Read Papantla Totonac Genesis 46 Bible Online

Genesis 46 - Papantla Totonac bible

Genesis 46

¹Asina Israel a kuminsa su biahe ku tur loke e tabatin i a yega Beerseba, i a ofrese sakrifisionan na e Dios di su tata Isaak.

²I Dios a papia ku Israel den vishonnan di anochi i a bisa: "Jakob, Jakob!" I Jakob a bisa: "At'ami aki."

³Anto El a bisa: "Ami ta Dios, e Dios di bo tata; no tene miedu di bai Egipto, pasobra ayanan lo Mi hasibo un nashon grandi.

⁴Mi ta bai Egipto ku bo, i lo Mi tresebo bek sigur; i Jose lo sera bo wowonan."

⁵E ora ei Jakob a sali bai for di Beerseba; i e yunan di Israel a transporta nan tata Jakob, nan yu chikitunan i nan esposanan den e garoshinan ku Farao a manda pa transport'e.

⁶I nan a kohe nan bestianan i nan propiedat ku nan a atkiri na tera di Kanaan, i a yega Egipto, Jakob i tur su desendientenan huntu kune:

⁷su yu hombernan i su nietunan huntu kune, su yu muhenan, su nietanan i tur su desendientenan, el a hiba Egipto huntu kune.

⁸Awor esakinan ta e nombernan di e yu hombernan di Israel, Jakob i su yu hombernan, kendenan a bai Egipto: Ruben, Jakob su primogenito.

⁹I e yu hombernan di Ruben tabata Hanok, Palu, Hezron i Karmi.

¹⁰I e yu hombernan di Simeon tabata Jemuel, Jamin, Ohad, Jakin, Zohar i Saul, yu homber di un muhe kananeo.

¹¹E yu hombernan di Levi tabata Gerson, Koat i Merari.

¹²I e yu hombernan di Juda tabata Er, Onan, Sela, Fares i Zara (ma Er i Onan a muri na tera di Kanaan). I e yu hombernan di Fares tabata Hezron i Hamul.

¹³E yu hombernan di Isakar tabata Tola, Pua, Job i Simron.

¹⁴I e yu hombernan di Zabulon tabata Sered, Elon i Jahleel.

¹⁵Esakinan ta e yu hombernan di Lea ku el a hana pa Jakob na Padan-aram, ademas di su yu muhe Dina; tur huntu nan tabata trint'i tres yu, homber i muhe.

¹⁶I e yu hombernan di Gad tabata Zifion, Hagui, Suni, Ezbon, Eri, Arodi i Areli.

¹⁷I e yu hombernan di Aser tabata Imna, Isua, Isui i Beria i nan ruman muhe Sera. I e yu hombernan di Beria tabata Heber i Malkiel.

¹⁸Esakinan ta e yu hombernan di Zilpa, kende Laban a duna na su yu muhe Lea; i el a hana e dieseis personanan aki pa Jakob.

¹⁹E yu hombernan di Jakob su esposa Raquel tabata Jose i Benjamin.

²⁰Awor pa Jose a nase na tera di Egipto Manases i Efrain, kendenan Asenat, yu muhe di Potifera, saserdote di On, a hana p'e.

²¹I e yu hombernan di Benjamin tabata Bela, Beker, Asbel, Gera, Naaman, Ehi, Ros, Mupim, Hupim i Ard.

²²Esakinan ta e yu hombernan di Raquel, kendenan a nase pa Jakob; dieskuater persona na tur.

²³I e yu homber di Dan tabata Husim.

²⁴I e yu hombernan di Neftali tabata Jahzeel, Guni, Jezer i Silem.

²⁵Esakinan ta e yu hombernan di Bilha, kende Laban a duna na su yu muhe Raquel, i el a hana esakinan pa Jakob: shete persona na tur.

²⁶Tur e personanan ku ta pertenese na Jakob, ku a bin Egipto, ku a sali for di su lomo, fuera di e esposanan di Jakob su yu hombernan, tabata sesent'i seis persona na tur,

²⁷i e yu hombernan di Jose, kendenan a nase p'e na Egipto, tabata dos; na tur, e personanan di kas di Jakob, kendenan a bin Egipto, tabata setenta.

²⁸Awor el a manda Juda bai su dilanti serka Jose, pa mustr'e e kaminda pa bai Gosen; i nan a yega tera di Gosen.

²⁹I Jose a prepara su garoshi i a bai Gosen pa kontra ku su tata Israel; asina ku el a presenta su dilanti, el a kai den su brasa i a yora den su brasa pa un bon ratu.

³⁰E ora ei Israel a bisa Jose: "Awor mi por muri komo ku mi a mira bo kara, ku bo ta na bida ainda."

³¹I Jose a bisa su ruman hombernan i e hendenan di kas di su tata: "Mi ta bai partisipa Farao i lo mi bis'e: 'Mi ruman hombernan i e hendenan di kas di mi tata, kendenan tabata na tera di Kanaan, a bin serka mi;

³²i e hombernan ta wardado di karne, pasobra nan ta kriado di bestia; i nan a trese nan karnenan, nan bakanan i tur loke nan tin.'

³³I lo sosode ku ora Farao manda yama boso i e bisa: 'Kiko ta boso ofishi?'

³⁴bisa e ora ei: 'Bo sirbidonan tabata kriado di bestia for di nos hubentut te awor, tantu nos komo nos tatanan,' pa boso por biba na tera di Gosen; pasobra tur loke ta wardado di karne ta abominashon pa e egipsionan."