi." I el a hasi manera Jose a bisa.

³Asina ku dia a kuminsa habri nan a laga e hombernan bai, nan ku nan burikunan.

⁴Apenas nan a sali for di e stat, i no tabata muchu leu ainda, ku Jose a bisa mayordomo di su kas: "Lant'ariba, bai tras di e hombernan, i ora bo alkansa nan, bisa nan: 'Pakiko boso a paga bon ku malu?

⁵Esaki no ta esun for di kual mi senor ta bebe, i ku e sa uza pa adivina? Boso a hasi malu di hasi e kos aki.'"

⁶Asina el a alkansa nan i a papia e palabranan aki ku nan.

⁷I nan a bis'e: "Pakiko mi senor ta papia palabranan asina? Nunka bo sirbidonan lo no hasi un kos asina.

⁸Mira, e plaka ku nos a hana den boka di nos sakunan nos a trese bek pa bo for di tera di Kanaan. Kon anto nos por a horta plata of oro for di kas di bo senor?

⁹Esun di bo sirbidonan ku nan hana e kopa den su poder, laga esei muri, i nos tambe lo ta mi senor su esklabunan."

¹⁰I el a bisa: "Awor laga sosode tambe konforme boso palabranan; esun den kende su poder esaki wordu hana lo ta mi esklabu, i e otronan lo ta inosente."

¹¹E ora ei kada un di nan masha lihe a baha su saku pone abou, i kada un a habri su saku.

¹²Asina el a buska, i a kuminsa serka esun mayo i a termina serka esun di mas chikitu; i e kopa a wordu hana den Benjamin su saku.

¹³E ora ei nan a sker nan pananan, i kada un a pone su karga riba su buriku i nan a bai bek na e stat.

¹⁴Ora Juda i su rumannan a yega Jose su kas, e tabat'ei ainda, i nan a tira nan kurpa abou su dilanti.

¹⁵Anto Jose a bisa nan: "Ta kiko e kos ku boso a hasi aki ta? Boso no sa ku un homber manera ami di berdat por praktika adivinashon?"

¹⁶E ora ei Juda a bisa: "Kiko nos por bisa mi senor? Kiko nos por papia? I kon nos por hustifika nos mes? Dios a hana sa e inikidat di bo sirbidonan; mira, nos ta mi senor su esklabunan, tantu nos komo esun serka kende e kopa a wordu hana."

¹⁷Ma el a bisa: "Nunka lo mi no hasi un kos asina. E homber serka kende e kopa a wordu hana, esei lo ta mi esklabu; ma boso bai na pas serka boso tata."

¹⁸E ora ei Juda a aserk'e i a bisa: "Ai, mi senor, pa fabor, laga bo sirbido papia un palabra den orea di mi senor, i no rabia ku bo sirbido; pasobra bo ta igual ku Farao.

¹⁹Mi senor a puntra su sirbidonan, bisando: 'Boso tin tata of ruman homber?'

²⁰I nos a bisa mi senor: 'Nos tin un tata bieu i un mucha chikitu di su biehes; su ruman homber a muri, asina ku ta e so a keda di su mama, i su tata ta stim'e.'

²¹"E ora ei bo a bisa bo sirbidonan: 'Tres'e pa mi, pa mi mir'e ku mi mes wowo.'

²²Ma nos a bisa mi senor: 'E mucha no por bai laga su tata, pasobra si e bai laga su tata, su tata ta muri.'

²³Ma bo a bisa bo sirbidonan: 'Si boso ruman di mas chikitu no bin huntu ku boso, boso lo no mira mi kara mas.'

²⁴Asina a sosode ku ora nos a bai serka bo sirbido mi tata, nos a kont'e e palabranan di mi senor.

²⁵"I nos tata a bisa: 'Bai kumpra poko kuminda pa nos atrobe.'

²⁶Ma nos a bisa: 'Nos no por bai. Si nos ruman homber di mas chikitu bai ku nos, e ora ei nos lo bai; pasobra nos no por bai mira kara di e homber si nos ruman di mas chikitu no ta huntu ku nos.'

²⁷"I bo sirbido, mi tata, a bisa nos: 'Boso sa ku mi esposa a hana dos yu homber pa mi;

²⁸i esun a bai for di mi, i mi a bisa: "Siguramente bestia a sker e na pida-pida," i for di e tempu ei mi no a mir'e mas.

²⁹I si boso kita esun aki tambe for di mi, i algu malu pas'e, boso lo hasi mi kabei blanku baha ku tristesa den Seol.'

³⁰"Pesei anto, ora mi yega serka bo sirbido mi tata, i e mucha no ta huntu ku nos, siendo ku su bida ta mara na e mucha su bida,

³¹lo sosode, ora ku e mira ku e mucha no ta huntu ku nos, ku e lo muri. Asina bo sirbidonan lo hasi e kabei blanku di bo sirbido nos tata baha ku tristesa den Seol.

³²Pasobra bo sirbido a para responsabel pa e mucha serka mi tata, bisando: 'Si mi no tres'e bek pa bo, e ora ei lo mi karga e kulpa dilanti di mi tata pa semper.'

³³"Pesei anto, pa fabor, laga bo sirbido keda esklabu di mi senor na luga di e mucha, i laga e mucha bai ku su rumannan.

³⁴Pasobra kon mi ta hasi bai serka mi tata si e mucha no ta huntu ku mi? Lo mi no por mira e kos malu ku lo pasa ku mi tata."