Read Papantla Totonac Genesis 45 Bible Online

Genesis 45 - Papantla Totonac bible

Genesis 45

¹E ora ei Jose no por a domina su mes dilanti di tur esnan ku tabata para banda di dje, i el a sklama: "Laga tur hende bai for di mi." Asina ku no tabatin ningun hende serka dje ora Jose a laga su rumannan sa ken e ta.

²I el a yora asina duru ku e egipsionan a tende i e hendenan di kas di Farao tambe a tende.

³E ora ei Jose a bisa su rumannan: "Ami ta Jose! Mi tata ta na bida ainda?" Ma su rumannan no por a kontest'e, pasobra nan tabata tur spanta su dilanti.

⁴E ora ei Jose a bisa su rumannan: "Pa fabor, hala mas serka di mi." I nan a hala mas serka. I el a bisa: "Ami ta boso ruman Jose ku boso a bende manda Egipto.

⁵I awor, no sea tristu ni rabia ku boso mes pasobra boso a bendemi akinan, pasobra Dios a mandami boso dilanti pa preserva bida.

⁶Pasobra dos ana kaba tabatin hamber den e tera aki, i ainda ta bin sinku ana den kual lo no tin plugmentu ni kosecha.

⁷I Dios a mandami boso dilanti pa preserva un restante pa boso riba tera i pa tene boso na bida pa medio di un gran liberashon.

⁸"Pesei anto, no ta boso a mandami akinan, sino Dios; i El a hasimi un tata pa Farao i senor di henter su kas i gobernado di henter tera di Egipto.

⁹Hasi lihe bai serka mi tata i bis'e: 'Asina bo yu Jose ta bisa: "Dios a hasimi senor di henter Egipto; bin serka mi, no tarda.

¹⁰Lo bo biba na tera di Gosen i lo bo ta serka di mi, abo i bo yunan i e yunan di bo yunan, bo krianan di bestia chikitu, bo bakanan i tur loke bo tin.

¹¹Aya lo mi provee tambe pa bo, pasobra ainda tin sinku ana di hamber mas pa bin, pa abo i e hendenan di bo kas i tur loke bo tin no kai den pobresa."'

¹²"I ata, boso wowo mes ta mira i wowo di mi ruman Benjamin ta mira, ku ta mi boka ta papia ku boso.

¹³Awor boso mester konta mi tata di tur mi gloria na Egipto, i tur loke boso a mira, i boso hasi lihe trese mi tata akinan."

¹⁴E ora ei el a kai den brasa di su ruman Benjamin i a yora, i Benjamin tambe a yora den su brasa.

¹⁵I el a sunchi tur su rumannan i a yora den nan brasa. Despues su rumannan a papia kune.

¹⁶Awor nan a tende e notisia den kas di Farao, ku Jose su rumannan a yega. I esaki a agrada Farao i su sirbidonan masha.

¹⁷E ora ei Farao a bisa Jose: "Bisa bo rumannan: 'Hasi esaki: pone karga riba boso bestianan i bai tera di Kanaan,

¹⁸i buska boso tata i e hendenan di boso kas i bin serka mi, i lo mi duna boso e miho di tera di Egipto i boso lo kome di e abundansia di e tera.'

¹⁹"Awor, duna nan ordu: 'Hasi asin'aki: hiba garoshi for di tera di Egipto pa boso yu chikitunan i pa boso esposanan, i trese boso tata i bin.

²⁰No preokupa boso pa boso biennan, pasobra e miho di henter tera di Egipto ta di boso.'"

²¹Anto e yunan di Israel a hasi asina; i Jose a duna nan garoshi konforme ordu di Farao, i a duna nan provishon pa na kaminda.

²²El a duna kada un di nan un set di pana nobo, ma Benjamin el a duna tres shen pida plata i sinku set di pana nobo.

²³I pa su tata el a manda lo siguiente: dies buriku karga ku e kosnan di mas miho di Egipto i dies buriku yewa karga ku mainshi i pan i kuminda pa su tata ora ku e ta na kaminda.

²⁴Asina el a tuma despedida di su rumannan, i ora nan tabata bai, el a bisa nan: "No pleita na kaminda."

²⁵E ora ei nan a sali for di Egipto, i a yega tera di Kanaan serka nan tata Jakob.

²⁶I nan a bis'e: "Jose ta na bida ainda, i di berdat e ta gobernado di henter tera di Egipto." Ma su kurason a keda friu, pasobra e no a kere nan.

²⁷Ora nan a kont'e tur loke Jose a papia ku nan, i ora ku el a mira e garoshinan ku Jose a manda pa transport'd, spiritu di nan tata Jakob a rebiba.

²⁸E ora ei Israel a bisa: "Ta basta; mi yu Jose ta na bida ainda. Mi kier bai mir'e prome mi muri."